Այժմ պետք է երկրի 4 ղեկավարները համախմբվեն ու երկիրն այս վիճակից դուրս բերեն. Հովսեփյան
«Թող Ալեն Սիմոնյանը չմոռանա, որ ինքը ԱԺ փոխխոսնակ է, և պարտավոր է հարգել ցանկացած պատգամավորի կոչը»,- այսօր խորհրդարանում լրագրողների հետ զրույցում ասաց ԱԺ անկախ պատգամավոր Սոֆյա Հովսեփյանն՝ անդրադառնալով իր՝ համախմբվելու կոչի վերաբերյալ ԱԺ փոխխոսնակ Ալեն Սիմոնյանի արձագանքին։
Վերջինս ասել էր, որ Սոֆյա Հովսեփյանը պառակտման էր գնացել հենց խմբակցությունից դուրս գալով, և այժմ համախմբման կոչ է անում։
«Իմ իրավունքն է խմբակցությունից դուրս գալը, ուստի խմբակցությունում պարտավոր են հարմարվել այդ որոշմանը»,- ասաց նա։
Նա վստահեցրեց՝ որևէ կերպ չի մտածում, թե ինքը «Իմ քայլի» միջոցով է դարձել պատգամավոր, քանի որ, իր խոսքով, որքան «Իմ քայլն» է օգնել իրեն, այդքան էլ՝ ինքն է օգնել «Իմ քայլին»։
Նա նկատեց՝ ինքը պատահական չի ներգրավվել նախընտրական ցուցակում, հենց առաջին օրից միացել է «հեղափոխությանը», և իրեն հենց որպես Սոֆյա Հովսեփյան ճանաչելով են խնդրել, որ մասնակցի ընտրություններին։
«Ինձ արդեն իսկ որպես Սոֆյա Հովսեփյան ճանաչելով են առաջարկել մասնակցել ընտրություններին։ Ինձ իմ տարբեր ծրագրերով արդեն իսկ գիտեին, ճանաչում էին»,- ասաց նա։
Դիտարկմանը, որ նույն օրը տարբեր հարթակներում հավաքվում են տարբեր գաղափարներ կրող ուժեր և հանրահավաքներ են անում, այդ դեպքում ինչպե՞ս պետք է համախմբում լինի, Սոֆյա Հովսեփյանն արձագանքեց.
«Պարոն Փաշինյանը իր ելույթում ասաց, որ պարտվել են մեր երկրի բոլոր իշխանությունները։ Եվ ինքը նշեց, որ պետք է 0-ական կետից սկսել։ Այդ կետն իրենց սխալները շտկելն է։ Եվ այժմ պետք է երկրի 4 ղեկավարները համախմբվեն ու երկիրն այս վիճակից դուրս բերեն, քանի որ իրենք են այս իրավիճակը ստեղծել, իրենք էլ կարող են դուրս բերել երկիրն այս վիճակից։ Կամ էլ պետք է իրենք քաղաքական դաշտից մաքրվեն, և ճանապարհ տան այն մարդկանց, որոնք որևէ մասնակցություն չեն ունեցել այս ամենին, և կարող են գոնե 5 տարում երկրից այս ծանր բեռը թոթափել»,- կարծիք հայտնեց նա։
Ինչ վերաբերում է ներկայիս իշխանությունների կողմից վարչական ռեսուրս կիրառելուն, ապա Սոֆյա Հովսեփյանն ասաց՝ ինքն էլ է ահազանգեր ստացել մարդկանցից, որ իրենց հորդորում են գնալ հանրահավաքի։
«Եվ այն, ինչի դեմ մենք պայքարում էինք, փաստացի այժմ ավելի է խորացել»,- նշեց պատգամավորը։
Հարակից հրապարակումներ`
Լրահոս
Տեսանյութեր
Ի՞նչ կա մեքենայի մեջ. Կիրանցում ծակեցին մեքենայի անվանդողերը
