Ունենալու ենք իրավիճակ, որ մարդը, ով վտանգում էր իր կյանքը, չի ստանալու հավելավճար, մարդը, որ կյանքում առաջնագիծ չի տեսել, ստանալու է. Մանուկյան
«Որևէ մեկը դեմ չէ Զինված ուժերում ատեստացիա անցկացնելուն, ատեստացիայի հիման վրա հավելավճարներ ավելացնելուն։ Բայց այստեղ կա մի քանի խնդիր»,- ՀՀ ԱԺ պաշտպանության և անվտանգության հարցերի մշտական հանձնաժողովի նիստում երկրորդ ընթերցման ներկայացված «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ կատարելու մասին և «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին օրենքների նախագծերի փաթեթի քննարկմանն ասաց ԱԺ «Հայաստան» խմբակցության պատգամավոր Գեղամ Մանուկյանը։
Նրա խոսքով, չպետք է տպավորություն ստանալ, թե Հայաստանի Զինված ուժերում ատեստացիա չի եղել, սա նորամուծություն է։
«Զինված ուժերում եղել է ատեստացիա, բոլորի համար եղել է ատեստացիա, եղել են ատեստացիոն բազմաթիվ չափորոշիչներ։ Այնպես չէ, որ նոր հեծանիվ է հորինվում»,- նշեց ընդդիմադիր պատգամավորը։
Գ. Մանուկյանն ասաց, որ ատեստացիան, իբրև այդպիսին, ունի փիլիսոփայություն. «Ցանկացած ոլորտում դա մասնագիտության համապատասխանելիության հարցն է, հավելավճարը երկրորդական է, որը շատ կարևոր է. բայց զինվորականի մասնագիտության համապատասխանելիության հարցը որպես այդպիսին նախագծից դուրս է մնում։ Կրկնում եմ՝ միակ հիմքը դրվում է ատեստացիայի արդյունքով ենթակա է հաշվարկվելու հավելավճար, ենթակա է շարունակելու հավելավճարի հաշվարկումը, ենթակա չէ հաշվարկելու հավելավճարը։ Մասնագիտական առաջխաղացման համապատասխանելիության մասին որևէ հիշատակում չկա»։
Ըստ նրա, այլ հանգամանք էլ կա. վաշտի հրամանատար չի դիմում ատեստացիայի, փոխհրամանատարը դիմում է ատեստացիայի հավելավճարի համար ու ստանում է, արդյունքում՝ ենթական հավելյալ ավելի գումար է ստանում, քան իր հրամանատարը։
«Մյուսը. տարբեր պայմաններով՝ մեկը ֆիզպատրաստությունից լավ չի, մյուսը՝ կանոնակարգից լավ չէ և ատեստացիայի արդյունքում նույն պարտականությունը նույն մարտական հենակետում կանգնող երկու զինծառայող մեկը հավելավճար է ստանում՝ ունենալով նույն պարտականությունները, նույն մարտական խնդիրները՝ կյանքը վտանգելով։
Արդյունքում ունենալու ենք իրավիճակ, որ մարդը, ով վտանգում էր իր կյանքը, չի ստանալու հավելավճար, մարդը, որ շտաբային կաբինետներից դուրս չի եկել, կյանքում առաջնագիծ չի տեսել, կանոնակարգը լավ կրծել է, բոլոր կարգուկանոնները լավ գիտի, ստանալու է հավելավճար։
Մեր առաջարկի ամբողջ իմաստը հետևյալն է՝ կառավարության առաջարկն ընդունել իբրև հիմք, մարդկանց հնարավորություն տալ ատեստացիայի արդյունքում ստանալ հավելավճար, բայց բուն բովանդակությունը, մեխը, որ ատեստացիան մասնագիտական համապատասխանելիության հարց է, որի հիման վրա կա առաջին, երկրորդ, երրորդ կարգի մասնագետ, վարպետ։ Ատեստացիան դարձնել մասնագիտության, պաշտոնի համապատասխանելիության հարց»,- ասաց Գեղամ Մանուկյանը։
Հարակից հրապարակումներ`
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին