Չպետք է թույլ տալ Արցախի փոխարեն ուրիշներն իրենց շահերից ելնելով որոշեն Արցախի ճակատագիրը. Վահե Հակոբյան
«Այսօր Արևմուտքն ու Ռուսաստանը պայքարում են մեր տարածաշրջանում ազդեցության համար։ Արևմուտքը ցանկանում է թուլացնել Մոսկվայի ազդեցությունը, հնարավորության դեպքում նույնիսկ դուրս մղել Ռուսաստանին, իսկ Ռուսաստանը պայքարում է դրա դեմ ու ձգտում է իր ձեռքը պահել զարկերակի վրա»,- Ստեփանակերտում «Լույս թունելի վերջում» հարթակի երրորդ քննարկմանն ասաց «Վերածնվող Հայաստան» կուսակցության նախագահ Վահե Հակոբյանը։
Նրա խոսքով, սրա արդյունքում մենք ունենք ԵԱՀԿ Մինսկի խմբի համանախագահության դե ֆակտո պարալիզացում և 2, 3, երբեմն 4 տարբեր ձևաչափերով տարբեր հարթակներում կազմակերպվող բանակցություններ Հայաստանի և Ադրբեջանի միջև։
«Միշտ պարզ և հասկանալի է եղել, որ մեր տարածաշրջանում ՌԴ և Արևմուտքի միջև լարվածության էսկալյացիան բացահայտ միմյանց դեմ պայքարի վերածվելը ոչ միայն չեն բխում Հայաստանի շահերից, այլ ռիսկեր են ստեղծում մեր երկու պետությունների ու մեր ժողովուրդների համար։ Սակայն Հայաստանի գործող իշխանությունները որոշել են անգամ այս վիճակում դիվիդենտներ քաղել այդ պայքարից և Հայաստանին ներքաշում են այս ամեն ինչի մեջ»,- ասաց քաղաքական գործիչը։
Նա նշեց, որ Ադրբեջանի ախորժակն օրեցօր ավելի ու ավելի աճում է, զուգահեռ գեոպոլիտիկ մի շարք գործընթացներից ելնելով՝ մեծանում է Բաքվի դերը թե Մոսկվայի, թե Արևմուտքի համար։
«Հայաստանի իշխանությունն անդադար նոր զիջումների է գնում, շարունակում է իջեցնել նշաձողը, այնքան է իջեցրել, որ նշաձողն արդեն հատակին է հայտնվել։ Արդյունքում Արցախի ժողովրդի ինքնորոշման իրավունքի, Արցախի կարգավիճակի հարցերն ընդհանրապես չեն քննարկվում, չեն բաձրաձայնվում։ Հասել ենք նրան, որ պայքարն արդեն գնում է նրա համար, որ համատեղ հայտարարություններում գոնե Արցախը հիշատակվի, նշվի, որ արցախյան հակամարտությունը կարգավորված չէ։ Հասել ենք նրան, որ ադրբեջանցի այսպես կոչված էկոլոգների կողմից մի քանի ժամով փակվում է Արցախը Հայաստանին կապող միակ ճանապարհը, իսկ ռուս խաղաղապահ առաքելության ղեկավարը խոսում է Լաչինի միջանցքում մաքսակետ դնելու մասին ադրբեջանական կողմի հետ ձեռք բերած համաձայնության մասին։ Անկախ նրանից, թե ով ինչքանով հերքեց կամ փորձեց հերքել այս ամենը՝ ֆիքսենք, թե ուր ենք հասել»,- ասաց Վահե Հակոբյանը։
Չնայած այս ամենին, նրա խոսքով, այս խայտառակ կառավարությունը շարունակում է հպարտորեն խոսել խաղաղության օրակարգի մասին ու մեծագույն նպատակ սահմանում Արցախի հայության անվտանգության երաշխավորումը, չնայած վերջին շրջանում դրա մասին էլ ընդհանրապես չեն խոսում։
Վահե Հակոբյանը հիշեցրեց, որ հայ գերիները դեռ մնում են Բաքվի բանտերում, ադրբեջանական զորքերը ՀՀ սուվերեն տարածքում են, սահմաններին կրակոցներ են ու մարդիկ են վիրավորվում, ապա շարունակեց. «Չնայած այս ամենին՝ Հայաստանի իշխանությունները Ադրբեջանի առաջարկներն են քննարկում ու Ադրբեջանի տարածքային ամբողջականությունն են ճանաչում։
Փաշինյանն ու իր խմբակն այսօր բանակցային գործընթացում ոչ թե Հայաստանը, Արցախը կամ ժողովրդին է պաշտպանում, այլ Բրյուսելում և Մոսկվայում իրար հակասող խոստումներ է տալիս»։
Վահե Հակոբյանը նշեց, որ Արցախը թողնելով բախտի քմահաճույքին, ճանաչելով Ադրբեջանի տարածքային ամբողջականությունը, գալով անհասկանալի պայմանավորվածությունների՝ Փաշինյանն իր իշխանությունն է երկարացնում։
«Արցախը բազմիցս բարձրացրել է բողոքի ձայնը կատարվողի վերաբերյալ։ Մեր բոլորի խնդիրն ու նպատակը պետք է լինի Արցախի ուղերձը տեղ հասցնելը, թույլ չտալ Արցախի փոխարեն ուրիշներն իրենց շահերից ելնելով որոշեն Արցախի ճակատագիրը։ Դա այսօր հեշտ չէ, բայց միշտ կա հնարավորություն»,- ասաց «Վերածնվող Հայաստան» կուսակցության նախագահ Վահե Հակոբյանը։
Վահե Հակոբյանի ելույթն ամբողջությամբ՝ տեսանյութում։
Լրահոս
Տեսանյութեր
«Հավերժի ճամփորդներ». Զոհված տղաների պատմություններն ու երազանքները՝ առցանց ցուցադրությամբ
