Ձեր վստահելի աղբյուրը

«Ես գիտեմ, թե մեր քաղաքացիների մեծ մասի արձագանքն ինչպիսին է այս նախագծին և ես հատուկ եմ որոշել, որ այս հարցը պետք է կառավարության նիստում զեկուցենք և քննարկենք»,-գործադիրի այսօրվա նիստում հայտնեց Նիկոլ Փաշինյանը՝ Սահմանադրական և Վճռաբեկ դատարանների դատավորների աշխատավարձրի բարձրացման նախագծի վերաբերյալ:

Արդարադատության նախարարի տեղակալ Գրիգոր Մինասյանը զեկուցեց ««Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ և փոփոխություն կատարելու մասին» և ««Պաշտոնատար անձանց գործունեության ապահովման, սպասարկման և սոցիալական երաշխիքների մասին» օրենքում լրացում կատարելու մասին» օրենքների նախագծերը:

Փոխնախարարի խոսքով՝ նախատեսվում է Սահմանադրական դատարանի դատավորի, փոխնախագահի և նախագահի հավելավճարը սահմանել 80 %-ի չափով, իսկ Վճռաբեկ դատարանի դատավորների համար սահմանել պաշտոնային դրույքաչափի 50 %-ի չափով հավելում:

Գրիգոր Մինասյանը հայտնեց, որ որպեսզի նախագծի ընդունման արդյունքում ՍԴ դատավորների կենսաթոշակի չափն իր հերթին զգալիորեն չտարբերվի մյուս ատյանի դատավորների կենսաթոշակի չափից, ապա պաշտոնատար անձանց գործունեության ապահովման, սպասարկման և սոցիալական երաշխիքների մասին օրենքում էլ նախատեսվել է կարգավորում, ոով եթե դատավորի համար սահմանված հավելավճարի չափը գերազանցում է պաշտոնային դրույքաչափի 30 %-ը, ապա կենսաթոշակի հաշվարկի մեջ ընդգրկվելու է հավելավճարի գումարի միայն 30 %-ը:

«Մենք այս որոշումները կայացնում ենք ոչ թե հանուն դատավորների, այլ հանուն այն քաղաքացիների, ովքեր առչնվում են այդ դատարանների հետ, քանի որ արդարությունը րպատշաճ արդարադատությունն ամենակարևոր հնարավորությունն է, որ երկրում պետք է ունենանք։ Սա ունի սոցիալական, քաղաքական, իրավական նշանակություն, և հետևողականորեն պետք է գնանք այս ճանապարհով, քանի որ ուզում ենք, որ Հայաստանում լինի այնպիսի դատական համակարգ, որը, պայմանականորեն ասած, նայում է մարդկանց աչքերին, ոչ թե մարդկանց ձեռքերին:

Երբ ասում ենք, որ երկրում ուզում ենք լինի անկախ դատական համակարգ, դա ձև չէ, դա քաղաքական կարգախոս չէ, դա համոզմունք է, ցանկություն, նպատակ, որին մենք հետևողականորեն պետք է հասնենք»,-իր հերթին աշխատավարձի բարձրացումն հիմնավորեց Նիկոլ Փաշինյանը: