2018թ. սխալ ընտրության պատասխանը 2020թ պատերազմն էր, 2021թ ընտրության պատասխանը դեռ չենք ստացել՝ կստանանք. Արա Զոհրաբյան
«Ինձ մոտ այնպիսի տպավորություն է, որ Նիկոլ Փաշինյանն ամեն ինչ անում է, որ իրեն հեռացնենք վարչապետությունից և մենք չեն կարողանում: Կարծես մարդը օգնության է կանչում՝ ասելով՝ սա, սա, սա եմ անում, չեք ուզո՞ւմ ինձ հեռացնել»,-«Հայելի» մամուլի ակումբում հայտարարեց «Զարթոնք» կուսակցության ներկայացուցիչ Արա Զոհրաբյանը՝ անդրադառնալով Փաշինյանի վերջին ասուլիսին, և նկատեց, որ լսրարանի մյուս կողմում անտարբերություն է:
Հայտնելով, որ Փաշինյանն վերջին ասուլիսում երեք անգամ կրկնեց, որ Ադրբեջանը պատերազմ սկսելու համար լեգիտիմություն է ապահովում՝ Զոհրաբյանը նկատեց, որ իրականում ՀՀ գործադիրի ղեկավարը ցանկանում է զիջումներ անել՝ սպառնալով պատերազմով, բայց, ըստ բանախոսի, չտալու դեպքում պատերազմ չի լինի:
«Զարթոնք» կուսակցության ներկայացուցիչը դիտարկեց 2020 թվականի նոյեմբերի 9-ի հայտարարության 9 կետերը և փաստեց, որ առաջին կետով նախատեսված է, որ կողմերը կանգնում են այնտեղ, որտեղ են, բայց Նիկալ Փաշինյանի հանձնարարությամբ նույն տարվա դեկտեմբեր-հունվարին Սյունիքի մարզում զորքերը հետ քաշվեցին իրենց դիրքերից, իսկ դրա փոխարեն լիարժեք կատարվել է այն կետը, որում ասվում է, որ Ադրբեջանին են հանձնվելու Քարվաճառի, Ակնայի, Բերձորի և Շահումյանի շրջանները:
Արա Զոհրաբյանը հայտնեց, որ Հայաստանը չի կարողանում ապահովել գերիների վերադարձի կետը, այն դեպքում երբ որևէ բան զիջելու ժամանակ գերիների հարցը կարող է լուծվել, բայց այն չի արվում:
Նրա խեսքով՝ նոյեմբերի 9-ի տեքստի ռուսերեն ու հայերեն տարբերակներում կա տարբերություն և հայերենում՝ ի վնաս Հայաստանի:
«Հայերեն տեքստում Արցախը Հայաստանին կապող նոր երթուղու կառուցման մասին տողը թարգմանված է «Լաչինի միջանցքի երկայնքով», իսկ ռուսերեն տարբերակում օգտագործվում է «по Лачинскому коридору», որը նշանակում է միջանցքով, ոչ թե միջանցքի երկայնքով»,-փաստեց Զոհրաբյանը և նկատեց, որ չկատարելով այդ կետը և համաձայնելով, որ նոր ճանապարհը կառուցվի Բերձորի միջանցքից դուրս՝ Բերձորը դուրս է մնում խաղաղապահների հսկողությունից, բացի այդ այնտեղով է անցնում գազատարը, ինտերնետի և կապի մալուխները: Նա ենթադրեց, որ դրանից հետո Ադրբեջանը Արցախի գազի համակարգը կմիացնի ավելի էժան ադրբեջանական գազի համակարգին և արցախցիներին կախման մեջ կգցի իրենից:
«Կամ Նիկոլ Փաշինյանն այն անում է դիտավորյալ, կամ անկարողունակ է այդ խնդիրը լուծել, բայց ինչպես Աստվածաշնչում է ասվում՝ իր գործում թույլ լինողը փչացնողի եղաբայրն է»,-հայտարարեց Զոհրաբյանը:
Նրա խոսքով՝ Հայրենիքի մասին մտածող ղեկավարը պետք է գոնե պահպաներ նոյեմբերի 9-ի հայտարարության տեքստի կետերը և այս երկու տարիների ընթացում բանակը զիներ, բայց տեղի է ունենում հակառակը, վարկաբեկվում է բանակը և եկեղեցին:
«Այսօր գեներալների են դատում, 200 դոլարով զինվորական գաղտնիք վաճառող կա, վաղը սահմանին զինվորականն ինչպե՞ս է կռվելու, եթե մտածելու է, որ իր թիկունքում կանգնող գեներալը գողացող է, ավելին ասեմ՝ Ադբեջանի նախագահը միշտ հոխորտում է Նիկոլ Փաշինյանի վրա, վերջինս ձայն չի բարձրացնում և այդ «մարտական ոգին» փոխանցվում է հայ զինվորականներին»,-ասաց Արա Զոհրաբյանը և հավելեց. «Մեր ժողովուրդը 2018 թվականին ընտրեց Նիկոլ Փաշինյանին ու սխալվեց, 2020 թվականի պատերազմով պատասխանը ստացավ, հիմա 2021 թվականին նորից ընտրեց, ես կարծում եմ, որ մենք դեռ սրա պատասխանը չենք ստացել, բայց ստանալու ենք, և այն լինելու է կրկին ռազմական բախման միջոցով, սա այնքան է լինելու, մինչև մեր ժողովուրդը չարթնանա և չհասկանա իր սխալները»:
Հարակից հրապարակումներ`
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին