ՀՀ երկրորդ նախագահ. Հիմք կա կարծելու՝ պատերազմը սկսել է տգիտության պատճառով, ավարտվել՝ ըստ պայմանավորվածության
ՀՀ երկրորդ Նախագահ, Արցախի առաջին նախագահ, «Հայաստան» դաշինքի ղեկավար Ռոբերտ Քոչարյանը լրագրողների հետ ընթացող հանդիպմանը շարունակում է անդրադառնալ Ղարաբաղյան երրորդ պատերազմի ընթացքի, պարտության, դրա հետևանքով ստեղծված իրավիճակի վերաբերյալ հասարակության մոտ առաջացած այն հարցերին, որոնց մինչ օրս իշխանությունների կողմից պատասխաններ չեն տրվել։
Հաջորդ տարածված ու պատասխան չստացած հարցադրումը, որին անդարադարձավ Ռոբերտ Քոչարյանը, այն է՝ ինչո՞ւ ենք պարտվել։
«Գիտեք պարտվում են պետությունները, ոչ թե բանակները։ Պետությունն է մոբիլիզացնում ամբողջ հնարավորությունները պատերազմում հաղթանակ տանելու համար։ Հենց դա է պատճառը, որ երկրի առաջին դեմքը պատերազմի ժամանակ դառնում է երկրի գլխավոր գերագույն հրամանատար, որ հնարավորություն ունենա մոբիլիզացնել ողջ ռեսուրսները՝ նյութական ու մարդկային։ Հայաստանում դա չարվեց։ Դա մեր ձախողման առաջին պատճառն է։ Մոբիլիզիացան ձախողվեց, ճիշտ հակառակը՝ բանակը համալրելու փոխարեն սկսեցինք զբաղվել ջոկատների ձևավորմամբ»,- ասաց ՀՀ երկրորդ նախագահը։
Նա հիշեցրեց, մինչ օրս անպատասխան են մնացել Մովսես Հակոբյանի մեղադրանքները, հնչեցրած փաստերը, անպատասխան են մի շարք այլ հանգամանքներ։
«Իշխանությունն այսօր ամեն կերպ խուսափում է իրենց համար ոչ հաճելի հարցերի պարզաբանումից։ Դուք բոլորդ լսել եք այն հրապարակային ելույթը, որով վարչապետի կողմից կոչ էր արվում հագնել զրահաբաճկոններ, ով տանն ինչ ունի վերցնի, դա ուղղակի ազդակ էր Ադրբեջանին, որ Հայաստանն այլևս ռեսուրսներ չունի, և կարելի է մեծացնել ռազմական ճնշումը Հայաստանի վրա։ Սա ուղղակի հանցագործություն է, առերևույթ հանցագործություն»,- ասաց նա։
Հաջորդ հարցը՝ ինչո՞ւ պատերազմը չկանգնեցվեց հոկտեմբերի 7-ին կամ 19-ին։
«Այս հարցը միակն է, որի պատասխանը հնչեց, այն հետևյալն էր՝ չենք կանգնեցրել, որ մեզ դավաճան չհամարեն։ Միակ հարցն է, որի վերաբերյալ հնչեց անկեղծ պատասխան։ Սրանից բխում է հետևյալը, որ բոլոր զոհված զինվորների ծնողները կարող են համարել, որ հոկտեմբերի 7-ից հետո բոլոր զոհերի մեղքը և պատասխանատվությունն այն մարդու վրա է, որը կարող էր պատերազմը կանգնեցել և չի արել, խուսափել է այդ ծանր, բայց պատասխանատու որոշում կայացնելուց։ Սա ևս փաստ է»,- ասաց նա։
ՀՀ երկորրդ նախագահ Ռոբերտ Քոչարյանն անդրադարձավ նաև այն հարցերին, թե ինչպե՞ս հանձնվեցին Շուշին, Հադրութը։
«Ջաբրայիլից մինչև Շուշի մի խրամատ չի փորվել, նույնիսկ փորձ չի եղել այդ ճանապարհին բնագիծ կառուցել։ Պարզաբանումներ չկան նաև հայտնի 5 մլրդի մասին, փաստ է, որ մինչև 2018 թվականը Ադրբեջանը փորձել է Ղարաբաղի դիմաց գումարներով ինչ-որ հարցեր լուծել, փաստեր կան, որ նման փորձեր արվել են նաև 2018-ից հետո։ Հարցը մնաց մութ։ Խուսափում են խոսել այդ հարցի շուրջ իշխանությունները։ Եվ սա ավելի մեծ կասկածներ է առաջացնում, ՀՀ յուրաքանչյուր քաղաքացի կարող է ունենալ դրա շուրջ հիմնավոր կասկած, մինչև դա չհերքվի։
Այստեղից բխում է հետևյալ հարցադրումը՝ մեր պարտությունը տգիտությա՞ն արդյունք է, թե՞ դավաճանության։ Չափազանց շատ են այն փաստերը, որոնք խոսում են հնարավոր պլանավորված պարտության մասին։ Եվ բոլորս իրավունք ունենք մտածելու, որ դա հենց այդպես է մինչև դա չհերքվի շատ լուրջ և խոր քննության ճանապարհով։ Այսպես ասեմ, փաստերի համադրումը հիմք է տալիս ասելու, որ պատերազմը սկսել է տգիտության, անկարողության, ապիկարության պատճառով, բայց ավարտվել է, ըստ պայմանավորվածության։ Այս ամենը առերևույթ հանցագործություններ են, և ակնկալում ենք, որ համապատասխան մարմինները պետք է զբաղվեն։ Գալու է ժամանակը, երբ բոլորը պատասխան են տալու այս ամենի համար, նաև նրանք, որ իրենց պաշտոնական դիրքից ելնելով պետք է զբաղվեին այդ հարցերով ու չեն զբաղվել»,- ասաց ՀՀ երկորրդ նախագահը։
Նրա համոզմամբ, առկա կասկածները փարատելու համար դրանք պետք է քննել ընդդիմության ակտիվ ներգրավմամբ։
«Յուրաքանչյուր այլ տարբերակ վստահությունը հանրության մոտ չի վերականգնելու։ Երկրում ճգնաժամը չի կարող վերականգնվել առանց այս ֆունդամենտալ հարցերի պատասխանների։ Երկրում կա մարդկային բավականին մեծ ներուժ, որոնք երբեք չեն հարմարվելու այս իրավիճակի հետ այնքան ժամանակ, մինչև չստանան այդ պարզաբանումները։ Սա փաստ է»,- նշեց Ռոբերտ Քոչարյանը։
Հարակից հրապարակումներ`
Լրահոս
Տեսանյութեր
«Տավուշը հանուն հայրենիքի» շարժման անդամները քայլերթով գալու են Երևան. Բագրատ Սրբազան
