Ձեր վստահելի աղբյուրը

«Այդպիսի արտահայտություններն անողները պատկերացում չունեն, թե ինչ է բանակը, ինչպիսին է եղել բանակի կայացման և զարգացման ամբողջ ընթացքը, չեն տիրապետում իրավիճակին, ավելին չհարգելով բնակի անձնակազմին, նրա հրամանատարներին, զինվորներին՝ նման արտահայտություններ են անում»,-պատասխանելով զինվորների կողմից կոնֆետներ ճանկռելու՝ Նիկոլ Փաշինյանի հայտարարության վերաբերյալ լրագրողի հարցին՝ «Հայաստան» դաշինքի քարոզրաշվի ժամանակ շեշտեց պաշտպանության նախկին նախարար Սեյրան Օհանյանը: 

Նման արտահայտությունները համարելով հարված սեփական բանակին՝ պաշտպանության նախկին նախարարն ասաց.«Մեր բանակը երբևիցե սոված չի եղել և այդ մասին առաջին հարցը կարող են ուղղել իրենց ընտրացուցակում ընդգրկված այն մարդկանց, որոնք երկար տարիներ զբաղվել են բանակի նյութատեխնիկական ապահովման խնդիրներով և համոզված եմ, որ նրանք էլ կարող են փաստել, որ բանակը երբևիցե սոված չի եղել: Բանակի զինվորը երբևիցե որևէ բան չի ճանկռել: Երեկ էլ, այսօր էլ և վաղն էլ բանակը մեր ծնողների ուշադրության կենտրոնում է: Յուրաքանչյուր զավակ իր ծնողի ուշադրության կենտրոնում է, և ծնողները ցանկանում են բանակի ապահովումից զատ ինչ-որ բանով աջակցել իրենց որդիներին:

Բանակի զարգացման խնդիրները, նպատակները ծագրերն այնպիսին են, որ տարիների ընթացքում զարգացում են ապրել և այսօրվա իշխանություններն այդ զարգացման պլանների հետ որևիցե կապ չունեն, նրանք ուղղակի ծանոթացել են այդ պլանների հետ: Բանակի թիկունքային ապահովումը աութսորսինգով իրականացնելու գաղափարը ծագել է դեռևս 2010-11 թվականին, երբ որ մենք ժողովրդագրական խնդիրներ ենք ունեցել: Նպատակն այն էր, որ թիկունքային ապահովումը տալ քաղաքացիական կազմակերպություններին, որպեսզի բանակի անձնակազմն զբաղվի հիմնականում մարտական խնդիրներով: Գոնե իմ նախարար եղած ժամանակահատվածում ամեն 6 ամիսը մեկ մենք կոնֆերանսներ ենք անցկացրել և սննդի բարելավում է եղել և՛ մշտական տեղակայման վայրում, և՛  մարտական հերթապահությունում: Ավելացրել ենք քաղցրավենիքները և այն սննդատեսակները, որոնք մարտական հերթապահության ժամանակ բարձրացնում են զգոնությունը, օրինակ՝ քաղցրավենիքը, թեյը սուրճը և այլն»:

Անդրադառնալով ՀՀ զինված ուժերում նախկինում կատարված ինժեներական աշխատանքների և սպառազինության ձեռք բերման վերաբերյալ հայտարարություններին՝ Սեյրան Օհանյանը հայտնեց.«Իմ համար անհասկանալի տոկոսներ են նրանք գրում՝ 20-ից մինչև 6000 %: Սա մանիպուլյացիա է՝ սեփական ժողովրդին մոլորության մեջ գցելու նպատակով: Ինչպես կարելի է ասել, որ առաջին գծի ինժեներական սարքավորումներն ավելացել են 200 տոկոսով, այսինքն 283 կիլոմետր սահման է եղել Արցախում, ստացվում է որ այս 27 տարվա աշխատանքները երեք տարվա ընթացքում ևս 283 կմ ինժեներական աշխատանքներ են կատարե՞լ: Սա մանիպուլյացիա է, որ իրենք իրականացնում են: Ակնհայտ է, որ զարգացման պլանի համաձայն նաև այս վերջին 3 տարիներին են գնումներ, համալրումներ իրականացվել, բայց հիմնականում զինամթերքի և որոշակի տրամաչափի հրետանային արկերի համալրում է եղել և պետք չէ այդ տոկոսային թվերով մեր ժողովրդին մոլորության մեջ գցել:

