Ձեր վստահելի աղբյուրը

«Ընկերս գեղեցիկ ծաղկավոր զգեստ էր նվիրել, Wildberries-ով պատվիրել էր, եկել էր,բայց քանի որ ևս 2 զգեստ կար, սպասում էի, ամբողջը գա, նոր գնամ վերցնեմ, հետո սկսվեցին Wildberries-ի խափանումները ու կարծեցի, թե վերջ, նվերներիցս հույսս պիտի կտրեմ, բայց ամենահաս համացանցում հուշեցին պարզապես մոտենալ այն կետը, որից պիտի ստանայի, ասեմ ընկերոջս հեռախոսի համարի վերջին թվերն ու որոշ անձնագրային տվյալներ և ստանալ առաքանիս։ Եվ երևի ուրախ դեմքիցս արդեն հասկանում եք, որ վերցրել եմ»,-Wildberries-ի Ազատության պողոտայում տեղակայված խանութի մուտքի մոտ Panorama.am-ի հետ զրույցում պատմեց Սուսաննան, ով փաթեթները ձեռքին հեռանում էր։

Գյումիրում ևս մարդիկ ստանում են իրենց առաքանիները.«Ծնողներիս  համար մոտ 50 հազար դրամի պատվեր ունեի, երեկ մայրս ուղղակի մտել է գրասենյակ, հեռախոսիս համարն ասել, կայքում գրանցված անուն-ազգանունս են հարցրել և պարզել, որ պատվերիս 90 տոկոսը եկել է, տվել են։10 կտոր ապրանք են տվել երեկ։Ընդ որում դրանցից մեկն այս օրերին եմ պատվիրել, երբ կայքում ոչ բոլոր ֆունկցիաներն էին հասանելի։ Նրանք նաև ծրագրով ստուգել են, թե երբ կգա մնացածը, դա էլ են ասել։ Շատ ուրախ եմ»,-մեզ հետ զրույցում նշեց Արմինեն։

Խուճապային տրամադրությունները ցրում են նաև աշխատակիցները, իրենց առաքումների հետևից եկած մարդկանց նրանք հանգստացնում են՝ «Կայքն ու հավելվածը 2 օրից կաշխատեն բնականոն հունով»։

Ֆեյսբուքի հայկական տիրույթի ամենամեծ ու քննարկվող խմբում ևս Wildberries-ի աշխատակից ներկայացած օգտատերեը փորձում են օգտակար լինել:

Այսպես՝ Wildberries  Wildberriesը գրառում է արել .«Քանի որ այս օրերին շատ են Wildberries-ի հետ կապված հարցերը փորձեմ անդրադառնալ կարեւոր մի քանի կետի՝

1.Եթե դուք արել եք պատվեր եւ այն չի երեւում Ձեր անձնական էջում՝ մի անհանգստացեք, Ձեր պատվերը ոչ մի տեղ չի կորչի, այն անպայման կհասնի Ձեր նշված մասնաճյուղ։
2.Եթե Ձեր պատվերի ժամանումը Ձեզ մոտ չի արտացոլվում, սակայն ժամկետով պետք է որ հասած լիներ կարող եք մոտենալ մասնաճյուղ,նշել Ձեր անուն ացգանունը եւ ստուգել պատվերի կարգավիճակը։
3.Եթե Ձեր պատվերը մասնաճյուղում է նշում եք Ձեր անուն ազգանուն եւ հեռ. առաջին երեք թվերը - «օր.՝ (093)100200» ասում եք Անուն Ազգանուն 100 եւ ստանում եք Ձեր պատվերը։
Հ.Գ. Եթե կլինեն հարցեր սիրով կպատասխանեմ
Բոլորիս հաճելի գնումներ։

Եվ նա մի քանի ժամվա մեջ պատասխանել է մոտ 270 հարցի։

(գրառման պատճենը տեղադրվել է օգտատիրոջ համաձայնությամբ)

Շատ արագ թարմացումներ է հրապարակում նաև Wildberries-ի թելեգրամյան ալիքը, որում երեկ նշվել էր, որ այսօր առավոտյան օգտատերերի  մոտ 65 տոկոսի մոտ  վերականգնված կլինի առաքումների մասին տեղեկատվությունը և  հասանելի կլինի իրենց պատվերների տեղաշարժի մասին տեղեկատվությունն ու QR կոդը։

