«Սերունդ». Որ Արցախում շատ երեխաներ ծնվեն
Վերջին օրերին մի գիտնական, մի հասարակական գործիչ, մի ակտիվիստ, մի լրագրող, մի հայտնի մարդ ֆեյսբուքյան իրենց էջերում գրեցին, որ ամենամսյա նվիրատվությամբ միանում են «Սերունդ» ՀԿ-ի նախաձեռնությանը՝ Արցախում ծնելիությունը խթանելու նպատակով։
Կազմակերպության էջում տեղեկությունները քիչ են.
««ՍԵՐՈՒՆԴ»-ը՝ Ծնելիության Խթանման Համահայկական Հիմնադրամը ոչ առևտրային կազմակերպություն է։ Հիմնադրվել է 2021թ. հունվարի 21-ին և գործում է ՀՀ Սահմանադրության և այլ համապատասխան և իրավական ակտերի համաձայն։
«Սերունդ» բարեգործական հիմնադրամ է, որի նպատակն է ծնելիության խթանմամբ հասնել մեզ անհավանական և ֆանտաստիկ թվացող բնակչության թվերի, հայ մարդու բնութագրի սիմվոլ դարձնել բազմազավակությունը, ամեն գնով պահպանել գենետիկ ֆոնդը, բերել նոր հույս, լավատեսություն և հզոր ապագա ունենալու իրական հնարավորություն, գունավորելով ապագայի մասին պատկերացումներ մեր հայրենակիցների և աշխարհասփյուռ հայերի մտքերում»։
«Սերունդ»-ի հիմնադիրները գործարար երկու ընկերներ են։ Գրիգոր Աբրահամյանը Panorama.am-ի հետ զրույցում ասաց՝ նման նախաձեռնության գաղափարն անելանելությունից, անզորությունից, մտորումներից առաջացավ 2020-ի նոյեմբերի 9-ի գիշերն անքուն անցկացնելուց հետո։
«Ամեն ինչից զատ տեղի ունեցավ նաև ժողովրդագրական աղետ։ Մենք հասկացանք, որ անհրաժեշտ է ամեն կերպ խթանել ծնելիությունը, լինել այն ընտանիքների կողքին, որոնք ցանկանում են երեխա ունենալ։ Մենք ծրագիրը սկսում ենք Արցախից, որտեղ ժողովրդագրական խնդիրն ավելի սուր է։ Մենք բոլորս էլ հասկանում ենք, եթե բնակչության թիվը մի քանի անգամ մեծ լիներ այնտեղ, ապա նման պատկեր չէինք ունենա»,-նշեց Գ. Աբրահամյանը։
Հիմնադրամը ծրագրի մեկնարկային փուլում ընտրել է Արցախի երկու գյուղ՝ քիչ բնակեցված Չարեքտարն ու Եղծահողը։ Օրինակ, Եղծահողում 17 ընտանիք է ապրում։ Շահառուի հետ կնքվելիք պայմանագրում անպայման նշվելու է, որ աջակցության տրամադրումը կդադարեցվի, եթե ընտանիքը փոխի լքի Արցախը։
«Հիմա Եղծահողում երեք ընտանիք սպասում է բալիկների լույս աշխարհ գալուն։ Նրանք արդեն հայտ են ներկայացրել հիմնադրամ։ Այս երեխաները կլինեն հիմնադրամի առաջին շահառուները։ Բալիկների ծնվելուն պես կսկսենք աջակցության տրամադրումը՝ 16 տարի 8 ամիս անընդմեջ»,-ասում է հիմնադիրը։
Հիմնադրամի կայքի ստեղծման աշխատանքներն ավարտվել են այս տարվա սեպտեմբերին։
Արդեն մոտ 4.7 մլն դրամ գումար է հավաքվել։ Նվիրատուների գերակշռող մասը Հայաստանից են, շատ են նաև Արցախից միացածները, հատուկենտ՝ Ռուսաստանից ու եվրոպական երկրներից։ Սփյուռքի հայ համայնքներում դեռ տեղեկացված չեն ծրագրի մասին։
Նվիրատվությունը կատարվում է կայքի միջոցով, գումարը փոխանցելուն պես տեղեկատվությունը հրապարակվում է կայքում, նվիրատուի անվան դիմաց նշվում է նվիրատվության հերթական թիվն ու նվիրած գումարի ընդհանուր չափը։
Հիմնադրի խոսքով, շատ կարևոր է, որ նախաձեռնությանը հնարավորինս մեծ թվով մարդիկ միանան թեկուզ 500 դրամ նվիրատվությամբ։
«Նվիրատուների տրամադրած գումարից ոչ մի կոպեկ չի հատկացվում ադմինստրատիվ կամ այլ ծախսերի՝ կլինի ինչ-որ տեղ գնալու, մարկտինգային գովազդի, թե աշխատավարձի համար։ Այդ բոլոր ծախսերն իրականացնում են հիմնադիրները, ինչպես նաև մի քանի ընկերություն։ Մենք ամեն բան արեցինք, որ նվիրատուների տրամադրած գումարն ամբողջությամբ հատկացվի երեխաներին։ Մենք արդեն ունենք նվիրատուների փոքր բանակ, որոնք տարբեր հետաքրքրությունների, տարբեր ոլորտներում աշխատող, տարբեր տարիքի ու սեռի մարդիկ են»,-ասում է Գրիգոր Աբրահամյանը։
Նվիրատուների թվի ավելացմանը զուգահեռ հիմնադրամի ներկայացուցիչները մտադիր են ծրագիրն ընդլայնել՝ ընդգրկելով Արցախի մյուս համայնքները, Սյունիքի, Տավուշի սահմանամերձ գյուղերը։ Գրիգոր Աբրահամյանը վստահ է, որ սոցիալական աջակցությունը կնպաստի, որ ավելի շատ երեխաներ լույս աշխարհ գան, վկայակոչում է ուսումնասիրությունների արդյունքները։
«Շատ դեպքերում մարդիկ գալիս են որոշման, որ պետք է երկրորդ, երրորդ երեխա ունենան, բայց հաշվի առնելով ֆինանսական ծանր վիճակը՝ հետաձգում են երեխա ունենալը կամ էլ հետ կանգնում որոշումից»,-նշում է Panorama.am-ի զրուցակիցը՝ ընդգծելով, եթե մենք ուզում ենք այս խաչմերուկում որպես միավոր մնանք, պետք է նախ շատանանք։
Արցախի Հանրապետության սոցիալական զարգացման ու միգրացիայի նախարարության էջում հրապարակված տեղեկատվության համաձայն, երեխայի ծննդյան միանվագ նպաստի չափը նշանակվում է ըստ նոր ծնված երեխայի հերթական կարգաթվի`
-առաջին և երկրորդ երեխաների դեպքում` 300 000 հազար դրամ, իսկ եթե ծնողներից մեկն ունի հաշմանդամություն՝ 500 000 դրամ
երրորդ երեխայի ծնվելու դեպքում` 500 000 դրամ,
չորրորդ և յուրաքանչյուր հաջորդ երեխայի ծնվելու դեպքում` 700 000 հազար դրամ։
Լրահոս
Տեսանյութեր
Բագրատ Սրբազան. Ուրախ եմ, որ իմ կոչով դուրս են եկել փողոց ոստիկանները