Երբ ես պաշտպանության նախարար էի, Նիկոլ Փաշինյանը խնդրել էր, որ գա ինձ մոտ, ես ընդունել եմ՝ ի տարբերություն իրեն, որ ես մեկ անգամ խնդրել էի, որ անվտանգության հարցերով առաջարկություն անելու համար ընդունելություն անի, այդպես էլ իրենք չընդունեցին, որովհետև ամեն ինչ գիտեին: Այն ժամանակ Նիկոլ Փաշինյանն ինձ հարց է տվել՝ թե ինչպե՞ս է ստացվել, որ ապրիլյան պատերազմից հետո առաջին գիծն ավելի շատ ենք կահավորել, քան նախկինում: Ես սեղմել եմ կոճակը և Արցախի Պաշտպանության բանակի հրամանատարին հարց եմ տվել՝ ինչո՞ւ եք դուք կուլ գնում ներկայիս իշխանության և քաղաքական թիմի, կամ ընդդիմության որոշ անդամների մանիպուլյացիաներին, հարց եմ տվել, թե քանի կիլոմետր հակատանկային փոս ունեք, նրանք պատասխանել են, որ կա 450 կմ հակատանկային փոս, ես ասել եմ, ձեր տվյալները ճիշտ չեն, իմ սեղանի վրա է տվյալներ, ըստ որի՝ դուք ունեք 483 կմ և հարց եմ տվել, թե քանի կիլոմետրն եք դուք կառուցել ապրիլյան պատերազմից հետո: Ինձ Նիկոլ Փաշինյանի ներկայությամբ պատասխանել են՝ 6.7 տասնորդական կմ: Համեմատեք 483 կիլոմետրը 6.7 կմ-ի հետ: Նաև հարցով պարզել եմ, որ դրանք կառուցվել են այնտեղ, որտեղ մարտական գործողություններ են տեղի ունեցել, նահնաջ է եղել և նոր մարտական դիրքեր են ստեղծվել: Միայն այս փաստը ցույց է տվել, որ իրենք այդ թվերն, արտահայտություններն անում են մեր ժողովրդին մոլորեցնելու համար, մեր բանակը եղել է, այսօր կա և եթե իրենք չլինեն իշխանության, բանակն ավելի արագ տեմպերով կվերականգնի իր երբեմնի համբավը:

483 կմ կահավորված առաջին գծում եղել են բազմաթիվ ինժեներական կառույցներ, որոնց լրացնում են ականապայթունային և ոչ ականապայթունային համակարգը՝ խրամատներ, բլինդաշներ, հակատանկային փոսեր, լարային արգելաբակոցներ և այդ 483 կմ-ից 2020թ. մոտավորապես 20 կմ-ում է ճեղքում եղել հակառակորդի կողմից, և եթե իրենք մեզ չեն հավատում, թող գնան իրենց ընկերոջ՝ նկատի ունեմ Ալիևի արտահայտությունը լսեն, որը կանգնել էր Ակնայի շրջանում և ցույց տվել, թե հայերը ինչպիսի անանցանելի ինժեներական կառույցներ են ունեցել: Սա ոչ թե ինքնաարադարացման համար եմ ասում, այլ ռեալ եմ ասում:

Նաև իմ համար զարմանալի է, որ բանակի այսօրվա հրամանատարության մեջ չի գտնվում  որևիցե մեկը, որը հակադարձի, որ երեք տարվա մեջ հնարավոր չէ կառուցել այնքան ինժեներական կառույցներ, որքան կառուցվել է 27 տարվա մեջ»: