Ձեր վստահելի աղբյուրը

«Պատրվակ էր պետք այս իշխանություններին ԱԺ աշխատակազմի նախկին ղեկավար Արա Սաղաթելյանին երկար ժամանակով փակելու համար։ Նա անօրինական, անիրավաչափ ձերբակալված է, մեղադրանքներում էլ, այնպիսի հոդված կա, որ նույնիսկ այս Սահմանադարական դատարանն է  ճանաչել հակասահմանադրական կապված ռազմական դրության հետ»,- լրագրողներին ասաց ռազմական փորձագետ Կարեն Վրթանեսյանը, ով Բաղրամյան պողոտայում ներկայացնում է «Ազատություն քաղբանտարկյալ Արա Սաղաթելյանին» գրությամբ ստենդ:

Նա նշեց, որ անգնահատելի է Արա Սաղաթելյանի ներդրումը ՀՀ պետականության, տեղեկատվական պաշտպանության գործում, ինչի մասին շատ լավ գիտեն նաև իշխանությունները։

«Նույնիսկ պատերազմի օրերին էին փորձում ինչ-որ բան անել այն դեպքում, երբ Արա Սաղաթելյանը զենքը ձեռքին էր։ Դա չէր խանգարում նրա մասին կեղծիքներ տարածել, հետո խայտառակ էին լինում։ Պատերազմը թողած, թշնամուն թողած պետական կառույցները, իշխանությունները զբաղվում էին Արա Սաղաթելյանի վրա լրիվ մտացածին  գործ կարելով»,- ասաց Կ. Վրթնեսյանը։

Նա ընդգծեց՝ Արա Սաղաթելյանը շատ վտանգավոր է Հայաստանի թշնամիների համար, իսկ թե ինչու են որոշել կալանավորել, ամեն մեկն իր եզրակացությունը պետք է ան։

«Խայտառակ իրավիճակ է։ Նախկինում կային արևմտյան ֆինանսավորմամբ իրավապաշտպան կազմակերպություններ, հիմա դրանք բոլորը լուռ են։ Եթե նման դեպք լիներ 2018 թվականից առաջ, ամեն մեկ օր դրա մասին գոռալու էին բոլոր հարթակներում,  թեև Արա Սաղաթելյանի և ձեբակալությունն էր անօրինական,  կալանավորումն է անօրինական, մեղադրանքներն անհիմն ու անհեթեթ»,- ասաց Կ.Վրթանեսյանը։

ԱԱԾ-ն Արա Սաղաթելյանին նախ ձերբակալել, ապա դատարանի որոշմամբ կալանավորվել է իբր «Գագիկ Սողոմոնյան» անունով ֆեյսբուքում կեղծ էջ բացելու ու «հանրային անկարգություններ հրահրելու, անձանց խմբի նկատմամբ քաղաքական հայացքներով պայմանավորված կյանքի և առողջության համար վտանգավոր բռնություն գործադրելու սպառնալիքներ և բռնության կոչեր անելու» մեղադրանքով։ Մինչ Սաղաթելյանն անազատության մեջ է, Գագիկ Սողոմոնյան անունով օգատատիրոջ թե ֆեյսբուքյան էջում, թե թելեգրամի ալիքում ամեն օր մի քանի հրապարակումներ են արվում։

Փաստաբանները պնդում են, որ Արա Սաղաթելյանին կալանավորելու դատարանի որոշումը կայացվել է քաղաքական ճնշման ներքո։ Նրանք հայտարարել են, որ բողոքարկել են Սաղաթելյանի նկատմամբ կալանքը որպես խափանման միջոց ընտրելու վերաբերյալ դատարանի որոշումը։

Հիշեցնենք, որ փետրվարի 21-ին Երևանի ընդհանուր իրավասության դատարանը, դատավոր Արմինե Մելիքսեթյանի նախագահությամբ, որոշում է կայացրել երկու ամսով կալանավորել Արա Սաղաթելյանին՝ բավարարելով քննիչի միջնորդությունը: Արա Սաղաթելյանին մեղադրում են ՀՀ ՔՕ 226 (ազգային, ռասայական կամ կրոնական թշնամանք հարուցելը), 226.2 (բռնություն գործադրելու հրապարակային կոչերը, բռնությունը հրապարակայինորեն արդարացնելը կամ քարոզելը), 307.4 (ռազմական դրության իրավական ռեժիմի ընթացքում տեղեկությունների հրապարակման կամ տարածման կանոնները խախտելը) հոդվածների հատկանիշներով։