Ձեր վստահելի աղբյուրը

«Երեկվա բախումների համար ես ցուցարարների մեղքը չեմ տեսնում։ Նրանք պայքարում են իրենց հայրենիքի համար։ Ապրիլի 17-ից ես սկսել եմ պայքարը, որից հետո տարբեր ուժեր տարբեր օրերի սկսել են իրենց պայքարը։ Արդեն մեկ ու կես ամիս մենք փողոցում ենք»,- Ֆրանսիայի հրապարակում հանրահավաքի ընթացքում լրագրողների հետ զրույցում ասաց «Հայրենիք» կուսակցության նախագահ, ԱԺ «Պատիվ ունեմ» խմբակցության ղեկավար Արթուր Վանեցյանը՝ անդրադառնալով երեկ Դեմիրճյան-Պռոշյան փողոցների խաչմերուկում ոստիկանների՝ պայքարի մասնակիցների նկատմամբ  իրականացրած գործողություններին։

Նա նշեց, որ իշխանությունը փորձում է  ցույց տալ, որ քաղաքական լուրջ պրոցես չկա Հայաստանում, մինչդեռ ամեն օր հազարավոր մարդիկ են դուրս գալիս փողոց հանուն Հայաստանի, Արցախի ու ընդդեմ այս իշխանությունների։

«Դրա հետ մեկտեղ մենք տեսնում ենք, որ շարունակվում է  Արցախի հանձնման գործընթացը, դեմարկացիայի ու դելիմիտացիայի գործընթացը, ինչի հետևանքով կորցնելու ենք Հայաստանից գյուղեր, և դա չի հերքվում իշխանությունների կողմից։ Երեկ Աժ-ում պետք է ընդունվեր 7 կետանոց հայտարարություն, որը բխում էր անկախության հռչակագրից, ՀՀ Սահմանադրությունից ու օրենքներից։ Ի՞նչն է պատճառը, որ չեկավ «Քաղաքացիական պայմանագիր»-ն ու չմասնակցեց արտահերթ նիստին։ Դա խոսում է այն մասին, որ այս իշխանությունները նպատակ ունեն մեր հայրենիքը մաս-մաս զիջել թշնամուն, ի հաշիվ Հայաստանի ու Արցախի շահերի բարելավել Ադրբեջանի ու Թուրքիայի հետ հարաբերությունները, ուզում են զիջել Արցախը։ Եթե ցանկանան հակադրվել, ապա դա թող անեն ոչ թե խոսքով, այլ գործով»,-ասաց նա։

Վանեցյանի խոսքով, իշխանությունը փորձում է  ցույց տալ, որ սա ոստիկանների ու ցուցարարների խնդիրն է։

«Մենք ոստիկանների հետ ոչ մի խնդիր չունենք, նրանք մեր քաղաքացիներն են։ Ոստիկաններն օրինակ մոտենում են ինձ՝ որպես ուսադիր կրող մարդու, ասում են, պարոն Վանեցյան, ինչի՞ են մարդիկ մեզ թուրք ասում։ Ես ներողություն եմ խնդրում մարդկանց փոխարեն, բացատրում, որ մարդիկ ոստիկաններին տեսնում են որպես Նիկոլ  Փաշինյանի իշխանության պաշտպան։ Մենք մեկ ու կես ամիս իրականացրել ենք խաղաղ անհնազանդության ակցիաներ, իսկ  ոստիկանության գործառույթն է ապահովել  խաղաղ ակցիայի մասնակիցների անվտանգությունը։ Կրկնում եմ, ոստիկանությունն իրավունք չուներ իրականացնել այն գործողությունները, որն արեց երեկ»,-նշեց Վանեցյանը։

Նա ասաց՝ հատուկ միջոցներ կարող են կիրառվել ոստիկանության պետի կամ նրան փոխարինող անձի  գրավոր հրամանով, իսկ ոստիկանության աշխատակիցները դրանց կիրառման մասին առնվազն տասը րոպե առաջ պետք է իրականացնեն քաղաքացիներին և կոչ անեն դադարեցնել բողոքի ակցիան կամ հեռանալ այդ տարածքից։

«Չի եղել ոչ առաջինը, ոչ երկրորդը։ Ուստի չկա որևէ արդարացում։ Ոստիկանության պետն ինձ տեղեկացրել է, որ Հայաստանում չէ։ Հրապարակում տեսել եմ, խոսել ոստիկանության բարձրաստիճան պաշտոնյաների հետ, ասել եմ, որ չէր կարելի այդպես վարվել, նրանք ինչ-որ բաներ են ասել։ Բայց ես նորից եմ կրկնում, որևէ պարագայում ոստիկանության երեկվա գործողություններն արդարացնել չի կարելի»,-ասաց նա։