Ձեր վստահելի աղբյուրը

«Ես ասել ու ասում եմ՝ Արայիկ Հարությունյանը Նիկոլ Փաշինյանի սիամական եղբայրն է, և նրան բերել ու Արցախի խան նշանակելը ենթարդում էր, որ նա նույն բաները պետք է անի, ինչ Նիկոլը»,- այսօր հրավիրված մամուլի ասուլիսի ընթացքում ասաց «Ռեֆորմիստների» կուսակցության հիմնադիր Վահան Բաբայանը՝ անդրադառնալով Արցախի ԱԻՊԾ փոխտնօրենի պաշտոնանկությանը, որը կապված էր նրա՝ քաղաքական հայտարարությունների հետ՝ ուղղված նաև իմքայլականներին։

Նրա խոսքով, Հայաստանի որոշ մարզպետներ ավելի մեծ ինքնուրույնություն ունեն, քան Արայիկ Հարությունյանը, որն ուղիղ զանգ է ստացել ու միանգամից աշխատանքից ազատել ԱԻՊԾ փոխտնօրենին, ով, ըստ Վահան Բաբայանի, շատ ճիշտ հարց էր բարձրացրել՝ նշելով, որ իմքայլականներն իրավունք չունեն ռուսական խաղաղապահ զորքերի հրամանատարի հասցեին տարեբեր վիրավորական հայտարարություններ անելու, քանի որ ռուսական կողմն է այժմ զբաղվում հայ գերիների վերադարձի խնդրով։

«Եթե փոխթաղապետը ռուս գեներալի մասին վատ է արտահայտվում, փոխարեն նրան պատժեն, նրա սխալը մատնանշողին են պատժում։ Իսկ ով հիմա ռուսական կողմին դեմ է գնում, թուրքի ջրաղացն է ջուր լցնում։ Իշխող խմբակցության պատգամավորը, որ նախկինում դերասան է եղել, իրեն իրավունք է վերապահում ասելու, որ գերիների վերադարձը պետք է ռուսներից պահանջել։ Ու դա ասում է պատգամավորը, որ իշխանական ֆռակցիան է ներկայացնում։ Դա խայտառակություն է, ու այս ԱԺ-ն հայոց պատմության մեջ մտնելու է որպես ամենախայտառակ ԱԺ»,- ասաց նա։

Ըստ նրա, վերջին երեք տարում այն մարդիկ, որոնք եղանակ կարող էին փոխել քաղաքական դաշտում, հայտ կարող էին իրականացնել այդ փոփոխություններն անելու, երբեք իրենց թույլ չէին տա գնալ պոպուլիստական ճանապարհով, և այսօր էլ եթե նույնիսկ լինեն ընտրություններ, այդ մարդիկ չեն կարող պրագմատիզմից դուրս բաներ անել։

«Իսկ տվյալ խելագարը, սելֆիների մանյակ է, ամեն օր նկարվում ու ֆռում էր։ Ստեր փչելով, ժողովրդին խաբելով՝ նա եկավ իշխանության ու չի ամաչում։ Իսկ մեր ընդդիմության մեջ նման առաջնորդ չեղավ..., թեև բոլորս էլ հասկանում ենք, որ մի պոպուլիստի ձեռքից մյուսի ձեռքն ընկնելն ավելի մեծ պրոբլեմ է։ Բայց պետք է հասկանալ՝ բաներ կան, որ պետք է ժողովրդին ասել։ Տեսեք, «Հայրենիքի փրկության շարժման» հանրահավաքների ժամանակ մի շատ կարևոր բաղադրիչ բաց թողնվեց։ Որտե՞ղ եք տեսել իշխանության հրաժարականը պահանջող բողոքի ակցիա, որտեղ ելույթերի մեջ մեկ տող չլինի տնտեսական, սոցիալական, մարդկանց կյանքին վերաբերող հարցերի մասին»,- նշեց նա։

Վահան Բաբայանը նկատեց՝ պետք է «կապիտուլյանտին օր ու արև չտային», իսկ հիմա Հայաստանում այնպես է հանդարտվել ամեն ինչ, որ թվում է՝ եղածը ուղղակի երազ էր։

«Նիկոլ Փաշինյանն ունի քաղաքական քամելեոնի հատկություն, նա քաղաքական քամելեոն է։ Ինքը կարող է օրվա ընթացքում և՛ իր կարծիքները, և՛ սկզբունքները փոխել։ Նման մարդու հետ հույս կապելը պետք է բերեր աղետի։ Հիմա մենք թողնում ենք, որ նա շարունակի քանդել երկիրը։ Նա բոլորի մեղավորությունը գտնում է, բացի իրենից։ Հիմա եթե Նիկոլը լիներ ընդդիմություն, նա 5 անգամ հեղափոխություն էր արել, իսկ մենք 5 ամսում չկարողացանք նրան ուղարկել այնտեղ, ուր պետք է»,- եզրափակեց խոսքը նա։