Ձեր վստահելի աղբյուրը

ՀՀ Ազգային ժողովի արտահերթ նիստում  «Ավելացված արժեքի մասին» ՀՀ օրենքում փոփոխություն կատարելու մասին օրենքի նախագծի քննարկման ժամանակ «Բարգավաճ Հայաստան» խմբակցության պատգամավոր Միքայել Մելքումյանը հետաքրքրվեց, թե երբ կառավարությունը որոշում կատարեց օրենքում  փոփոխությունն իրականացնել և ո՞վ է փոփոխության հեղինակը:

Հիշեցնենք, փոխնախարարն ասաց, որ նախագծով առաջարկվում է Հայաստանում անմաքս առևտրի գոտու ռեժիմից օգտվեն ոչ միայն օդանավակայանի տարածքում գործող  առևտրի կետերը, այլ նաև ցամաքային անցակետերում գործողները:

Մասնավորապես, ըստ նրա, օրենքի ընդունումից հետո Հայաստանի ցամաքային անցակետերում՝ Մեղրիում, Բավրայում և Բագրատաշենում, հնարավորություն է ընձեռնվելու, որ գործող անմաքս առևտրի կետերը ազատված լինեն ավելացված արժեքի հարկից:

ՀՀ էկոնոմիկայի փոխնախարար Գարեգին Մելքոնյանը նշեց, որ իրենց դիմել են մասնավոր հատվածից, մասնավորապես,  «Դյութիֆրի Ալյանս» ասոցիացիան, որն ամբողջ աշխարհում անմաքս առևտրի կետերի միություն է:

«Ասոցիացիայի անդամ է նաև ՀՀ-ում գրանցված «Դյութիֆրի Ալյանս» ՍՊԸ-ն, որը դեռ երկու-երեք տարի առաջ դիմել էր կառավարությանը և ստացել թույլտվություն՝ Մեղրիում անմաքս առևտրի գոտու ծառայություն իրականացնելու համար: Գործող կարգը դա թույլատրում է, բայց ԱԱՀ-ի օրենքը չէր նախատեսում ցամաքային անցակետում ԱԱՀ-ից ազատում»,- նշեց Գ.Մելքոնյանը:

Ըստ նրա, Վրաստանում՝ Հայաստանի ամիջապես սահմանին նույնպես գործում է  անմաքս առևտրի գոտի:

Միքայել Մելքումյանը նաև հետաքրքրվեց, թե ինչո՞ւ Եվրասիական տնտեսական միությանն անդամակցելուց հետո ՀՀ քաղաքացիներին չի թույլատրվում Երևան թռնելուց առաջ  օգտվել ԵՏՄ անդամ երկրների Ռուսաստանի օդանավակայաններում գործող «Դյութիֆրի»-ներից:

Գարեգին Մելքոնյանն ասաց, որ իսկապես նման խնդիր կա, ինչն ընդունելի չէ:

«Այո՛, Մոսկվայի օդանավակայանում մեր քաղաքացիներն առևտուր անելիս խնդիրներ են ունենում, չեն կարողանում Հայաստան ժամանելուց առաջ «Դյութիֆրի»-ներում առևտուր անել: Հարցը բարձրացվել է ԵՏՄ շրջանակներում, մենք նշել ենք, որ սա ընդունելի չէ, քանի որ չի կարելի ապրանքը ցուցադրել, ներկայացնել, այցելուների մի մասին սպասարկել, մի մասին՝ ոչ: Ռուսական կողմն ասում է՝ համակարգում պետք է տարանջատում դրվի, իրենց համակարգը չի կարողանում սպասարկել և ներսում  հաշվառում իրականացնել, հարկերը տարանջատել, քանի որ ոչ բոլոր դեպքերում պետք է հարկվի գնումը»,- ընդգծեց Գարեգին Մելքոնյանը՝ հավելելով, որ իսկապես սա ընդունելի չէ և մեր քաղաքացիները պետք է կարողանան առևտուր իրականացնել:

Պատգամավոր Գուրգեն Արսենյանն էլ անդրադառնալով նախագծի փոփոխություններին՝ նշեց, թե իր համար հաճելի չէր, երբ Վրաստանից հեռացող զբոսաշրջիկը կարողանում էր օգտվել անմաքս առևտրային կետերից, իսկ Հայաստանով անցնելուց տեսնում ենք, որ նման բան նախատեսված չէ երկրից հեռացող զբոսաշրջիկների համար:

«Հիմա մենք հավասար պայմաններ ենք ստեղծում այն զբոսաշրջիկների համար, ովքեր Հայաստանից են հեռանում»,- ասաց պատգամավորը:

Գ.Արսենյանը հետաքրքրվեց նաև, թե արդյոք  Հայաստանից Ռուսաստան մեկնող ՌԴ քաղաքացիները կարողանո՞ւմ են մեր օդանավակայանից օգտվել անմաքս առևտրի ռեժիմից: Էկոնոմիկայի փոխնախարար Գ.Մելքոնյանը նշեց, որ իրենք հարցը ԵՏՄ-ում բարձրացրել են:

«Պարոն Արսենյան, ես Ձեզ հետ համամիտ եմ և այդ հարցը մենք  տվել ենք նաև ռուսական կողմին: Մեզ համար սկզբունքորեն ընդունելի չէ, որ մեր քաղաքացիները գտնվում են ոչ հաճելի վիճակում: Խնդրին պետք է լուծում տալ, անվերջ, անժամկետ վիճակը պահելը սխալ է: Հիմա իրենք մտածում են թռիչքուղիներն անջատելու մասին, որպեսզի հարցին լուծում տան»,- նշեց Գ.Մելքոնյանը: