Ձեր վստահելի աղբյուրը

«Սա ոտնձգություն է լրատվության նկատմամբ և քիչ-քիչ մոտենում են այդ ոլորտի բոլոր աշխատողներին»,- ասուլիսում հայտարարեց «Ազգային անվտանգություն» կուսակցության նախագահ Գառնիկ Իսագուլյանի փաստաբան Աննա Ծառուկյանը՝ ներկայացնելով գործի մանրամասները:

Նրա խոսքով՝ Իսագուլյանն այսօր հետապնդվում է բացառապես բաց լրատավական աղբյուրներում առկա տեղեկատվությունը հավաքագրելու և որպես քաղաքական գործիչ գնահատական տալու համար, ինչը խոսում է հանցակազմի բացակայության մասին:

Ներկայացնելով գործի մանրամասները՝ Աննա Ծառուկյանը նկատեց, որ Վլադիմիր Կարապետյանի մասին տեղեկատվությունը, ինչի համար մեղադրվում է Իսագուլյանը, մեկ տարի շարունակ եղել է բաց, բայց Կարապետյանը զրպարտության հարցով նույնիսկ հայց չի ներկայացրել:

«Վլադիմիր Կարապետյանը, ենթադրաբար, գիտակցելով որ Արգիշտի Քյարամյանի հետ Իսագուլյանն ունի խնդիր, քանի որ նա ամբաստանվում է նաև անձնագրերի հետ կապված հայտարարությունների հիման վրա, և հենց այդ մարմնին դիմելով փորձ է արել այսպիսի հետապնդման հիմք ստեղծել»,- ներկայացրեց փաստաբանը: 

Պատմելով, որ դեկտեմբերի 21-ին բիրտ ձևով, մասկի-շոու կազմակերպելով, ուժայինները մուտք են գործել բնակարան, ձերբակալել Գառնիկ Իսագուլյանին, ում կինը ուշագնաց է եղել, և հենց ուժայիններն են շտապօգնություն կանչել՝ Աննա Ծառուկյանը նկատեց, որ նման քայլ է արվում մեկի հանդեպ, որը երբևէ չի հրաժարվել որևէ մարմնի կանչով ներկայանալ պահանջված վայր:

Փաստաբանը հայտնեց, որ բացարկ է ներկայացրել դատավոր Դավիթ Արղամանյանին (2018թ․ ցույցերում թմբուկ խփողին) գործող իշխանությունների հայացքներն ակնհայտ կիսելու համար, քանի որ նման կողմնորոշմամբ նա չի կարող քննել քաղաքական գործը, բայց այն մերժվել է:

Աննա Ծառուկյանը տեղեկացրեց՝ Դավիթ Արղամանյանն է գտել, որ Գառնիկ Իսագուլյանը Վլադիմիր Կարապետյանի՝ դավաճանության համար դիմել է ՌԴ Դաշնային անվտանգության ծառայությանը, ինչն էլ դրվել է մեղադրանքի հիմքում:

«Այսինքն՝ մենք գործ ունենք մարդկանց հետ, որոնք մտածում են, որ ՌԴ-ին հետաքրքրում է, թե ՀՀ-ում ո՞վ է ենթադրյալ լրտեսությամբ զբաղվել, կամ՝ չի զբաղվել»,- ասաց փաստաբանը:

Նա հայտնեց, որ այդ հիմքերով վերաքննիչ բողոք է ներկայացրել Վերաքննիչ դատարան, բայց այնտեղ էլ պաշտպանական կողմից զրկել են նիստերից:

Ըստ փաստաբանի՝ Վերաքննիչ դատարանում Իսագուլյանի խափանման միջոցի հարցի քննման մասին օրենքով 3 օրում պետք է տեղեկացնեին, ինչը չեն արել և մեկ ամիս հետո միայն դատական նիստ են գումարում, որը չի կայանում, քանի որ դատավոր Տիգրան Սիմոնյանը կորոնավիրուսով հիվանդ է և գործը վերամակագրվել է այլ դատավորի՝ Կարեն Բիշարյանին՝ Ռոբերտ Քոչարյանի գործով նախկին դատախազին:
 
Աննա Ծառուկյանը  տեղեկացրեց, որ այսօր զանգել է Վերաքննիչ դատարան և իմացել, որ Բիշարյանը նույնպես հիվանդ է կորոնավիրոսուվ: