Ձեր վստահելի աղբյուրը

«Վնասվածքներ եմ ստացել վզի, ձեռքերիս, ոտքերիս հատվածներում»,- ԱԺ-ում լրագրողների հետ զրույցում ասաց «Պատիվ ունեմ» խմբակցության պատգամավոր Աննա Մկրտչյանը։

Հիշեցնենք, որ նրան ԱԺ նիստերի դահլիճից պետական ծառայության մեծաթիվ աշխատակիցներ ուժով, մազերը քաշելով, քաշքշելով փորձեցին դուրս բերել ԱԺ-ից։

«Ֆաս հրահանգը ստանալուց հետո զինվորական համազգեստով մարդիկ, որոնք իմ, ձեր, Հայաստանի անվտանգության հետ կապ չունեն, որոնք Նիկոլի հոգեկան աշխարհը հանգստացնելու համար են, նրանց զենքերը, համզգեստը նրա համար է, որ Նիկոլ Փաշինյանը լրացուցիչ նոպաների մեջ չընկնի, այստեղ բազմաթիվ մարդկանց ներկայությունը մենակ դրա համար է»,- նշեց Աննա Մկրտչյանը։

Ընդդիմադիր պատգամավորն ինքնիրավչություն է որակում Ալեն Սիմոնյանի գործունեությունը, նշում է, որ նա անում է ամեն բան ընդդիմադիրներին լռեցնելու համար։

«Մի օր այս ամենին պետք է վերջ դրվի։ Այս մարդկանց առաջ դրված է պահանջ՝ ամեն գնով ապահովել ընդդիմադիրներին լռեցնելը։ Այդ ֆորմայով ախռանիկները լծված են այդ գործին»,- ասաց Մկրտչյանը։

Հանրապետական գործիչն ընդգծեց, որ Հայաստանի պատմության մեջ առաջին անգամ ԱԺ դահլիճում նստած են անվտանգության աշխատակիցներ՝ «Նիկոլի ախռանիկները»։

«Ինչի» համար են նստած, ակնհայտ է, կաշկանդելու, նրա հրահանգները կատարելու համար»,- ասաց նա։

Նա մանրամասնեց, որ ցանկանում էր հարց տալ «Նիկոլին» նրա ավելի վաղ արած հայտարարության մասին։

«Հարցազրույցներից մեկում ասաց՝ այնպիսի տեղեկատվություն ունի, որ կարող է մի քանի ժամում կարող է պայթեցնել Ադրբեջանի ողջ հասարակությանն ու ներքաղաքական այնպիսի ցնցումների առաջ կանգնեցնել, որ կարող է Ադրբեջանի քաղաքական դաշտը կպայթի։ Հիմա Արցախի օկուպացիայից հետո, ահաբեկիչ ադրբեջանցիների կողմից անվտանգային համակարգը խաթարելու, Ալիևի հայտարարություններից  հետո ինչի՞ն է սպասում, այդ տեղեկատվությունը աշխարհացունց հայտնեք ու պայթեցրեք Ադրբեջանի ներքաղաքական կյանքը»,- ասաց պատգամավորը։

Նա նշեց, մինչ այդ հարցը կհնչեցներ, հիշեցրել է, որ ԱԺ տարածքում կան անվտանգության աշխատակիցներ, որ «վարչապետի աթոռը զավթած Նիկոլն իրեն հարմար զգա», ապա ցանկանում էր ասել, որ Նիկոլ Փաշինյանն իր մեջ ուժ գտնի, հայտնի այդ տեղեկատվությունը, որպեսզի Ադրբեջանի ներքաղաքական կյանքը տրաքի։