«Ծիծեռնակ» միության և Դանիել Թեմրեզյանի նախաձեռնությունները՝ Իտալիայում
Իտալիայի հյուսիսարևելյան Ֆրիուլի Վենետիկ Ջուլիա մարզի կենտրոնական մասում գտնող Ուդինե քաղաքում գործում է հայկական «Ծիծեռնակ» միությունը: Այն ստեղծվել է 2001 թվականին՝ նպատակ ունենալով տարածել հայկական պատմությունը, մշակույթը Իտալիայում: Այս տարիների ընթացքում միությանը տարբեր ծրագրեր, միջոցառումներ իրականացնելով փորձում է հասնել իր նպատակին: Մասնավորապես, Ուդինե քաղաքում, որտեղ մոտ 100 հայ է ապրում, արդեն բացվել է 1915 թվականի զոհերի հիշատակին նվիրված հայկական զբոսայգի:
Ուդինեում և Ֆրիուլի Վենետիկ Ջուլիա մարզի տարբեր քաղաքներում հայկական պատմությունն ու մշակույթը ներկայացնելու գործում մեծ դերակատարում ունի հենց «Ծիծեռնակ» միությունը, որի ղեկավարն է քանդակագործ Դանիել Թեմրեզյանը: Նրան այս գործում մեծապես աջակցում է միության փոխնախագահը՝ իտալացի Պաոլո Կորուբոլոն և մնացած բոլոր անդամները:
Panorama.am-ի հետ զրույցում Դանիել Թեմրեզյանը խոսելով իրենց առաջիկա ծրագրերի մասին՝ նշեց, որ ցանկանում են Ուդինեի կաթոլիկ եկեղեցիներից մեկում ամսվա մեջ մեկ անգամ հայկական պատարագ մատուցվի: Համաձայնությունը գրեթե կա, սակայն, նրա խոսքով, դեռ ընտրված չէ այն եկեղեցին, որտեղ կմատուցվի պատարագը մարզի հայերի համար:
Նա խոսեց իրենց մեկ այլ նախաձեռնության մասին: Ուդինեից 10 կմ հեռու գտնվող Պովոլետո քաղաքի այգիներից մեկը ստանալու է «Հայկական 24 ապրիլի» անվանումը: Այն բացվելու է 2021 թ. ապրիլի 24-ին: Դանիել Թեմրեզյանը նշեց, որ ցանկանում են այգում տեղադրել խաչքար: Նա հատուկ շնորհակալություն հայտնեց Պովոլետոյի քաղաքապետ Կաստենետո Ջուլիանոյին:
«Մեզ շատ են հարգում այստեղի մարդիկ, ճանաչում են, այդ պատճառով էլ մեզ տրամադրեցին այդ այգին: Մենք աշխատում ենք, ինչպես աշխարհի բոլոր հայերը, բարձր պահելու մեր Հայաստանի անունը»,- ասաց Դանիել Թեմրեզյանը:
Նա շատ է կարևորում, որ այլ երկրներում, քաղաքներում նման միջոցառումներ կազմակերպվեն, այդ դեպքում հայերի ձայնն ավելի բարձր կսլվի:
Դանիել Թեմրեզյանը հիշեցրեց, որ Ֆրիուլի Վենետիկ Ջուլիա մարզի տասնյակից ավելի քաղաքներ ճանաչել են Հայոց ցեղասպանությունը:
«Ծիծեռնակ» միության ղեկավարի խոսքով՝ իտալացիները ծանոթ են հայոց պատմությանը, գիտեն Հայոց ցեղասպանության մասին, սակայն շատ մակերեսային է նրանց ունեցած տեղեկատվությունը. «Մենք մեր ունեցած ողջ տեղեկատվությունը փորձում ենք հանդիպումների ժամանակ փոխանցել նրանց»:
Բացի հասարակական գործունեություն ծավալելուց, Դանիել Թեմրեզյանը նաև ճանաչված քանդակագործ է, նրա աշխատանքները ցուցադրված են Մադրիդում, Վենետիկում, Հայաստանում:
Նրա քանդականերից մեկում Թուրքիայի քարտեզն է, Արևմտյան Հայաստանի հատվածում թուրք է ներկայացված, ում ձեռքից արյուն է թափվում: Քանդակի լուսանկարը տպագրվել է մամուլում, որը թուրքերի շրջանում մեծ դժգոհություն է առաջացրել:
Դանիել Թեմրեզյանը նաև օգնում է, փորձում է կազմակերպել հայաստանցի արտիստների ելույթները Իտալիայում: Բլուլահար, շվիահար, ՀՀ վաստակավոր արտիստ Լևոն Թևանյանը 17 մենահամերգ է ունեցել Իտալիայում, և այս գործում մեծ դեր է ունեցել հենց Դանիել Թեմրեզյանը:
Նրա նպատակն է՝ հայկականը, հայ մշակույթի ու պատմության հետ կապված ամեն բան իր հնարավորությունների սահմաններում հասանելի դարձնել նաև իտալացիներին:
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