Ձեր վստահելի աղբյուրը

Ֆրանսիայի իշխանություններն ակտիվորեն բարձրացնում են արմատական իսլամիզմի դեմ պայքարի տեմպերը և 2017 թվականից ի վեր երկրում փակել են նման քարոզչության 650 կենտրոններ: Այս մասին ասվում է համատեղ հարցազրույցում, որը ներքին գործերի նախարար Ժերալդ Դարմենենը և Ֆրանսիայի ներքին գործերի քաղաքացիության հարցերով պատվիրակ-նախարար Մառլեն Շյապան տվել են Le Figaro թերթին: Այս մասին գրում է Tass-ը։

«Երբեք Ֆրանսիայում կառավարությունը նման լայնածավալ միջոցներ չէր ձեռնարկել արմատական իսլամիզմի դեմ: Անցած չորս տարիների ընթացքում այդ տասնյակ միավորումները լուծարվեցին, ինչը երեք անգամ ավելի է, քան երկրում երկու նախորդ նախագահների օրոք: 24 հազար տարբեր ստուգումներ են իրականացվել, որի արդյունքում, բացի այդ, անցյալ տարվա նոյեմբերից ի վեր, ստուգվել են 89 պաշտամունքի վայրեր, որոնք կասկած են հարուցել հետախուզական ծառայությունների մոտ, և նրանցից մեկ երրորդն այժմ կամ փակվել է, կամ նրանց նկատմամբ միջոցներ են ձեռնարկվել, որոնք թույլ չեն տա երկրի համար վնասակար գործունեություն իրականացնել»,- ասել է ներքին գործերի նախարարության ղեկավարը:

Ըստ Մառլեն Շյապայի՝ իսլամիստական քարոզչության կենտրոնները փոխում են իրենց տեղն այն բանից հետո, երբ իշխանությունները սկսեցին ճնշում գործադրել մզկիթների և նույնիսկ սպորտային ակումբների վրա, որոնց միջոցով արմատական գաղափարներ էին տարածվում:

«Այժմ մենք հատուկ հսկողության տակ ենք վերցրել 15 քաղաքային թաղամասեր, որտեղ մարդիկ զբաղվում են այսպիսի գործունեությամբ սրճարաններում, տարբեր, ենթադրաբար բարեգործական ընկերություններում, իրականում՝ իսլամիստների գլխավորությամբ: Դրանք նաև մահմեդական գրականության խանութներն են, որոնք տարածում են սալաֆիական տեքստեր և հակասեմական գրքույկներ: Մեր թիրախի տակ են 175 նման հաստատություններ»,- ասել է Շյապան:

Ներքին գործերի նախարարությունում ստեղծվել է 20 հոգուց բաղկացած հատուկ խումբ, որը մոնիթորինգ է իրականացնում սոցիալական ցանցերում`ջիհադի և արմատական իսլամիզմի քարոզիչներին բացահայտելու և նրանց ուղերձները հանելու նպատակով:

Ժերալդ Դարմանենի խոսքով՝ իշխանությունները սառեցրել են արմատական իսլամիստներին մոտ կանգնած 205 միավորումների սեփականությունները:

«Մենք նաև միջոցներ ենք ձեռնարկում արմատական առաջնորդների դեմ, մասնավորապես, վերջերս երկու իմամների դեմ սկսվել է արտաքսման ընթացակարգը», - ասել է Ֆրանսիայի ներքին գործերի նախարարության ղեկավարը:

Նախարարը հավաստիացրել է, որ նախագահ Էմանուել Մակրոնի խոստումը՝ Ֆրանսիայում իսլամն ազատել արտաքին ազդեցությունից, «կկատարվի»:

«Ներկայումս Ֆրանսիայում կա 350 այսպես կոչված գործուղված իմամ: 2023 թվականին նրանք այլևս Ֆրանսիայում չեն լինի»,- ասել է Դարմանենը:

«Այս իմամները բոլորը արմատական իսլամիստներ չեն, բայց նրանք ծառայում են որպես խոսափող օտարերկրյա պետությունների համար։ Ֆրանսիայի օրենքների համաձայն՝ կրոնական կենտրոն ստեղծելու համար կարող ես լինել օտարերկրացի, բայց դրսից փող չես կարող ստանալ», - ասել է նախարարը: