Ձեր վստահելի աղբյուրը

«Մեր կառավարությունը բան չի ասում, 8  ամիս տանում, բերում է,  ինչքա՞ն կարելի է խաբել:  Չէ՞ որ մայր եմ, քոռ դանակով մեր վիզը կտրում են»,- Երևանում  ՌԴ դեսպանության մոտ ակցիայի ժամանակ ասաց անհետ կորած զինծառայողի  մայրը:

Անհետ կորած, գերեվարված զինծառայողների ծնողները հավաքվել են դեսպանության մոտ՝ խնդրելով ՌԴ կառավարությանն օգնել իրենց երեխաներին գտնելու, հետ վերադաձնելու համար:

«Երեխեքի ոսկորները լցրել են մեշոկները, պահել են: Ամեն մի ոսկոր մի տան ծուխ է, հերոս է, երեխաների հայր է: Կառավարությունը թոզ է փչում մեր աչքերին»,- ասաց ակցիայի մասնակիցը:

Նա պատմեց, որ 28-ամյա որդու հետ վերջին անգամ զրուցել են հոկտեմբերի 20-ին, դեպքը տեղի է ունեցել հաջորդ օրը.  «Գեներալ Մակարյանի հրամանով տարել են Զանգելան, հիմա ասում են՝ վրիպում է եղել: Էջմիածնի քիմիկների զորամասից  է եղել: Հեշտ ձևով տարան երեխեքին գրաված տարածք, գիտեին, որ ամսի 20-ին տարածքը գրավված է:

Բերեք մեր երեխքին, տվեք մեզ»:

Տիկին Ալլան ասաց, որ ութ ամիս է երեխայից տեղեկություն չունի:

«Հարգելի ղեկավարներ լսեք  ձայնս՝ դուք մա՞րդ եք, թե՞  չգիտեմ ինչի ծնունդ եք»,- զայրացած  բղավեց անհետ կորած զինծառայողի մայրը:

Լրագրողի դիտարկմանը, թե հաճախ եք հանդիպել Փաշինյանի հետ, ի՞նչ էր ասում, տիկին Ալլան արձագանքեց. «Ոչ մի բան: Թող գնա ծնունդը նշի վարչապետը, չի էլ ամաչում, անշնորհք: Ամենաանշնորհք անձնավորությունն է: Կինը գնաց, ծնունդը նշեց հերիք չէ, հիմա էլ ինքն է գնացել նշի:

Աստված փրկել է մեր երեխաներին, ունենք նկարներ, վիդեոներ, ղեկավար եք, վեր եք ընկել աթոռին, մեր երեխեքին փրկեք, բերեք»:

Անհետ կորած զինծառայողների հարազատներից մեկն ասաց, որ կառավարություն չկա, ոչ մի քայլ չի անում, իրենց հույսը պետք է դնեն միայն իրենց վրա ու խնդրանքով դիմել են ՌԴ կառավարությանը, որպեսզի քայլեր անեն, իրենց երեխաներին վերադարձանեն:

«Էս հիմար կառավարությունը միայն խաբեությամբ է զբաղվում, ասեմ՝ սպառնալով:  Սպառնում են անհայտ կորածի ծնողին, անձամբ ինձ:  Մենք միասնական պետք է լինենք, մեր երեխաների  հարցը լուծենք»,- նշեց նա:

Ակցիայի մասնակցի խոսքով, 7 ամիս ոչ պաշտպանության նախարարությունից, ոչ զինկոմիսարիատներից ոչ մի ծնողի չեն զանգել ցավակցությամբ կամ որևէ տեղեկություն հաղորդելու երեխաների մասին, սակայն այս  վերջին երկու –երեք շաբաթն ակտիվացել են:

Ակցիայի մեկ այլ մասնակից նշեց. «Սրանք փուչիկի կառավարություն են, փորձում ես երեխուդ փնտրես, գտնես, անմիջապես մի հատ արգելք են դնում  խաղից հանելու համար, դրա համար մարդիկ  վախենում են: 7 ամիս խնդրեցինք բերեք, ո՞վ բերեց, ո՞վ տեղեկություն տվեց:

Գերիների ստույգ ցուցակ ունեն, խնդրեցինք պարոն վարչապետ կոչեցյալին հրապարակի, ինչո՞ւ չհրապարակեց: Թող հրապարակի՝ իմանամ իմ երեխան կենդանի է, թե ոչ»:

Երևանի թատրոնի և կինոյի պետական ինստիտուտի դասախոս, բեմադրիչ Դավիթ Հարությունյանն ասաց, որ հրատապ կարգով պետք է այս հարցին լուծում տան. «Առևտուր են սարքել՝ սա կտաք, սա կտանք, սա չեք տա, չենք տա: Պետք է ամբողջ դիվանագիտությունը, ռեսուրսները դրվեն ու մեր տղաներին հետ բերեն»: