Ձեր վստահելի աղբյուրը

«Եթե ոչինչ չարտադրենք, դե իհարկե, մեզ գնաճային երկրաշարժեր են սպասվում»,- արձագանքելով կառավարության նիստում Նիկոլ Փաշինյանի այն հատարարությանը, թե Հայաստանին երկարշարժային գնաճ է սպասվում՝ ասուլիսում ասաց Ագրարագյուղացիական միավորման նախագահ Հրաչ Բերբերյանը, բայց և շեշտեց, որ այդպես չի լինի, քանի որ հայ գյուղացին աշխատող է, չնայած շատ հարցերում հիասթափված է կառավարությունից և չունի նախկին եռանդը:

Նրա խոսքով՝ Արցախում կորցրած հողատարածքներից Հայաստան էր գալիս շուրջ 100.000 տոննա հացահատիկ, և հիմա ստիպված ենք լինելու այն ձեռք բերել Ռուսաստանից, Ղազախստանից, Միացյալ Նահանգներից կամ Կանադայից:

Բերբերյանը հիշեցրեց, որ գործում է նաև միջազգային ցորենի բորսան և ժամանակին նավերով Հայաստան ներկրվել է բորսայի ցորենը, որը երբեմն ավելի մատչելի գների է լինում, բայց Ռուսաստանը Հայաստանին բավարար է:

Բանախոսը տեղեկացրեց, որ եթե նախկինում 90% ցորեն էր ներկրվում Հայաստան և 10% ալյուր, ապա այսօր նույն համամասնությամբ ճիշտ հակառակն է՝ հիմնականում ալյուր է ներկրվում, որը համարեց սխալ, քանի որ ալրաղացներում աշխատատեղեր են կրճատվել:

Մասնագետը պնդեց, որ Հայաստանը ցորենի խնդիր չի ունենա, եթե միջազգային գները չբարձրանան և կարծիք հայտնեց, որ Ուկրաինան չի կարող ազդել դրանց վրա:

Ըստ Բերբերյանի՝ Ուկրաինան Հայաստանի վրա կարող է ազդել եգիպտացորենի և անասնակերի բազաների ձևավորման հարցում:

Նա գտնում է, որ կարելի է ստեղծված իրավիճակից օգտվել և բերեց նախորդ տարվա օրինակը, երբ ՌԴ-ում և Իրանում կարտոֆիլի բերքը լավը չէր և Հայաստանից 40 հազար տոննա կարտոֆիլ արտահանվեց, իսկ այն արտադրող ֆերմերներն այսօր վարկի կարիք չունեն:

«Աշխարհում բոլոր ֆերմերները վարկի կարիք ունեն, բայց փոխանակ ֆեմերը պետության սուբսիդիան ստանա, Հայաստանում սուբսիդիան ստանում են բանկերը»,- ասաց բանախոսը:

Անդրադառանալով Հայաստան պարարտանյութ ներկորղներին սուբսիդավորելու մասին էկոնոմիկայի նախարար Վահան Քերոբյանի հայտարարությանը՝ Բերբերյանն ասաց. «Ընկեր, փոխանակ գյուղացուն սուբսիդավորես, դու գնացել առևտրականին ես սուբսիդավորում, որը շահույթ է հետապնդում: Կարծում եմ, որ կառավարությունում կան մարդիկ, որոնք դեռ պարտբիլետները, կոմսոմոլի տոմսերը պահել են գրպաններում և դեռ իրենց մտածելակերպը չեն փոխել, որ այս երկիրը ժողովրդինն է, ոչ թե իրենցը և պետք է աշխատել ժողովրդի համար: Հստակ եմ ասում, որ լավ ման գաք, նրանց գրպանում կոմսոմոլի տոմսերը կգտնեք»:

Ագրարագյուղացիական միավորման նախագահը ենթադրեց, որ գործադիրն այդ քայլին է գնացել՝ մտածելով, որ 10 բանկի հետ ավելի հեշտ կլինի աշխատելը, քան 200 հազար ֆերմերների հետ:

«Եթե գյուղատնտեսության մասին եք մտածում՝ պետք է վստահեք արտադրողին, այլ ոչ թե Չալոյի թիմին, որն անկապ բաներ պետք է անի, որը կապ չունի գյուղատնտեսության հետ»,- հայտարարեց Հրաչ Բերբերյանը՝ նկատելով, որ եթե ոլորտում բանիմաց մարդիկ լինեին, ապա աշնանը 20-30 հազար տոննա պարարտանյութ կուտակած կլինեին, որի արժեքն այն ժամանակ 6 հազար դրամ էր, իսկ հիմա 18-20 հազար դրամ է:

Շեշտելով, որ բանիմաց գործադիրը կաշխատեր նաև Իրանի հետ, որտեղ պարարտանյութի արտադրություն կա, բայց այն նույնպես չի արվել՝ բանախոսն ասաց. «Երկրի վաղվա օրվա մասին չեն մտածում»: