Ձեր վստահելի աղբյուրը

ՌԴ ԱԳՆ պաշտոնական ներկայացուցիչ Մարիա Զախարովան ապրիլի 13-ին կայացած ճեպազրույցում անդրադարձել է ԵՄ դերին Լեռնային Ղարաբաղի հակամարտության կարգավորման գործում։Ստորև՝ ՌԴ ԱԳՆ մամուլի ծառայության տարածած սղագրությունը՝ հարց ու պատասխանի:

Հարց.- Հիմա ԵՄ-ն փորձում է իր վրա վերցնել ղարաբաղյան հակամարտության կարգավորման դերը։ Դա է վկայում նախորդ շաբաթ Բրյուսելում կայացած հանդիպումը: Ինչպե՞ս է Մոսկվան վերաբերվում Արևմուտքի նման նախաձեռնությանը։ Բրյուսելն օգնո՞ւմ է Մոսկվային, թե՞ դուրս է մղում նրան Բաքվի և Երևանի հարաբերությունների կարգավորման հարցում։

Պատասխան.- Մենք ելնում ենք նրանից, որ հայ-ադրբեջանական հարաբերությունների կարգավորման գործընթացի հիմքում ընկած են Ռուսաստանի, Ադրբեջանի և Հայաստանի ղեկավարների միջև 2020 թվականի նոյեմբերի 9-ի, հունվարի 11-ի և 2021 թվականի նոյեմբերի 26-ի եռակողմ համաձայնագրերը։Այս տարվա ապրիլի 9-ին էլ  Ռուսաստանի Դաշնության նախագահ Վլադիմիր Պուտինն իր գործընկերների հետ Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի հետ քննարկել է դրանց իրականացմանն առնչվող հարցերի ողջ շրջանակը։ Այս թեման եղել է ապրիլի 8-ին Մոսկվայում ՌԴ ԱԳ նախարար Սերգեյ Լավրովի և Հայաստանի արտգործնախարար Արարատ Միրզոյանի բանակցությունների, ինչպես նաև Ադրբեջանի արտգործնախարար Ջեյհուն Բայրամովի հետ հեռախոսազրույցի առանցքում։

Այս շփումների ընթացքում, մասնավորապես, արծարծվել են հայ-ադրբեջանական սահմանի դելիմիտացիայի, Հարավային Կովկասում տրանսպորտային կապերի ապաշրջափակման և Ադրբեջանի և Հայաստանի միջև խաղաղության պայմանագրի կնքման հարցերը։

Ռուսաստանը կշարունակի ամեն կերպ աջակցություն ցուցաբերել Բաքվի և Երևանի միջև հարաբերությունների կարգավորմանը։ Ինչ վերաբերում է ԵՄ-ի դերին, Սերգեյ Լավրովը բոլոր գնահատականները տվել է այս տարվա ապրիլի 8-ին Արարատ Միրզոյանի հետ բանակցությունների արդյունքներին հաջորդած ասուլիսում։