Ձեր վստահելի աղբյուրը

«Համաշխարհային մի երևույթ կա, որ ամբողջը մանրանում է, դառնում է  սպառողական։ Ընդհանրապես, համաշխարհային մտավորականության, գիտական ներուժի մանրացում է տեղի ունենում»,- ասուլիսում ասաց ռեժիսոր, «Հրանտ Մաթևոսյան» հիմնադրամի տնօրեն Դավիթ Մաթևոսյանը։

Նրա խոսքով, մտավորականությանը փորձում են  համոզել կամ դնել  մի նիշայի մեջ, որպեսզի նա հենց քաղաքականությանը ու երևի տնտեսական կյանքին չխանգարի, չխառնվի։

«Դա հենց ամենամեծ մարտահրավերն է, այսինքն ակնհայտ կռիվ չկա, փորձում են  լուսանցքայնացնել և այդպիսով ինքն իր համար լինի, իրենք իրենց համար և  աշխարհն այդպես առաջ գնա։

Կարծում եմ, քանի որ «ոգու սովը»,  ձևակերպված Ավետիք Իսահակյանի կողմից, պարբերաբար մեր դուռը ծեծում է, այսօր էլ ոգու սովի խնդիր ունենք։ Կարծում եմ՝ շանս կա, որ այդ մտավորականությունն աշխարհում դարձյալ պայծառ մտքով, պայծառ խղճով իր տեղը գրավի ու կարողանա  հետ պահել աշխարհն այն հոգևոր կործանումից, որը մեր դուռն այսօր ծեծում է»,-ասաց Դավիթ Մաթևոսյանը։

Ռեժիսորի խոսքով, Հայաստանն այսօր կոնկրետ մարտահրավերներ ունի. «Պառլամենտական ընդդիմությունն ու ընտրյալ իշխանությունն իրենց համար Հայաստանում ստեղծել են մի միջավայր, որտեղ  կան միայն իրենք, ամեն ինչ անում են, որ որևէ առողջ ուժ Հայաստանում ասպարեզ չմտնի։

Ամբողջ  հռետորաբանությունն իրենցն է, բոլոր լոզունգներն իրենցն են, ծեծի, պատժելու, հակառակ ուղղությամբ ծեծի և պատժելու ամբողջ մեխանիզմն իրենցն է։ Այսինքն դաշտը մերն է, մենք ենք այստեղ։ Դրանից հետո զարմանալ, որ մարդիկ չեն միանում իրենց պայքարին… Ինչո՞ւ պետք է  միանան մարդիկ, եթե չեն հավատում որևէ մեկի խոսքին։

Ձեր ուղերձները, պարոնայք, լինեք դուք իշխանություն, թե ընդդիմություն, կեղծ են և այդ կեղծիքը մարդիկ իրենց գենետիկայով, գեներով զգում են»։

Ասուլիսին ներկա ջութակահար, Almazian Sympony նվագախմբի հիմնադիր Խաչատուր Ալմազյանն ասաց, որ ընդդիմությունը պայքարում է ունենա քանակություն, բայց, իր պնդմամբ, պետք է ունենա որակ ու որակը գուցեև բերի քանակի։

«Ընդդիմությունը, մարդկանց, որոնք իշխանության համար քվեարկել էին, այդ մարդկանց չեն հեղափոխել։ Ընդդիմությունը պետք է հասկանա, որ ինքը շատ լուրջ  հակառակորդ ունի։ Մի իշխանություն, որը  պարտվեց պատերազմում և վերաընտրվեց… Ենթադրենք վարչական ռեսուրս են օգտագործել, գումարներ բաժանել և այլն։ Ընդունենք։ Բայց հավատում եմ,  որ հազարավոր մարդիկ գնացել ու սրտանց քվեարկել են։ Իսկ եթե դու թերագնահատում ես քո հակառակորդին, ոչ մի բանի չես հասնում։

Ինձ թվում է՝ այս ընդդիմությունը պետք է պայքարի հենց նեյտրալ ընտրազանգվածի համար, որովհետև հենց իրենք ենք մտածող։ Բայց այս մեթոդներով, չէ։

Ու այնպես չէ, որ ես չեմ ուզում...»,- ասաց Խաչատուր Ալմազյանը։