Ձեր վստահելի աղբյուրը

«Այս իշխանությունները երեք թեմա ունեն՝ «հոկտեմբերի 27», «մարտի 1», Պողոոս Պողոսյան: Այսինքն քննարկում ենք երկրի ապագան, անելիքները, երկրի առջև կանգնած մարտահրավերները, իրենք շարունակ խոսում են նրանից, ինչից երեք տարի խոսում են»,- ԱԺ-ում լրագրողների հետ ճեպազրույցում ասաց ԱԺ փոխնախագահ Իշխան Սաղաթելյանը:

Նա նշեց, որ այս քաղաքական մեծամասնությունը որևէ կապ և առնչություն չունի մեր ժողովրդի  և պետության շահերի հետ:

Ի. Սաղաթելյանի խոսքով, շատ է խոսվում համագործակցության մասին. «Մենք շատ հստակ ասում ենք՝ սատանայի  հետ էլ կհամագործակցենք հանուն մեր պետության և ժողովրդի, սակայն սա չարիքի կառավարություն է: Այս պահին Հայաստանի ինքնիշխան տարածքի գլխավոր ճանապարհի մի հատվածի գտնվում է Ադրբեջանի հսկողության տակ, սրանք  եկել ու էլի «մարտի 1», «մարտի 1»»:

Ընդդիմադիր փոխխոսնակն ասաց, որ  իշխանությունը սադրանքներով  հասարակության ուշադրությունը շեղում է կառավարության բուն ծրագրից:

«Կառավարության ծրագրում շատ հստակ, անկեղծորեն նկարագրել են, որ մեր վրա հույս չդնեք, մենք գնալու ենք նոր կապիտուլյացիայի»,- ընդգծեց Ի.Սաղաթելյանը:

Խոսելով երեկ ԱԺ-ում տեղի ունեցած միադեպերի մասին, նա ասաց, որ «Հայաստան» խմբակցությունից 6-7 հոգի տարբեր վնասվածներ են ստացել:  Նրա խոսքով, երեկ տեղի ունեցածը ծրագրավորված էր:

«Իրենք ամեն ինչի ընդունակ ենք, իսկ ես իմ ընկերների հետ ամեն ինչի պատրաստ ենք»,- ասաց Ի.Սաղաթելյանը:

Նա համոզված է, որ այս խորհրդարանը երկար կյանք ունենալ չի կարող, քանի որ ամենակարևորն ու  գլխավորը՝ երկրում ստեղծված ճգնաժամը հաղթահարված չէ, ճգնաժամի պատճառը դեռ կա, հետևանքները վերացված չեն, գնալով խորանում են:

«Չի կարող այն իշխանությունը, որ իր պետության և ժողովորդի գլխին բերել է այսքան փորձանք,  երկար կյանք ունենա»,- ընդգծեց Իշխան Սաղաթելյանը: