Ձեր վստահելի աղբյուրը

ՀՀ վիճակագրական կոմիտեի հրապարակած վերջին «Սպառողական գների ինդեքսը ՀՀ-ում 2024 թվականի հունվարին» տեղեկագրից պարզվում է, որ ամենաշատ գնաճը գրանցվել է «Տրանսպորտ» բաժում՝ 9.2 %։ Այս բաժնի ենթաբաժիններում զետեղված անձնական փոխադրամիջոցների շահագործումը թանկացել է 9.3 %-ով, բենզինը՝ 38.4%-ով, տրանսպորտի ծառայությունը՝ 10.6%-ով,  իսկ ահա նույն անվանումը՝ «Անձնական փոխադրամիջոցների հետ կապված այլ ծառայություներ» ունեցող երկու տողերում արձանագրված է, որ 2024 թվականի հունվարին՝ 2023 թվականի հունվարի համեմատ գրանցվել է  համապատասխանաբար 208.6% և 243.8 % գնաճ։

Հրապարակված ցուցանիշների վերաբերյալ Panorama.am-ը հարցեր ուղղեց  «Վարորդի ընկեր»  ԻՀԿ նախագահ Տիգրան Քեյանին։

«Հայաստանում ամեն ինչն է թանկանում և բնականաբար, եթե այդ սպասարկող անձնակազմերը ապրում և իրենց ընտանիքի կարիքներն հոգում են Հայաստանում գնվող ապրանքներից, իսկ դրանք թանկացել են, ապա իրենք էլ են թանկացրել իրենց մատուցած ծառայությունների արժեքը, որ իրենք էլ կարողանան ապրել։

Հայաստանում թանկանում է ամեն ինչ և բնականաբար ծառայություններն էլ այդ ֆոնին պետք է թանկանան։ Վիճակագրական տվյալները չեն կարող լինել հավաստի, քանի որ մարդկանց պարտադրված է հաշվետվություն ներկայացնել, ինչ թիվ ուզեն՝ կլրացնեն, կուղարկեն, ոչ մեկը չի ստուգում։

Հստակ տվյալներ կարող են լինել միայն այն գործարքները, որոնք ենթակա են պետական գրանցման, օրինակ բնակարանների գնման գործընթացն 99.9 %-ով  ճիշտ է։ Որովհետև այդ ամենը պետականորեն գրանցվում է, գույքի սեփականության վկայական է տրվում և չի կարող այնտեղ ձևական տան վաճառքի թիվ լրացվի։ Բայց եթե տնտեսվարողը տեխնիկական սպասարկման ոլորտում է գործունեություն ծավալում և այս ամիս իրականացրել է ասենք՝ 1 մլն դրամի ծառայություն և գրել է 5 մլն, դրա հետ կապված որևէ պատասխանատվության չի ենթարկվում։

Նախորդ տարի գազաբալոնների սպասարկման պարտադիր ծառայությունն է ավելացել, բայց այդ ծառայության հսկողությունն այդպես խիստ չի արվում, ինչ նախկինում պետք է արվեր, քանի որ շատերն ասում էին, որ գազաբալոնների ստուգումը սխալ է, շատերը տվել են ստուգման, իսկ շատերը ոչ։ Այդ  ծառայությունն 10 հազար դրամ է և չի կարող էական բան ավելացնել վիճակագրական թվերում։

Այո, վառելիքի գները բարձրացել են և հնարավոր է վիճակագրական ցուցանիշներում այն զգալի տոկոս ապահովի։ Բենզինի գները իջել էին 350 դրամ, հետո բարձրացան, հասան 520-40 դրամ, հիմա իջել են 490 դրամ։

Պահեստամասերի գները չեն կարող Հայաստանում ավելի բարձրանալ, քանի որ բոլորը կարողանում են օգտվել Միջազգային շուկայից և ցանկացած քաղաքացի կարողանում է համացանցի միջոցով ձեռքբերումներ իրականացնլ, միակ բանը, որ չես կարողանում ձեռք բերել համացանցից՝ քսայուղերն են, իսկ միջին վարորդն կարող է տարեկան առավելագույնը 2 անագմ փոխել քսայուղերը, քանի որ այն փոփոխվում է 7-10 հազար կիլոմետր վարելուց հետ, իսկ տարեկան 24 հազար ԿՄ-ից ավել վազք չի կատարվում, եթե վարորդը տաքսի չի վարում, կամ առաքիչ չէ։ Բայց այդ ոլորտի մարդիկ մատչելի յուղեր են օգտագործում։

Վիճակագրական կոմիտեից Panorama.am-ին հայտնեցին, որ 243.8 %  գնաճը հիմնականում կախված է կարմիր գծերի վճարների թանկացման, որ այդ տողերը վերաբերում են կայանման ծառայություններին։