Ձեր վստահելի աղբյուրը

«Բարգավաճ Հայաստան» խմբակցության Երևանի ավագանու անդամ Արմեն Ներսիսյանն այսօրվա  հերթական նիստի ընթացքում դիմելով ավագանու իմքայլական անդամներին, ասաց, որ իրենց ղեկավարը՝ Փաշինյանը, խաբեբա է։

«Լավ, իրականում ձեր աչքերը փակվա՞ծ են, չեք տեսնում ի՞նչ է արել։ Նիկոլ Փաշինյանը սոսնձվել է իր աթոռին, խաբել է բոլորիս։ Ասել է մի բան, արել՝ այլ բան։ Ասաց՝ առանց ժողովրդի կարծիքի ես չեմ գնա պայմանավորվածության Արցախի մասով, գիշերը գնաց պայմանավորվածության։ Կարո՞ղ է ես եմ խաբել։ Ուզում եմ հասկանալ, որ այդպես պաշտպանում եք, կարո՞ղ է ես եմ հայրենիքս տվել ուրիշին։

Այդ դուք եք խաբել ուրիշին։ Սթափվեք և միացեք մեզ։ Ոնց կարելի է մի տան մեջ ապրել, եթե տան հայրը դավաճանել է երեխաներին և ընտանիքի անդամներին»,- ասաց Ներսիսյանը, որին տեղից ընդհատեցին իմքայլական անդամները։

ԲՀԿ ներկայացուցիչն էլ վրդովված շարունակեց․ «Ինչի եք պաշտպանում, հեսա դուք էլ եք նախկին դառնալու։ Ինչ է, պաշտպանելու տեղ ունի, դուք էլ պաշտպանում ե՞ք»։

«Լույս» խմբակցության անդամ Անի Խաչատրյանն էլ իր հերթին ընդհատեց՝ նշելով, որ ընդդիմության կողմից ներկայացված թեկնածուն պաշտպանելու տեղ չունի։

Ի պատասխան Ներսիսյանն ասաց․ «Անի ջան, 50 տոկոսով միացար իշխանությա՞նը։ Բայց որ ուզում եք ինձ խանգարեք, վաղը դուք եք ձեր երեխաների առաջ պատասխան տալու։ Իմ ճակատն իմ երեխաների առաջ բաց է»։ 

«Բարգավաճ Հայաստան» խմբակցության անդամի նյարդերը տեղի տվեցին, երբ դահլիճից այլ արձագանքներ էր հնչեցին։ Կիսատ թողնելով ելույթը, նա մոտեցավ ավագանու անդամներին և սկսեցին վիճաբանել։

Երևանի քաղաքապետ Հայկ Մարությանն էլ չկարողանալով հանդարտեցնել կրքերը՝ հայտարարեց ընդմիջում։ Իսկ  այդ ընթացքում ավագանու անդամները սկսեցին մեկը  մյուսին դուրս հրավիրել ՝ հարցեր լուծելու համար։