Ձեր վստահելի աղբյուրը

«Նախագծով առաջարկվում է 87 հատ ՄԱՆ և 150 հատ «Ժոնգ Տոնգ» մակնիշի ավտոբուսները նվիրատվությամբ հանձնել «Երևանի ավտոբուս» ՓԲԸ-ին»,-Երևանի ավագանու արտահերթ նիստում հայտնեց Ֆինանսական վարչության պետ Վիլեն Արևշատյանը՝ զեկուցելով օրակարգի միակ հարցը՝ «Գույքի նվիրատվության մասին» ավագանու որոշման նախագիծը:

Նա հայտնեց, որ գույքը հանձնելուց հետո կազմակերպությունն իրականացնելու է մաքսազերծման և ճանապարհային ոստիկանությունում ձևակերպման աշխատանքները:

«Հաշվի առնելով, որ գույքի փաստացի շահագործումն ևս իրականացվելու է ընկերության կողմից՝ նպատակահարմար է գույքը տրամադրել «Երևանի ավտոբուս» ՓԲԸ-ին»,-ասաց Արևշատյանը:

Նա տեղեկացրեց, որ «Երևանի ավտոբուս» ՓԲԸ-ն ներկայում շահագործում է 29 շարժակազմ, որի մեջ ընդգրկված է 359 տրանսպորտային միջոց:

Նիստը վարող Երևանի քաղաքապետի առաջին տեղակալ Լևոն Հովհաննիսյանը հայտնեց, որ 15 տրոլեյբուս են գնել և դրանք ճանապարհին են, իսկ նոր ավտոբուսների առաջին խմբաքանակը ապրիլի 15-ից երթուղի դուրս կգա:

«Համայնքի կողմից ձեռք բերված շարժակազմի լրացուցիչ ծավալով արդեն իսկ կարողանում ենք պնդել, որ մենք հիմնովին կարողանում ենք լուծել տրանսպորտային սուր հիմնահարցը, և միայն լրացուցիչ հետազոտություններից հետո պարզ կդառնա, թե համալրման կարիք կա, թե ոչ»,-լրացրեց Լևոն Հովհաննիսյանը:

Ավագանու «Բարգավաճ Հայաստան» խմբակցության  անդամ Անի Խաչատրյանը չհամաձայնեց փոխքաղաքապետի հետ՝ ասելով, թե տրանսպորտի խնդիրը չի լուծվել, որ «Իմ քայլը»-ը չի կատարել տրանսպորտի հարցը լուծելու՝ քաղաքապետի նախկին ընտրության ժամանակ տված խոստումը:

Լևոն Հովհաննիսյանը հակադարձեց՝ հայտարարելով, որ 4 տարվա ընթացքում Երևանի համայնքը ձեռք է բերել 548 ավտոբուս, իսկ մինչ այդ համայնքը ոչ մի ավտոբուս չեռք չէր բերել:

«Տրանսպորտային խնդիրն ավտոբուսների գնումներով չի ավարտվում և մենք այս տարվա ընթացքում ունենք նաև միասնական տոմասյին համակարգի ներդրման հարցը , որը փորձնական մեկնարկելու է մեկ ամսից»,-իր հերթին հայտարարեց փոխքաղաքապետ Տիգրան Ավինյանը:

Նա հավելեց, որ որոշ փողոցներում կլինեն նաև ավտոբուսների համար առանձնացված գծեր և կլուծվի միասնկան կառավարման խնդիրը:

Ընդունելով, որ դեռ 100%-ով չի լուծվում տրանսպորտի խնդիրը՝ Ավինյանը տեղեկացրեց, որ 250 «Հիգեռ» մակնիշի ավտոբուս էլակտրաավտոբուսներով են փոխարինվելու, բայց կրկին հավելյալ շարժակազմերի կարք կլինի և միայն հաջորդ տարվա վերջում 90-95%-ով հարցը կլուծվի:

«Իրականում վատ է վիճակը, եթե պիկ ժամերին նայեք տրանսպորտը: Ես պարբերաբար օգտվում ե, հանրային տրանսպորտից, որպեսզի հասկանամ, թե երևանցիների փորձն ինչպիսին է: Ես ձեզ վստահեցնում եմ, որ բավականին դաժան է: Այսօրվա ավտոբուսների քանակը չի բավարարում որպեսզի երևանցիներին սպասարկի»,-հայտարարեց Տիգրան Ավինյանը և հավելեց, որ քաղաքապետարանն կշարունակի ավելացնել երթուղիների քանակը և դրանցում ավտոբուսների  թիվը:
 

Ավագանին միաձայն՝ 45 կողմ ձայներով ընդունեց որոշումը: