Ձեր վստահելի աղբյուրը

ԱԳ նախարարության շենք մտած պատգամավորները բացեցին պատուհաններից մեկն ու ողջունեցին նախարարության շենքը ժամեր շարունակ շրջափակած քաղաքացիներին։

«Պայքար, պայքար, պայքար»,-վանկարկեցին պատգամավոր Արամ Վարդևանյանն ու Արթուր Սարգսյանը։

Նախարարության աշխատասենյակներից մեկը մտնելուց հետո պատգամավորներն Արցախի դրոշ կպցրեցին ԱԳ նախարարի տեղակալ Մնացական Սաֆարյանի պիջակին, բացատրեցին, ինչո՞ւ պետք է Փաշինյանը հեռանա վարչապետի պաշտոնից։

Ի դեպ, Սաֆարյանն ընդգրկված է Հայաստանի և Ադրբեջանի միջև պետական սահմանի սահմանազատման և սահմանային անվտանգության հարցերով հանձնաժողովի կազմում։

«Մեկը կա՞ այս շենքում, որ կարող է հայտարարել մի պարզ բան՝ Արցախը չի լինելու Ադրբեջանի կազմում»,-ԱԳՆ պաշտոնյային ասաց պատգամավոր Քրիստինե Վարդանյանը։

«Քրիստինեի այդ բառերը, 1992 թ. Գերագույն խորհրդի որոշմամբ իրավական ուժ ունեցող  բառացի մեջբերում է։ Դա կարծիք չէ։ Դրան հետևելը Ձեր ուղղակի պատականությունն է»,-շարունակեց Արամ Վարդևանյանը։

«Ես սյունեցի եմ և լսեցի, որ Ալիևն ու Էրդողանն իրար հետ զրույց են ունեցել և ասել են, որ Սյունիքի միջանցքը լինելու է։ Լինելո՞ւ է, թե՞ չի լինելու»,-հարցրեց ԱԺ պատգամավոր Արթուր Սարգսյանը։

«Արցախը Ադրբեջանի կազմում լինելո՞ւ է, թե՞ ոչ։ Այդ մաի նախադասությունն ասեք»,-վրա բերեց Արեգնազ Մանուկյանը։

«Խնդրում եմ ասեք, Արցախը չի լինելու Ադրբեջանի կազմում»,-ասաց պագամավոր Հռիփսիմե Ստամբուլյանը։

«Ես ձեզ լսեցի։ Դուք հայտարարություններն արդեն երևի լսել եք»,-ասաց Սաֆարյանը։
Հարցին, թե արգելվա՞ծ է իրեն նման բան հայտարարեց, ԱԳ նախարարի տեղակալն ասաց՝ արգելված չէ։

Ի պատասխան  փոխնախարարի լռության, Քրիստինե Վարդանյանը բարձրախոսով հայտարարեց. «Պետք է արձանագրել, որ ԱԳ նախարարությունում  հրաժարվում եմ ասել՝ Արցախն Ադրբեջանի կազմում չի լինելու»։