Խիստ անհանգստանալու կարիք, կարծես թե, դեռ չկա, բայց ի՞նչ էր եղել։ Նախօրեին «Լենտա.ռու»-ն գրել էր, թե հնարավոր է, որ հաքերային հարձակում է եղել։ Մասնավորապես Ալեքսեյ Լուկացկին ասել էր.«Շրջանառվող տեղեկատվության համաձայն, գաղտնագրիչը հնարավոր է ներխուժել է Wildberries ծառայության ներքին համակարգ, ոչնչացրել է դրա ամբողջ ենթակառուցվածքը, ներառյալ բոլոր տվյալների կրկնօրինակները։ Եթե ​​ընկերությունը չունի պահուստային պատճեններ, իսկ հաքերներին փրկագին վճարելով դրանք ետ վերցնեը անհնար է, ապա տվյալները կարող են վերականգնվել միայն թղթաբանությամբ, հաշվապահություն դիմելով և ֆինանսական հաշվետվությունների միջոցով... դա արագ ընթացակարգ չէ»։

Նա նաև զգուշացրել է, որ օգտատերերի տվյալները. կարող են կորել կամ անհասանելի լինել շատ երկար ժամանակ:

Wildberries -ի Թելեգրամյան ալիքում, սակայն այս լուրերը հերյուրանք են  որակվում և վստահեցնում են, որ իրենց ՏՏ ենթակառուցվածքները չեն տուժել։ Նման կարծիք հայտնող փորձագետներին ընկերությունում մեղադրում են իրավիճակը շահարկելու և իրենց վրա ուշադրություն հրավիրելու փորձերի մեջ. «ՏՏ ենթակառուցվածքի ոչնչացման և ընկերությունում բեքէնդի  ու ֆրոնթէնդի կորստի մասին մեկնաբանությունները  «վերլուծաբանների» ենթադրություններն են։ ՏՏ ենթակառուցվածքը չի տուժել, ընկերությունն ունի բոլոր անհրաժեշտ տվյալները՝ իր լիարժեք աշխատանքը վերականգնելու համար, օգտատերերի անձնական և ֆինանսական տվյալները ապահով կերպով պաշտպանված են»։




Հիշեցնենք, որ Wildberries առցանց ռուսական խանութն արդեն մի քանի օր է՝ խափանումներով է աշխատում։ Ծրագրի օգտատերերը դժգոհում են, որ համակարգն իրենց անձնական հաշիվները չի ճանաչում, ցույց չի տալիս, թե որտեղ են հասել գրանցված պատվերները։

Ընկերությունն այս խնդիրը զուտ տեխնիկական էր որակում, մարտի 15-ին տարածած հաղորդագրության մեջ նշվում էր. «Մարտի 14-ին ընկերության բջջային հավելվածների և կայքի աշխատանքներում տեխնիկական սխալներ են գրանցվել։ Մեր փորձագետները վերացրել են դրանց ավելի քան 70%-ը. բջջային հավելվածներում պատվերներն ու վճարումները կատարվում են սովորականի պես։ Մնացած բոլոր սխալները շուտով կշտկվեն:

Հարկ է նշել, որ մեր օգտատերերի անձնական ևֆինանսական տեղեկատվությունը չի տուժել. բանկային քարտի տվյալները ապահով կերպով պաշտպանված են՝ համաձայն Payment Card Industry Data Security Standard-ի (PCI DSS), որը մշակվել է վճարումների ոլորտում առաջատար միջազգային խաղացողների կողմից»։

Մարտի 16-ին տարածված հաղորդագրության մեջ էլ նշվում էր, որ  Wildberries-ի տեխնիկական մասնագետները վերացրել են բջջային հավելվածների և կայքի աշխատանքի խափանումների ավելի քան 90 տոկոսը։ Մնացած տեխնիկական խնդիրները մոտ ապագայում կվերացվեն։

Հավելենք նաև, որ Wildberries-ը ներքին կայքի և հավելվածների աշխատանքում խափանումների հետաքննություն է սկսել։Հետաքննության արդյունքներով նյութերը կփոխանցվեն իրավապահ մարմիններին։ Ընկերությունը միջադեպի մասին տեղեկացրել է նաև կարգավորող մարմինների ներկայացուցիչներին։