Ձեր վստահելի աղբյուրը

ՀՀ երրրորդ նախագահ Սերժ Սարգսյանի նամակն ուղղված ԱՄՆ, ՌԴ և Ֆրանսիայի նախագահներին, ՀՀԿ-ականները հանձնում են ՀՀ-ում  այդ երկրների դեսպանություններին։

«Քաղաքացիական գիտակցություն» ՀԿ նախագահ Նարեկ Սամսոնյանը լրագրողների հետ զրույցում ասաց, որ Սերժ Սարգսյանի ուղերձը և ներքաղաքական, և արտաքին քաղաքական կոմպոնենտներ ունի։

«Մեզ մոտ  կա կոլաբորացիոնիստների  իշխանություն, որի կողմից վարված արտաքին ու ներքին քաղաքականությունն ընդունելի չէ մեզ համար։ Ֆրանսիացիները, ամերիկացիները, ռուսները ունեն վստահաբար այն գիտակցումը, որ մեզ մոտ հիմա գործում է  թշնամու հետ կոլաբորացիայի մեջ գտնվող իշխանություն։ Իրենք հիմա ունեն հումանիտար աղետը կանգնեցնելու հնարավորություն, քանի որ  այստեղ գործող իշխանությունները դրա վրա թքած ունեն։

Իրենք ունեն խնդիր և,  իմ կարծքիով, նախագահը շատ հստակ շեշտադրումներով վեր է  հանել բոլոր առկա բաղադրիչները, որոնք կան այս խնդրի շուրջ այս պահին»,- ասաց Ն.Սամսոնյանը։

Հարցին՝ իշխանության ներկայացուցիչների կողմից հնչում են հայտարարություններ, որ  Հայաստանը պատրաստ է  ճանաչել Ադրբեջանի տարածքային ամբողջականությունը՝ Արցախով, բայց հանրային գործընթացներ դեռևս չկան, ինչո՞ւ, Սամսոնյանն ասաց. «Քաղաքական դաշտում գործող  ուժերն այս պահի դրությամբ չեն գտնում այն բանաձևը, որով դա կարող են անել։

Հնարավոր չէ այլևս մեկ այլ գործընթաց անել, որը կգնա տապալման։ Գործընթացը   պետք է լինի մեկը և վերջնական։ Մենք հասկացանք, որ որևէ ձևով կանխելու, ինչ-որ գործողություններ թույլ չտալու համար  արվող բոլոր պրոցեսներն անիմաստ են, եթե իշխանությանն այս մարդն է։ Հիմա մենք խնդիր ունենք՝ բոլոր քաղաքական ուժերը հասկանալու, գտնելու այն ձևը, որով պետք է  մարդկանց կոնսոլիդացնեն փողոցում և այս մարդուն հեռացնեն իշխանությունից։ Բոլոր քաղաքական ուժերը դա հասկանում են, որ այլևս մի հանրահավաք անելը, երթ անելը օգուտ չի տալիս,  հակառակը՝ վնասում է։ Այսօր կա հնարավոր բոլոր անհրաժեշտ բաղադրիչները փողոցով իշխանափոխություն անելու համար։ Կարծում եմ՝ մոտակա ամիսները բավականին կարևոր են լինելու Հայաստանի ճակատագրի համար։ Մոտակա երեք ամիսներին որոշվելու է՝ Հայաստանը լինելո՞ւ է, թե՞ չէ։ Հայաստանը լինելու է այն դեպքում, եթե այս իշխանությունները հեռացված լինեն, Հայաստանը չի լինելու, եթե սրանք մնան»,- ասաց Նարեկ Սամսոնյանը։

Նա հստակեցրեց, որ խոսքը վերաբերում է իրական ընդդիմադիրներին, այն մարդկանց, որոնց կոլաբորացիոնիստական ռեժիմի հետ  որևէ պայմանավորվածություն չունեն։

«Թե ինչն է խանգարում միավորեն, ես չգիտեմ։ Միգուցե նպատակների շուրջ տարակարծությունն է խանգարում։ Երրորդ նախագահը շատ լավ է ձևակերպել՝ բոլորի համար պետք է լինի մեկ օրակարգ՝ ազատվել նիկոլական իշխանությունից։ Երբ որ բոլորի օրակարգերը կլինի նույնն այս  նպատակի շուրջ, միավորումը տեխնիկայի հարց է»,- ասաց Նարեկ Սամսոնյանը։

Նա վստահ է, որ ՀՀ  առաջին և երկրորդ նախագահները իրենց խողովաներով ևս փորձում են հնարավորինս ազդել գործընթացների վրա, պարզապես ՀՀ  երրորդ նախագահն արեց  հրապարակային։

«Լավ կլինի նրանք էլ անեն։ Բայց դա իրենց որոշելիքն է»,- ասաց Սամսոնյանը։