Ձեր վստահելի աղբյուրը

«Մեղավորներն առաջին հերթին հենց իշխանություններն են, հիշենք, թե 2020 թ. ինչ հայտարարություններ էին անում՝ կորոնավիրուսը սովորական վիրուս է, թթի արաղով դեզինֆեկցիա կանենք, կանցնի կգնա»,- անդրադառնալով համաճարակի վերաբերյալ իշխանությունների արած սխալ ուղերձներին՝ ԱԺ-ում հայտարարեց «Հայաստան» խմբակցության պատգամավոր Արամ Վարդևանյանը:

Պատգամավորը պնդեց, որ նման հայտարարություներով իշխանություններն ամենամեծ հարվածն են հասցրել համաճարակի դեմ պայքարի կոմունիկացիոն ռազմավարությանը և մինչ օրս չեն ընդունում, որ սխալվել են:

Նա հայտնեց, որ կորոնավիրուսի դեմ պայքարը գործադիր իշխանության լիազորությունն է, իսկ ընդդիմությունը կարող է ընդամենը հորդորել, որ քաղաքացիները գնան պատվաստվեն:

«Ժողովրդի հետ հարկադրանքով չեն խոսում: Ի վերջո, մենք խոսում ենք այն իշխանութան մասին, որը միշտ ասում էր՝ իշխանությունը պատկանում է ժողովրդին, բա ոնց է այդ ժողովրդին ասում՝ կձերբակալենք, կկալանավորենք, թող փորձեն չպատվաստվել: Պետք է բացատրել՝ ինչի համար է պետք պատվաստվել»,- ասաց պատգամավորը:

Անդրադառնալով լրագրողի հիշեցմանը, որ Նիկոլ Փաշինյանը կառավարության նիստում հայտարարել է, որ ընդդիմությանը ձեռնտու է, որ համավարակից ավելի շատ մարդ մահանա՝ Վարդևանյանը նկատեց, որ լրագրողը ցիտում է մի մարդու, որը  հայտարարում էր՝ կարող էր մի քանի ժամում կազմալուծել Ադրբեջանը, հետևաբար՝ չի պատրաստվում նման պաշտոնյայի ասածները մեկնաբանել:

Պատգամավորը հայտնեց՝ չի մեկնաբանի մի մարդու, որը նոյեմբերի 9-ին հայտարարում էր, թե Շուշիի համար մարտեր են ընթանում, այն դեպքում, երբ այն օրեր առաջ արդեն հանձնվել էր թշնամուն:

Արամ Վարդևանյանը տեղեկացրեց, որ առաջիկայում շրջանառության մեջ են դնելու պաշտոնատար անձանց կողմից սուտ տեղեկություն տալն առհասարակ արգելելու օրենսդրական նախագիծ և պնդեց, որ պաշտոնյան կամ պետք է ճիշտն ասի կամ ընդհանարպես չխոսի:

Վարդևանյանը խայտառակություն և ոչ իրավաչափ որակեց Փաշինյանի այն հայտարարությունը, թե պետական համակարգում չպետք է լինեն չպատվաստվածներ:

«Հանրային ծառայողներին, ՀՀ բոլոր քաղաքացիներին պետք է հորդորել պատվաստվել, բայց ասել՝ եթե չես պատվաստվել, քեզ աշխատանքից պետք է հանենք, կամ ասել՝ ամեն մեկդ գլխով եք պատասխան տալու, արդեն ոչ միայն իրավաչափության սահմաններից է դուրս, այլև մուտք է գործում քրեաիրավական տիրույթ»,- հայտարարեց ընդդիմադիր պատգամավորը և պնդեց, որ դատախազությունն առնվազն պետք է դիտարկի այդ հայտարարության քրեաիրավական առնչության հարցը:

Պատասխանելով ՏԻՄ ընտրությունների վերաբերյալ հարցին՝ Վարդևանյանն ասաց, որ եթե իշխանության իրական խնդիրը լիներ համայնքները զարգացնելը, կոմունիկացիաները կատարելագործել, ապա դրանք կլինեին հանրային քննարկումներով, մասնագետների ներգրավմամբ, որոնք կներկայացնեին ծրագրեր:

Նա պնդեց, որ քննարկումներ չեն եղել, որովհետև այդ քննարկումները տևել են մի քանի օր, և այդ պայմաններում որոշվել է, որ 441 համայքններում միջամտություն է լինելու։

Անդրադառնալով Գորիսի ՏԻՄ ընտրությունների ժամանակ Առուշ Առուշանյանի կալանավորված լինելու փաստին՝ Վարդևանյանն ասաց, թե այն զրպարտչական հայտարարությունները, որ արվում են Առուշանյանի մասին, փաստում են, որ իշխանությունները լուրջ մտահոգություններ ունեն:

«Մենք գործ ունենք բռնապետությանը բնորոշ իրական պատկերի հետ: Մեր հայրենակիցներից շատերն ունենում են վախեր՝ իրենց բողոքն արտահայտելու, որովհետև տեսնում են, որ մարդկանց բերման են ենթարկում, քրեական հետապնդում են սկսում»,- հայտարարեց «Հայաստան» խմբակցության պատգամավորը և պնդեց, որ իշխանության ռեպրեսիվ մեքենան ինտենսիվ է աշխատում: