Ձեր վստահելի աղբյուրը

«Հայաստան» խմբակցության պատգամավոր, Սիսիանի նախկին քաղաքապետ Արթուր Սարգսյանը Ազգային ժողովում աշխատելիս է եղել և լրատվամիջոցներից է իմացել, որ իրեն կալանավորելու որոշում է կայացվել:

«Ոչ ես, ոչ իմ փաստաբանները ծանուցված չենք եղել, որ այսօր նիստ կա։ Իմացել ենք, որ նոյեմբերի 12-ին նիստ կա, փաստաբանը միջնորդել է, որ այդ օրն ինքն այլ դատ ունի։ Երկու օրվա մեջ դատավորին փոխել են, և դատավոր է նշանակվել հանրահայտ Արմեն Դանիելյանը։ Կարծում եմ, որ էլ մեկնաբանությունների կարիք չկա, այսպես էլ պետք է լիներ։ Այս հետապնդումը քաղաքական է», - «Վարդաշեն» ՔԿՀ դիմաց  լրագրողներին ասաց Արթուր Սարգսյանը, ով անձամբ է ներկայանալ կալանավայր:

Նա նշեց՝ ոգին տեղն է, ոչինչ չի փոխվելու, թեկուզ, մի ամիս էլ նստի:

«Դեկտեմբերի 29-ին այս գործի վաղեմության ժամկետը լրանում է և դատախազի միջնորդությամբ ինձ պետք է բաց թողնեն։ Բայց, կարծում եմ, որ այս մեկ ամիսը իշխանությունների համար կարևոր է, որ ես լինեմ կալանքի մեջ», - ասաց Արթուր Սարգսյանը։

Կալանավորման հապճեպությունը, ըստ նրա, պայմանավորված է սահմանի իրավիճակի,  պաշտպանության նախարարի փոփոխության հետ։

«Իմ՝ ազատության մեջ մնալը խանգարում է այսօրվա իշխանությունների կատարելիք ծրագրերին»,- ասաց Արթուր Սարգսյանը։

Հիշեցնենք, որ «Հայաստան» խմբակցության պատգամավոր, Սիսիանի նախկին քաղաքապետ Արթուր Սարգսյանը հոկտեմբերի 14-ին  գրավի դիմաց ազատ էր արձակվել, ինչը բողոքարկվել էր Վերաքննիչ դատարան։ Դատավոր Արմեն Դանիելյանն այսօր  Արթուր Սարգսյանին  կրկին կալանավորելու որոշում է կայացրել։

Արթուր Սարգսյանի պաշտպան Էմիլ Խաչատրյանն ասաց, որ թեև չեն ծանոթացել դատական ակտին, բայց վստահ կարող է ասել՝ ապօրինի դատական ակտ է: 

«Բացի Վճռաբեկ բողոք ներկայացնելուց, մեր այլ իրավունքներից կօգտվենք, հնարավոր է նաև հաղորդում տանք հանցագործության մասին ակնհայտ ապօրինի դատական ակտ կայացնելու վերաբերյալ:

Ոչ ծանուցված ենք եղել դատական նիստի, օրվա մասին, որոշումը չենք ստացել: Դատավորը ջանք, իրեն չխնայելով՝ փորձել է կատարել այս ամեն ինչը»,- ասաց Է.Խաչատրյանը: 

«Հայաստան» խմբակցության պատգամավոր Արամ Վարդևանյանն ասաց, որ պատգամավորի կարգավիճակ ունի Արթուր Սարգսյանը և ուղևորվում է «Վարդաշեն» ՔԿՀ: 

«Բառերը չեն հերիքում բնութագրելու սրա աբսուրդի, խայտառակության աստիճանը: Ուզում եմ հասկանալ՝ ժողովրդավարության ինչ-որ տարր, Սահմանադրության ինչ-որ նշույլ պահպանվո՞ւմ է: Ես չեմ կարողանում գտնել: Խայտառակության ուրիշ նշաձող է: 

Այսպես չի եղել երբևէ: Նախկինում եղել են լուրջ, ծանր խնդիրներ, բայց այսպիսի վիճակ երբեք չի եղել: Գործող պատգամավորին դատավոր Արմեն Դանիելյանի մակարդալով բերել նորից կալանավորել, ախր...»,- ասաց Վարդևանյանը: