Ձեր վստահելի աղբյուրը

«Արմատապես վերանայվում է սոցփաթեթի տրամադրման կարգը, բավականին մեծ թվով փոփոխություններ են լինելու»,- այսօր հրավիրված մամուլի ասուլիսի ընթացքում ասաց ՀՀ աշխատանքի և սոցիալական հարցերի նախարարության աշխատանքի և զբաղվածության վարչության պետ  Ժորա Սարգսյանը՝ անդրադառնալով սոցփաթեթով տրամադրվող ծառայությունների ավելացման նախագծին։

Նրա խոսքով, առաջարկվում է ընդլայնել սոցփաթեթով տրամադրվող ծառայությունների ցանկը։ Եթե գործող կարգով սոցփաթեթի շահառուները կարողանում են ստացված գումարը ծախսել 4 ուղղություններով՝ հանգիստ, պետական սուբսիդավորմամբ ստացված հիփոթեքային վարկի մարում, ապահովագրական ծառայությունների ձեռքբերում և կրթություն, ապա այժմ առաջարկվում է, որ հնարավորություն տրվի սոցփաթեթի գումարները ուղղելու նաև մարզա-առողջարանական, սպորտային և նմանատիպ այլ ծառայություններից օգտվելուն։

«Սա ուղղված է առողջ ապրելակերպը խթանելուն։ Մարդիկ միշտ նստած են, իսկ սա առիթ կարող է հանդիսանալ, որ նրանք այցելեն, օրինակ՝ մարզասրահներ։ Բացի այդ, հնարավորություն կտրվի, որ ուսանողական վարկերը մարվեն սոցփաթեթի գումարով։ Սա հնարավորություն կտա, որ ուսանողի ընտանիքի անդամը կարողանա իր սոցփաթեթի գումարն ուղղել ուսանողական վարկի մարմանը»,- ներկայացրեց Ժորա Սարսգյանը։

Նա նշեց, որ նաև հնարավորություն կստեղծվի, որ սոցփաթեթի գումարը քաղաքացին միանգամից կարողանա ուղղել օրինակ՝ ստոմատոլոգիական որևէ կենտրոնի, որտեղ բուժել է ատամները։

«Բացի այդ, առաջարկում ենք, որ մարդկանց հնարավորություն տրվի իրենց սոցփաթեթի գումարով մուծել ցանկացած հիփոթեքային վարկ, եթե անգամ տվյալ անձն ուղղակի համավարկառու է»,- ասաց Ժորա Սարգսյանը։