Ձեր վստահելի աղբյուրը

«Գրանադայում հիմնական  ձեռքբերումը երկու հայտարարություններն էին՝ քառակողմ և երկկողմ»,-Հանրային հեռուստաընկերության «Հարցազրույց» հաղորդման ժամանակ հայտարարեց Նիկոլ Փաշինյանը՝ պատասխանելով Գրանադա կատարած այցի արդյունքների մասին հարցին:

Ըստ Փաշինյանի, հանդիպումների առավելություններն այն են, որ հայտարաության մեջ ամրագրվել է, որ երկրները ճանաչում են փոխադրաձ տարածքային ամբողջականությունը, Հայաստանի և Ադրբեջանի սահմանները ճանաչվում են  1991 թվականի Ալմա-Աթայի հռչակագրի հիման վրա:

Նա կարևոր համարեց, որ հայտարարության մեջ ամրագրվել է արցախցիների իրավունքը՝ անվերապահորեն և առանց նախապայմանի վերադառնալու իրենց բնակության վայրերը:

«Արձանագրվեց և դատապարտվեց Ադրբեջանի կողմից Լեռնային Ղարաբաղի նկատմամբ ուժի գործադրումը և ժողովրդի բռնի տեղահանումը»,-ասաց Փաշինյանը և հավելեց, որ Գրանադայում արձանագրվեց ԵՄ-ի և ԱՄՆ-ի պատրաստակամությունը Հայաստնի աջակցել հումանիտար իրավիճակը կառավարելու առումով:

Ըստ Փաշինյանի՝ Գրանադայում արձանագրվեց, որ ԵՄ-ն պատրաստ է Հայաստանի հետ հարաբերությունները խորացնել այնքան, ինչքան Հայաստանը կցանկանա, կամ այնքան, ինչքան համապատասխան է Հայաստանի կարիքներին:

Անդրադառնալով Գրանադայի հանդիպումների բացերին՝ Փաշինյանն ասաց. «Բացն այն է, որ Գրանադայի առաջին հայտարարությունը քառակողմ է, ոչ թե հնգակողմ… Եթե այդ թղթի ներքո լիներ Ադրբեջանի ստորագրությունը, ես հիմա կասեի, որ մինչև տարվա վերջ խաղաղության պայմանագիր ստորագրելու հավանականությւոնը 70 %-ից ավելի բարձր էր»:

ՀՀ ոչ մի իշխանություն և ներկայացուցիչ իրավունք չունի խաչ քաշել ՀՀ այդ ինքնիշխան տարածքի վրա

«Ադրբեջանի հրապարակային դիրքորոշումներից մեկն է, որ Ֆրանսիայի դիրքորոշման հետ խնդիր ունեն, երկրորդը, որը ստուգելու հնարավորություն կլինի առաջիկայում, այն է, որ Ադրբեջանը փորձում է այնպես անել, որ խաղաղություն տեղի չունենա, մի շարք թեմաներ կան, որ նրանք պետք է և կարող են օգտագործել հետագա սրացումների, էսկալացիաների համար»,-պատասխանելով Գրանադա Ալիևի չգնալու պատճառների մասին հարցին՝ ասաց Փաշինյանը:

Նրա խոսքով՝ ոչ մի թեմայի չպետք է էմոցիոնալ մոտենալ, բոլոր պրոբլեմները, Ադրբեջանի կողմից բարձրացվող հարցերը պետք է գույքագրել և աշխարհին ու հանրությանը հասկանալի ՀՀ անվտանգության շահերից բխող դիրքորոշումներ որդեգրել:

Անդրադառնալով Ադրբեջանի բարձրացրած ութ գյուղերի հարցին՝ Փաշինյանն ասաց, որ Տավուշում կան Ադրբեջանի կողմից օկուպացված տարածքներ` Բերքաբեր, Այգեհովիտ, Վազաշեն, Պառավաքար գյուղերում:

Նրա խոսքով, դեռ 2021 թ.-ին Հայաստանն առաջարկել է վերցնել դելիմիտացիայի քարտեզը, և այդ սահմանի գծից զորքերը հետ քաշել:

Փաշինյանն ասաց, որ ԽՍՀՄ ամբողջ ժամանակաշրջանում ՀՀ տարածքի գնահատականը նույնն է` 29 800 քկմ, ու եթե տարբեր քարտեզների մեջ կան որոշակի տարբերություններ, ակա ընդհանուր պարագծի մեջ տարբերություն չկա, իսկ այդ թվի մեջ մտնում է նաև Արծվաշենը:

«29 800 քկմ մեջ մտնում է նաև Արծվաշենը: ՀՀ ոչ մի իշխանություն և ներկայացուցիչ իրավունք չունի խաչ քաշել ՀՀ այդ ինքնիշխան տարածքի վրա: Բայց այստեղ կա նաև մի կարևոր նրբություն, թե ով էլ խոսի անկլավների մասին, պետք է սեղանին դնի քարտեզ: Ենթադրենք, երբ ընդունվեց անկլավի հետ կապված պրոբլեմատիկա, դրանից հետո նոր հարցեր են ծագելու` անկլավների սահմանների դելիմիտացիայի, հասանելիության, սահմանների պաշտպանության, այդ տարածքներում ԶՈւ ներկայության և չներկայության, անցման կանոնները: Անկլավ նշանակում է` դու պետք է ուրիշի տարածքով անցնես, ինչպե՞ս պետք է անցնես, ի՞նչ իրավական նրբություն ունի այդ հարցը, և այս պրոբլեմների լուծման մի քանի տարբերակ կա, մեկն այն է, որ այս պրոբլեմները կարգավորում ենք, խաղաղության ֆոնին այդ հարցը լուծվում է, դա` մեկ, երկրորդն այն է, որ մենք տեսնում ենք` այնքան բարդ է, որ պայմանավորվածություն ենք ձեռք բերում, որ սահմանից այն կողմ գտնվող անկլավները մնում են այն երկրների տարածքում, որով պարփակված են, բայց սա էլ պետք է լինի պայմանագրի առարկա»,-հյտարարեց Փաշինյանը:

86 600 և 29 800-ը երկվորյակ թվեր են

«Երբ Ադրբեջանը ասում է, որ ճանաչում է ՀՀ տարածքային ամբողջականությունը, ուզում ենք հասկանալ` ինչ նկատի ունեն ՀՀ ասելով, որովհետև նրանց խոսույթից ոմանք եզրակացություն են անում, որ նրանք նկատի ունեն, ոչ թե 29 800 քկմ, այլ տարածքի մի մասը»,-հայտարարեց ՀՀ գործադիր մարմնի ղեկավարը:

Փաշինյանը հայտարարեց, որ փոխադրաձ տարածքների ճանաչման սկզբունքը Բրյուսելում Շառլ Միշելի ներկայությամբ համաձայնեցվել է իր և Ադրբեջանի նախագահի կողմից:

«Բայց պրոբլեմը շարունակում է մնալ այն, որ մինչև օրս Ադրբեջանի նախագահը ՀՀ 29 800 քկմ տարածքային ամբողջականությունը ճանաչելու մասին հրապարակային հայտարարություն չի արել: Մեզ ասում են` ՀՀ-ն միակողմանիորեն ճանաչել է Ադրբեջանի տարածքային ամբողջականությունը: Այստեղ միակողմանիի մասին խոսք լինել չի կարող, 86 600 և 29 800-ը երկվորյակ թվեր են, մեկը ճանաչելու համար պետք է մյուսը ճանաչել: Այս հարցին քննադատություններին նրանք, ովքեր բոլոր նրբությունները գուցե չեն կարդացել, ուզում եմ հորդորել, որ մի քիչ ավելի զգույշ լինեն»,-ասաց Փաշինյանը:

Նա հայտարարեց, որ պետք է թույլ չտալ, որ որևէ հարց դառնա հետագա էսկալացիայի հիմնավորում՝ հավելելով. «Մեր խնդիրն է` թույլ չտալ էսկալացիա, դրա համար չպետք է մտածենք հարցերը հետաձգելու, խճողելու, անհասկանալի դարձնելու մասին, հակառակը, պիտի իսկապես գնանք լուծումների, բայց դրանք պետք է լինեն հիմնավոր և թափանցիկ մեր հանրության համար` դավադրությունների տեսությունը բացառելու համար»:

Հայաստանը չի վերանայել հարաբերությունները Ռուսաստանի հետ

«Խնդիրը մեր և ՌԴ-ի մեջ չէ, խնդիրն այլ, մեծ տերությունների հարաբերությունների մեջ է։ ՌԴ-ի հետ մեր հարաբերություններում ոչինչ չենք չեղարկել, ոչ մի տեղից դուրս չենք եկել։ Մենք երբեք չենք թաքցրել նաև այն խնդիրները, որոնք ունեցել ենք»,-հայտարարեց Փաշինյանը։

Նրա խոսքով՝ հայաստանը չի հրաժարվում իր պարտավորությունները կատարելուց,  և վերջին 20-30 տարիների ընթացքում պարբերաբար որոշակի դժվարություններ են առաջացել հարաբերություններում, սակայն բոլոր հարցերը լուծվել են։