Ձեր վստահելի աղբյուրը

«Ասեմ ի լուր բոլորի և՝ պարոն Մինասյանի, որ ՊՈԱԿ-ում զգալի կրճատումներ են եղել նախորդ տարիների համեմատ: Նախկինում եթե ՊՈԱԿ-ը ձեր ասած նպատակներով է եղել, այն այլևս նման նպատակով չի գործում»,-խորհրդարանում հայտարարեց վարչապետի աշխատակազմի ղեկավար Արայիկ Հարությունյանը՝ արձագանքելով  Արծվիկ Մինասյանի հիշեցմանը, որ «Հանրային կապերի և տեղեկատվության կենտրոն» ՊՈԱԿ-ը հասարակության շրջանում հայտնի է «Ֆեյքերի ՊՈԱԿ» անունով:

Արայիկ Հարությունյանը հայտարարեց, որ երբ ինքը դարձել է  աշխատակազմի ղեկավար և հարցրել է, թե ՊՈԱԿ-ը քանի ֆեյք ունի, որ ասում են «Ֆեյքերի ՊՈԱԿ», իրեն պատասխանել են՝ 0:

«Ինչու՝ որովհետև ֆեյքավոդները, ֆեյքապահները տեղափոխվել են ուրիշ տեղ՝ իրենց ֆեյքերի փնջերով»,-ասաց Հարությունյանը:

ՔՊ-ական պատգամավոր Գևորգ Պապոյանը հավելեց, թե ֆեյքերը տեղափոխվել են «Հայելի» ակումբ:

Արայիկ Հարությունյանն էլ արձագանքեց, թե կոնկրետ չի կարող ասել, թե ուր են տեղափոխվել:

Հարությունյանը պատասխանում էր ՔՊ ական պատգամավոր Լիլիթ Մինասյանի հարցին, որը խնդրեց ներկայացնել ՊՈԱԿ-ի տեխնիկական հագեցման համար 2022 թ. հատկացված գումարը, քանի որ մինչ այդ Արծվիկ Մինասյանը հայտարարել է, որ հաշվետվության մեջ  գրված է 234 մլն դրամ տեխնիկական պայմանների բարելավման տող, ինչը սխալ է:

Լիլիթ Մինասյանը նաև հայտարարեց, թե Արծվիկ Մինասյանը միտումնավոր է սխալ թիվ հնչեցնում և փորձում է նվաստացնել ՊՈԱԿ-ի արդյունավետ աշխատանքը:

Արայիկ Հարությունյանը հայտնեց, որ ՊՈԱԿ-ին այդ նպատակով հատկացվել է 9 մլն դրամ, իսկ Գևորգ Պապոյանը հավելեց, որ Արծվիկ Մինասյանի հիշատակած թիվը մեկ տող վերև է և վերաբերում է «ՄԻՌ» հեռուստաընկերության տեխնիկական համատեղ վերազինմանը:

«Չգիտեմ ինչու միանգամից նման բռնկում տեղի ունեցավ իմ պարզ հարցից: Ես տիկին Մինասյանին և պարոն Հարությունյանին կառաջարկեմ կարդալ այն փաստաթուղթը, որը կոչվում է «Արդյունքային ցուցանիշներ» և որը բավականին մեծ ծավալ  ունի, այնտեղ ես մի տող տեսա, որտեղ այդ թիվն էր գրված»,-ասաց Արծվիկ Մինասյանը:

Պատգամավորը հայտնեց, որ «Հանրային կապերի և տեղեկատվության» ՊՈԱԿ-ի ներգրավմամբ է իրականացվել տեխնիկական վերազինումը և առաջարկեց հրապարակել 2022 թվականին ՊՈԱԿ-ի բյուջեն՝ բյուջետային և արտաբյուջետային ֆոնդերի մասնակցությամբ և ինչ ծրագրեր են իրականացվել:

Արայիկ Հարությունյանը շրջանցեց հարցը՝ հնչեցնելով միայն ՊՈԱԿ-ի ընդհանուր ֆինանսավորման  թիվը՝ մոտ 480 մլն դրամ:

«Ձեր կողմից հայտարարություններն ավելի հիմնավոր կլինեն, եթե ներկայացվի ՊՈԱԿ-ի կատարողականի մանրամասն հաշվետվությունը գործողությունների վերաբերյալ: Երբ դուք մեղադրում եք հարց բարձրացնոնղներին՝ ուղղակի կամ անուղղակի, թե իբր ֆեյքեր պահողները մենք ենք, մասնավորապես ես եմ, ապա ասեմ, որ այս այլանդակությունը, ֆեյքային գրոհնները հայհոյախառն գրառումները, կեղծ տեղեկություններ տարածելը, անկախ նրանից, թե որ կողմից է լինում, պետք է խիստ պատասխանատվության ենթարկվի: Դուք փոխարեն դրա քաջալերումն անեք, հիմա մեղադրում եք մյուս կողմիցն, թե իրենք են ֆեյքային հարձակումներ անում:

Արդար չէ: Դուք ինքներդ շատ լավ գիտեք, որ կառավարության, Նիկոլ Փաշինյանի, ձեր կառավարության որևէ ներկայացուցչի նկատմամբ որևէ քննադատական խոսք կազմակերպված գրոհի է արժանանում՝  նույնիսկ հայոյախառն արտահայտություններով, այն նույնպես պետք է դատապարտվի և եթե կա քրեական հանցակազմ, ապա նույնպես պետք է  բացահայտվի ու պատասխանատվության ենթարկվեն»,-ասաց «Հայաստան» խմբակցության քարտուղարը:

Վարչապետի աշխատակազմի ղեկավարն էլ տեղեկացրեց, որ Ֆեյք դաշտի ուղղությամբ ռազմավարություն է մշակվում և հույս հայտնեց, որ իրենց կհաջողվի այդ դաշտն առողջացնել անկախ նրանից, թե այդ ֆեյքերը որտեղից են բուսնում և ում են խանգատում:

Ըստ Հարությունյանի՝դրա համար Հայաստանը, աշխարհում առաջիններից մեկն է, որ Ֆեյք նորությունների դեմ պայքարի ռազմավարություն  է մշակել, որը պետք է իրականացնի ՊՈԱԿ-ը, ինչի համար էլ վերջինիս կարողությունները պետք է մեծացվի: