Ձեր վստահելի աղբյուրը

Հայաստանի տարածքն այժմ գտնվում է ջերմային ալիքի ազդեցության գոտում, որը ներթափանցել է  Արաբական թերակղզու անապատային շրջաններից, ջերմային ալիքի ներթափանցումը սկսվել է հուլիսի 10-ից։ Հուլիսի 10-16-ն ընկած ժամանակահատվածը Հայաստանի ամենատաք գոտում՝ Արարատյան դաշտ, Արագածատոնի նախալեռնային գոտիներ, Երևան, ջերմաստիճանները  ցերեկային ժամերին տատանվել են 38-40 աստիճանի սահմաններում, հուլիսի 17-ին ջերմային ալիքն ավելի է ինտենսիվացել, ինչի արդյունքում  օդի ջերմաստիճանը բարձրացել է ևս 2-3 աստիճան։ Ասուլիսում տվյալները ներկայացրեց շրջակա միջավայրի նախարարության «Հիդրոօդերևութաբանության և մոնիթորինգի կենտրոն»-ի տնօրենի տեղակալ Գագիկ Սուրենյանը։

Հուլիսի 17-ի ցերեկը Արարատյան դաշտում և Երևանում գրանցվել է մինչև 40-41 աստիճան տաքություն, այդ ջերմաստիճանը պահպանվել է  մոտ 2-3 ժամ։ Այսինքն,  ժամը 15։00-ի  սահմաններում ջերմաստիճանը հասել է 40-ի, մինչև 17։00-ն այդ 40-41 աստիճան տաքությունը պահպանվել է։

«Քանի որ բավական տևական ժամանակ տեղումներ չեն եղել, դրան ուղեկցում է  բավականին  բարձր ջերմային ֆոնը, օդի  ջերմաստիճանը կլիմայական նորմայից բարձր է  5-7 աստիճանով, հատկապես նախալեռնային և  հովտային գոտիներում առկա է շատ բարձր կարգի հրդեհավտանգ իրավիճակ։ Ուլտրամանուշակագույն ճառագայթման ինտենսիվությունը բավական բարձր է նորմայից, խորհուրդ է տրվում  ժամը 11։00-ից մինչև 17։00-ն ընկած ժամանակահատվածում խուսափել արևի ուղիղ ճառագայթներից»,- ասաց Սուրենյանը։

Նրա խոսքով, վերջին տասնամյակում  այս շոգերը Հայաստանի համար դարձել են սովորական երևույթ, որովհետև գրեթե ամեն տարի կրկվում են, հատկապես  շատ ինտենսիվ շոգեր էին գրանցել 2017, 2018 թվականներին, երբ 40-42 աստիճան տաքությունը Արարատյան դաշտում և Երևանում պահպանվել էր 10-15 օր։ Վիճակագրությունը ցույց է տալիս, որ եթե մինչև 2000-ական թվականները 40 աստիճան Երևանում, Արարատյան դաշում  միջինը դիտվում էր 5 տարին մեկ անգամ, ապա 2000-2010 թվականներին  գրեթե գրանցվել է ամեն տարի, իսկ 2010 թվականից հետո տևում է  ոչ թե 1-2 օր, այլ  ջերմային ալիքի տևողությունը միջինը պահպանվում է մինչև 5-7 օր։

«Երեկ գրանցված  ջերմաստիճանը չի գերազանցել մեր պատմական առավելագույնը. մեր պատմական ամենաբարձր  ջերմաստիճանը գրանցվել է 2011 թվականին հուլիսի 31-ին Մեղրիի հատվածում՝ 43,7 աստիճան, Երևանում՝  հուլիսի 17-ին 42,0։ Երեկ ունեցել ենք մինչև 41 աստիճան»,- ասաց նա։

Ինչ վերաբերում է առաջիկա օրերին, Ս.Սուրենյանը հայտնեց, որ, ըստ կանխատեսումներ, մինչև հուլիսի 21-ը  ներառյալ ջերմային ալիքի ազդեցությունը պահպանվելու է, ջերմաստիճանը Երևանում և Արարատյան դաշտում կտատանվի 38-40 աստիճանի սահմաններում, լեռնային մարզերում՝ մինչև 30-33 աստիճան. «Միակ փոփոխությունը  կլինի այն, որը, բնականաբար չի ազդի ջերմային ֆոնի վրա, հատկապես օրվա առաջին կեսին, մինչև կեսօր որոշակի ամպամածություն կդիտվի, կեսօրից հետո կցրվի։

Հուլիսի 22-ից հետո ջերմային ալիքն աստիճանաբար նահանջում է  դեպի հարավ՝ իր  տեղը զիջելով Սև ծովից եկող համեմատաբար սառն օդային հոսանքերին, որոնք այդքան էլ ինտենսիվ չեն։ Ըստ կանխատեսումների, հուլիսի 22-25-ն օդի ջերմաստիճանն աստիճանաբար  4-5 աստիճանով կնվազի, արդեն հուլիսի 23-24-ին 38-40-ի փոխարեն  ցերեկային ժամերին Արարատյան դաշտում և Երևանում  կգրանցվի մինչև 34-35 աստիճան ջերմություն։ Տեղումեր չեն սպասվում, որովհետև  ներխուժած օդը շատ-շատ  չոր է։ Հուլիսի 22-ից սկսած մի փոքր տեղումների հավանականություն կա հյուսիսային շրջաններում, հատկապես Լոռի, Շիրակ, Տավուշ հատվածներում, որոնց հավանականությունը փոքր է, բայց չի բացառվում, որ  առանձին բնակավայրերում կարճատև անձևրներ լինեն»։