Ձեր վստահելի աղբյուրը

ԵԱՀԿ գործող նախագահ, Հյուսիսային Մակեդոնիայի ԱԳ նախարար Բույար Օսմանին հեռախոսազրույցներ է ունեցել Հայաստանի ու Ադրբեջանի ԱԳ նախարարների հետ։ Մակեդոնիայի ԱԳ նախարարությունը թվիթերի իր միկրոբոլգում  մանրամասնել է, որ պաշտոնյան մտահոգություն է հայտնել Լաչինի միջանցքում ստեղծված իրավիճակի վերաբերյալ։

Նա խրախուսել է օգտագործել դիվանագիտական միջոցները՝  առկա մարտահրավերները հաղթահարելու և տեղում տուժած մարդկանց պաշտպանելու համար:

«ԵԱՀԿ-ն պատրաստ է աջակցել երկխոսությանը լարվածությունը թուլացնելու համար»,-նշել է Բույար Օսմանին։

ԵԱՀԿ պաշտոնական կայքի փոխանցմամբ, կազմակերպության նախագահը
Վերահաստատել է իր պատրաստակամությունն անձնական ներգրավվածության համար՝ օգնելու թուլացնել լարվածությունը և նպաստել կայուն խաղաղությանն ուղղված ջանքերին: Նա նաև հայտարարել է, որ առանձին այցեր է կազմակերպելու Հայաստան և Ադրբեջան։

Հայաստանի ԱԳ նախարարության պաշտոնական էջի փոխանցմամբ, հեռախոսազրույցի ընթացքում Արարատ Միրզոյանը շնորհավորել է գործընկերոջը ԵԱՀԿ նախագահությունը ստանձնելու կապակցությամբ՝ պատրաստակամություն հայտնելով ակտիվորեն համագործակցել կազմակերպության հիմնարար սկզբունքների պաշտպանության և առաջմղման գործում:

Անդրադարձ է կատարվել տարածաշրջանային անվտանգության օրակարգի մի շարք հարցերի:

Արարատ Միրզոյանը զրուցակցի ուշադրությունն է հրավիրել Ադրբեջանի կողմից Լաչինի միջանցքի արգելափակման հետևանքով ստեղծված հումանիտար ճգնաժամին: Շեշտվել է, որ Ադրբեջանի գործողությունները հանդիսանում են 2020թ. նոյեմբերի 9-ի եռակողմ հայտարարության, ինչպես նաև միջազգային մարդասիրական իրավունքի կոպտագույն խախտում: ՀՀ ԱԳ նախարարն ընդգծել է, որ Ադրբեջանի քայլերն ուղղված են Լեռնային Ղարաբաղի 120 հազար հայերին էթնիկ զտման ենթարկելուն:

Լեռնային Ղարաբաղում հումանիտար աղետը կանխարգելելու համատեքստում ԱԳ նախարար Միրզոյանն առանձնահատուկ կարևորել է տարածաշրջանային ու միջազգային համապատասխան կառույցների, այդ թվում՝ ԵԱՀԿ-ի կողմից հստակ քայլերի իրականացման անհրաժեշտությունը: