Ձեր վստահելի աղբյուրը

ԱԺ «Հայաստան» խմբակցության պատգամավոր, Սիսիանի նախկին քաղաքապետ Արթուր Սարգսյանի համար սպասելի էր, որ Վերաքննիչ դատարանի դատավոր Ռուբիկ Մխիթարյանը չի բավարարելու Գորիսի քաղաքապետ Առուշ Առուշանյանի պաշտպանների բողոքը։

«Այս նույն դատավորը երկու օր առաջ կալանավորեց Քաջարան համայնքի ղեկավար Մանվել Փարեմազյանին»,-ասաց սյունեցի պատգամավորը։

Սարգսյանի խոսքով, երբ գործը մակագրվել է Ռուբիկ Մխիթարյանին, արդեն համոզվել են, որ Առուշանյանը կմնա կալանավորված, իսկ Փարամազյանը կկալանավորվի։

«Ես պնդում եմ, որ իմ ու իմ ընկերների նկատմամբ իրականացված հետապնդումները քաղաքական են։ Գործում ոչինչ չկա։ Սիրելի սյունեցիներ, Փարամազյանը, Առուշանյանն իմ ընկերներն են։ Մեր պայքարը շարունակվելու է՝ հանուն Սյունիքի։ Նրանց տեսակը չկոտրվող է»,-ասաց Սարգսյանը։

Անդրադառնալով Սյունիքի ընդհանուր իրավասության դատարանի դատավոր Բորիս Բախշիյանի կալանավորմանը՝ Սարգսյանը նշեց, որ Վերաքննիչ դատարանում իրեն՝ որպես մեղադրյալ ոչ ծանուցել են, ոչ խոսելու հնարավորություն են տվել։

«Ու այդ պայմաններում ինձ կալանավորել են։ Հիմա դատավոր Արմեն Դանիելյանը ինչո՞ւ կալանավորված չէ։ Եթե արդարություն կա, Բորիս Բախշիյանին արդարության հիմքով են կալանավորել, ապա Արմեն Դանիելյանն ինչո՞ւ կալանավորված չէ։ Հստակ փաստ եմ ասում»,-ասաց նա։