Ձեր վստահելի աղբյուրը

«Մենք այսօր առաջին անգամ շրջափակել ենք պետական շենքերից Երևանի քաղաքապետարանը։ Հերթով նման կառույցները շրջափակելու ենք, արգելափակելու ենք և հասնելու ենք նրան, որ երկրում ստեղծվի լիարժեք երկիշխանություն»,- Ֆրանսիայի հրապարակում հանրահավաքին ասաց ՀՅԴ ԳՄ ներկայացուցիչ Իշխան Սաղաթելյանը։

Նա նշեց, որ այս օրերին Հայաստանում պայքարին զուգահեռ բուռն քայլեր ու գործողություններ են տեղ ունենում սփյուռքում։

«Առաջին օրվանից հայտարարել ենք, որ սա համահայկական և համազգային դիմադրություն է։
Նիկոլ, տեսար ոնց դիմավորեցին քեզ Նիդերլանդների մեր հայրենակիցները։ Ողջ հայ ժողովուրդն է այդպես բնութագրում ու մտածում քո մասին, պարզապես Հայաստանում ման ես գալիս ավտոշարասյուներով, պաշտպանվում ես ոստիկանական բազմաթիվ շերտերով և չես տեսնում մոտիկից՝ ինչ է մտածում ժողովուրդը քո մասին։

Տղա ես, մտիր ժողովրդի մեջ և ողջ պերճանքը կզգաս՝ ինչ է ասում ժողովուրդը քո մասին»,- ասաց ընդդիմադիր գործիչը՚

Նա ընդգծեց, որ այս պայքարն անկասելի է, Հայաստանը չի թուրքացվելու, Արցախը երբեք Ադրբեջանի կազմում չի լինելու։

Սաղաթելյանի խոսքով, այս օրերին իրենց բերած փաստարկներին, ասելիքին, պայքարին որևէ հակադրություն չկա բացառությամբ այն, որ իրենք դեմ են խաղաղության օրակարգին։

«Սրանք շարունակում են վախեցնել մեր ժողովրդին, որ եթե իրենք չլինեն, պատերազմ է լինելու։ Սրանք շարունակում են Ալիևով վախեցնել ձեզ։ Նիկոլի վերջին հույսն Ալիևն է ու Ալիևի հետ  պայմանավորված սադրանքները։ Չի լինելու, մեզանից լավ խաղաղության գինը ոչ մեկ չգիտի, մենք շարունակ պայքարել ենք այդ խաղաղության համար, բայց խաղաղություն ունենալու համար պետք է ունենալ ուժեղ և մարտական բանակ, պետք է այդ խաղաղությունը պարտադրենք։ Տարբեր խոսակցություններ են պտտվում, այս ամբիոնից հայտարարում եմ՝ մենք մեծապես կարևորում ենք ռուս խաղաղապահ զորքերի առաքելությունը Արցախում»,- ասաց Սաղաթելյանը։

Նա անդրադարձավ Առողջապահության համաշխարհային կազմակերպության ահազանգին. «Մի շատ ցավոտ թեմայի մասին եմ ուզում խոսել, բայց պետք է խոսեմ, որպեսզի նրանց համար, ում դեռ այս իշխանության դեմքը հայտնի չէ, ավելի պարզ դառնա։ Առողջապահության համաշխարհային կազմակերպությունն իր հերթական զեկույցում ահազանգել է, որ Հայաստանում կովիդ 19-ի հետևանքով ավելցուկային մահերի վերաբերյալ տվյալներն ուռճացված են։ Պարզվել է, որ այս սրիկաների կառավարությունը պատերազմում զոհված մեր տղաներին ներկայացրել է որպես կովիդից մահացածներ։ Սրանց սրիկայությանը չափ ու սահման չկան։ Էս են սրանք, սրանք չունեն սրբություն, հայրենիք, որևէ կարմիր գիծ և ամեն ինչ փորձել էլ անել ու անում են հանուն իրենց աթոռի։ Թույլ չենք տալու, սրանց  միասին վռնդելու ենք»։

Նրա խոսքով, այս իշխանությունները մտածում էին՝ կհոգնեն, կհիասթափվեն, մի քանի հավաք, երթ, ցույց կանեն, կպառակտվեն,  կգնան տներով ու իրենք կշարունակենք հայրենիքը հանձնել։

«Չի լինելու, այս ազգը ոտքի է կանգնել։ Մենք ձեր յուրաքանչյուրի առջև պատասխանատվություն ունենք։ Ժողովուրդ, գնալու ենք մինչև վերջ՝ հետ քայլ չկա, նահանջ չկա»,- ասաց Իշխան Սաղաթելյանը։

Խոսելով վաղվա անելիքների մասին՝ նա հայտարարեց, որ առավոտվանից կրկին շարունակում են բողոքի անհնազանդության ակցիաները, պետք է ավելացնել ակցիաների քանակն ու մասնակիցների թիվը։

«Վաղը շարունակվում են ավտոերթերը։ Երթերից հետո քաղաքի տարբեր հատվածներում կլինեն ակցիաներ,  16։00-ին հավաքվում ենք կրկին այս հրապարակում հերթական կարևոր գործն անելու»,- տեղեկացրեց նա։

Սաղաթելյանն ասաց, որ այսօրվանից սկսած այն ազատ ժամերին, երբ կոնկրետ քայլեր ու գործողություններ չունեն, այս հրապարակի տարբեր հատվածում հասարակության տարբեր շերտերի ներկայացուցիչներին՝ բժիշկներ, մշակութային գործիչներ, ուսուցիչներ, դասախոսներ, հատկացնելու են տեղեր  տարբեր թեմաների, ծրագրերի, անելիքների մասին խոսելու։

«Դիմում եմ Հայաստանի քաղաքական ուժերին, մտավորականներին, ուսանողներին, դասախոսներին, զինվորականներին՝ սա բոլորիդ հարթակն է, եկեք, մասնակցեք, մեր պայքարը ընդլայնենք ու գնանք հաղթանակի»,- նշեց Իշխան Սաղաթելյանը։