Կարող են լինել վարձկաններ, որոնք կարող են նաև թաքնված լինել լրագրողի կերպարի տակ. Կարեն Անդրեասյան
«Լիլիան Գալստյանին անձամբ եմ ճանաչում, շատ ցավում եմ իր հետ կապված միջադեպով», - այսօր կառավարության ճեպազրույցների ժամանակ հայտնեց արդարադատության նախարար Կարեն Անդրեասյանը՝ պատասխանելով Panorama.am կայքի ֆոտոթղթակից Լիլիան Գալստյանի ԱԺ շենք մուտքը արգելելու դեպքին։
Նրա խոսքով՝ նույնիսկ ամենապրոֆեսիոնալ լրագրողը, եթե կարգ է խախտում, պետք է ենթարկվի պատասխանատվության՝ անկախ նրանից, թե ինչ բարձր առաքելությամբ է մարդը գործում։
Արդարադատության նախարարը հայտնեց, որ ազգային, պետական անվտանգության դեպքում աշխարհի ամենաքաղաքակիրթ պետություններում էլ լինում են սահմանափակումներ:
«Նաև հիշելով, թե ով էր Նաիրի Հունանյանը, որը լինելով լրագրող կարող էր ինչեր անել, մենք պետք է հասկանանք, որ լրագրությունը կամ խոսքի ազատությունը բացարձակ արժեք չեն և եթե անվտանգության մարմինները գտել են որոշակի ռիսկեր, ապա մենք պետք է այն հարգենք»,-կարծիք հայտնեց արդարադատության նորանշանակ նախարարը:
Ըստ Անդրեասյանի՝ աահմանափակումները պետք է արվեն, բայց դրանք չպետք է խանգարեն լրագրողների ողջամիտ աշխատանքին:
«Ազատ շարժի դեպքում կարող են լինել վարձկաններ, որոնք կարող են նաև թաքնված լինել լրագրողի կերպարի տակ և նույնիսկ այդպիսիններից պետք է պաշտպանվել, հետևաբար ես գտնում եմ, որ մենք պետք է ապավինենք անվտանգության մարմիններին»,-շեշտեց արդարադատության նախարարը, ինչին ի պատասխան լրագրողները վրդովմունք հայտնեցին որ չի կարելի իրենց համեմատել Նաիրի Հունանյանի հետ:
Պատասխանելով նախկին իշխանությունների կատարած քայլերին վերաբերող հարցին՝ Անդրեասյանը հավաստիացրեց, որ կարող է պատմել, թե իրավական և ոչ իրավական ուղղություններով ինչ են արել նախկինները, բայց չի ցանկանում խոսել անցյալի մասին և առաջարկեց կենտրոնանալ ապագայի վրա։
Անդրադառնալով քարոզարշավի ընթացքում վարչապետ Նիկոլ Փաշինյանի խոստացած վենդետաներ անելու կոչին՝ նախարարը շեշտեց, որ ժողովրդի պահանջն է, որ հանցագործները պատժվեն։
«Հանցագործների, բոլոր իրավախախտների հանդեպ խիստ վերաբերմունք և օրենքի պատասխանատու, պատժիչ արձագանք սպասվում է, դա խոստացվել է, դա ժողովրդի հենց պահանջն է, ես իմ կարողությունները ներդնելու եմ հենց հանցագործների և ապօրինությունների դեմ պայքարին»,-հայտնեց Անդրեասյանը։
Քարոզարշավի ընթացքում Փաշինյանի մուրճ ճոճելը նախարարը բացատրեց քաղաքական բանավեճի մեջ այլաբանություններ, սիմվոլներ, որոշակի չափազանցություններ օգտագործելու հավանականությամբ։
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան