Ձեր վստահելի աղբյուրը

«Ցանկացած հարցի լուծում պետք է լինի համագործակցության միջոցով, եթե երկրները կամ մարդիկ կռվում են իրար հետ, հարցը չի լուծվում»,-կառավարության նիստից հետո լրագրողներին ասաց էկոնոմիկայի նախարար Վահան Քերոբյանը՝ պատասխանելով հարցին, թե ինչպես է Հայաստանը օգնության ձեռք մեկնել Թուրքիային, որը՝ հենց իշխանությունների պնդմամբ, 44-օրյա պատերազմում ամեն կերպ աջակցում էր Ադրբեջանին:

Նրա խոսքով՝ իշխանությունները շատ լավ ցույց են տալիս, թե ինչպես կարելի է դրական օրակարգով համագործակցել և օգնում է հումանիտար աղետի մեջ գտնվող Թուրքիային:

Լրագրողի հարցին, թե արդեն Արցախից բողոքներ են հնչում, որ ՀՀ իշխանությունները նույն պատրաստակամությունը չեն հայտնում հումանիտար աղետի մեջ գտնվող Արցախի ժողովրդին օգնելու հարցում՝ Քերոբյանը պատասխանեց. «Ես կիսում եմ ձեր կարծիքը, ունենք նաև հումանիտար աղետ Ղարաբաղում և այնտեղ խնդրի առկայությունը չի նշանակում, որ մենք պետք է կորցնենք մեր մարդկայնությունը»:

Նա հիշեցրեց, որ ՀՀ կառավարությունը և քաղաքացիները տարեկան 150 մլրդ դրամի աջակցություն են տրամադրում Արցախին:

«Կարծում եմ՝ մենք պետք է մասնակցենք բնական աղետի պատճառով տուժած մարդկանց օգնելու գործին, և ընդհանուր առմամբ ես համարում եմ, որ Հայաստանը պետք է ավելի ու ավելի մեծացնի իր համագործակցությունն աշխարհի բոլոր երկրների հետ. այդ թվում նաև հումանիտար առումով»,-ասաց նա՝ հավելելով. «Ինչ վերաբերում է Լաչինի ճանապարհի բացմանը, ձեռնարկում ենք բոլոր հնարավոր, բայց խաղաղ միջոցները, որ հարցը լուծվի, որովհետև որևէ պոտենցիալ ուժային լուծման մեջ չենք տեսնում»:

Նախարարը տեղեկացրեց, որ Բեռլինում տեղի ունեցած կոնֆերանսի ժամանակ բարձրացրել է Լաչինի միջանցքի փակման հետևանքով առաջացած հումանիտար աղետը պարենային անվտանգության վերաբերյալ:

Նրա պնդմամբ՝ կառավարությունն օգտագործում է իր բոլոր հնարավոր ռեսուրսները խնդրի լրջությունը մաքսիմալ բարձրացնելու և դրան լուծում տալու ուղղությամբ»:

Խոսելով ներդրումների ծավալների մասին՝ Քերոբյանը հայտնեց, որ 9 ամսվա տվյալներով ներդրումների ծավալն աճել է մոտավորապես 20 %-ով, իսկ օտարերկրյա ուղղակի ներդրումներն աճել են ՝ հասնելով շուրջ 700 մլն դոլարի:

«Հույս կա, որ տարվա արդյունքներով մենք կունենանք 1 մլրդի հասնող թիվ, որը ռեկորդային է»,-ասաց նախարարը և հավաստիացրեց, որ շուտով կընդունվի ներդրումային քաղաքականության ռազմավարությունը, որը մշակվել է ԱՄՆ Միջազգային զարգացման գործակալության հետ:
Նրա խոսքով՝ օտարերկրյա ուղղակի ներդրումների առումով ուշադրություն է դարձվում աշխարհի 500 խոշորագույն ընկերությունների՝ Հայաստան բերելուն:

Այդ ընկերություններից յուրաքանչյուրի մուտքը Հայաստան գերարժեքավոր է: Շատ շուտով կունենանք լավ նորություն: Գործարք կա, որ շուտով կավարտվի և էլի ամերիկյան խոշորագույն ընկերություններից մեկը Հայաստանում ընկերություն ձեռք բերելու միջոցով կմտնի Հայաստան»,-ասաց Վահան Քերոբյանը: