Ձեր վստահելի աղբյուրը

«Նարեկ Սամսոնյանի նկատմամբ քրեական հետապնդումն ունի խտրական բնույթ ու քաղաքական ենթատեքստ»,-այսօր Երևանի քրեական դատարանում՝ դատավոր Տիգրան Ոսկանյանի նախագահությամբ տեղի ունեցած դատական նիստում հայտարարեց հասարակական գործիչ Նարեկ Սամսոնյանի փաստաբան Ռուբեն Մելիքյանը։

Նա ընդգծեց՝ Սամսոնյանի նկատմամբ հետապնդումն իրականացվում է  հանցավոր բնույթ չունեցող խոսքի համար, խտրական ձևով, քաղաքական շարժառիթով։ Փաստաբանը նաև ասաց՝ այսօր դատարանում փորձելու են ոչ թե դա հիմնավորել, այլ դատախազի կողմից ներկայացված մեղադրանքներին հակափաստարկներ ներկայացնել։

Ռ. Մելիքյանը նշեց, որ Սամսոնյանը ԱԺ պատգամավոր Մհեր Սահակյանի արարքը ներկայացրել է որպես ինքնապաշտպանություն, ինչի մասին 4.5 րոպեի ընթացքում հինգ անգամ  «Իմնեմնիմի» փոդքասթ հաղորդավարները բարձրաձայնել են, որից երեք անգամ՝ Սամսոնյանը։

Փաստաբանն ընդգծեց, որ Նարեկ Սամսոնյանը մշտապես իր հրապարակային ելույթներում խոսում է քաղաքական գործընթացներում բռնության բացառման անհրաժեշտության մասին, ոչ թե այն բանի համար, որ օրենքով արգելված է, այլ սխալ է։

Մելիքյանը հիշեցրեց, որ ԱԺ-ում ՄԻՊ թեկնածուի քննարկման ժամանակ իշխանական պատգամավորներն օգտագործել են ատելության խոսք, մինչդեռ կայացվել է որոշում քրեական վարույթ չնախաձեռնելու մասին։ Իսկ Սամսոնյանի մասով սկզբունքային հակառակ որոշում է կայացվել։

Նարեկ Սամսոնյանն իր խոսքում նշեց՝ հաշվել է, որ 2018-2024 թվականների ընթացքում շուրջ 60՝ իսկ ավելի հստակ 56 անգամ ինքը բերման է ենթարկվել տարբեր տեսակի իրավախախտումների համար։

«Եղել է զենք-զինամթերք կրելու կասկածանքով։ Չկա նման բան։ Երեք օր անցկացրել եմ ՁՊՎ-ում, հետո դատարանը որոշել է՝ ձերբակալումն ապօրինի է։ Յոթ անգամ տրվել է իմ նկատմամբ քրեական հետապնդում հարուցելու հաղորդում։ Յոթից երեքը բավարարվել է, մեկը սա է»,-ասաց Սամսոնյանը, երբ նրան ընդհատեց դատավորը՝ հույս հայտնելով, որ վիճակագրությունը երկար չէ, վարույթի վերաբերյալ է, հակառակ դեպքում կընդհատի նրան։

Սամսոնյանն ասաց՝ կարճ է, բայց իր փիլիսոփայական մոտեցումը հստակ է, եթե համարի, որ որևէ օրենք որպես քաղաքացի իր համար խախտելու ենթակա է՝  կխախտի ու դրա համար պատրաստ կլինի կրել պատասխանատվություն։

«Սա իմ կյանքի փիլիսոփայությունն է։ Այդ պատճառով բոլոր մեղադրանքներն ինձ համար վիրավորական են եղել, որևէ մեկի տակ փաստական հիմք չի եղել»,-ասաց Սամսոնյանը։

Նա ընդգծեց, որ ներգրավված լինելով քաղաքական գործընթացներում՝ միշտ գիտակցել է իր խոսքի համար պատասխանատվությունը, եղել է շատ ուշադիր իր խոսքի նկատմամբ։

«Ես նայել եմ, բոլոր մեղադրանքները եղել են չխախտած օրենքի համար առերևույթ քաղաքական հետապնդում։ Սա ևս այդ ժանրից է։ Ես ունեմ հանգստություն, ես հանգիստ քնում եմ գիշերները, իմ երեխաների աչքերին նայում եմ ուղիղ, գլուխս չեմ կախում։ Ես ուզում եմ, որ ապագայում բոլոր որոշում կայացնող մարդկանց խիղճը հանգիստ լինի։ Ես պատրաստ եմ իմ կատարած հանցանքի համար պատասխանատվություն կրել, բայց ես հանցանք չեմ գործել։ Իմ խիղճը հանգիստ է, ես իմ գլուխը գիշերը հանգիստ եմ դնում բարձին»,-նշեց նա։

Դատարանը հեռացավ առանձին  սենյակ՝ վերդիկտ կայացնելու։ Վերադառնալուց հետո պարզ դարձավ, որ դատարանը կայացրել է արդարացման վերդիկտ։

«Մենք ունեցանք արդարացման վերդիկտ, սրանով դատավարությունը չի ավարտվել, լինելու են դատալսումներ՝ ռեաբիլիտացիայի, խափանման միջոցի հետ կապված հարցերը քննարկելու համար, լսումները նշանակվեցին մարտի 25-ին։ Ուրախալի է իհարկե, որ կայացվեց արդարացման վճիռ, երբ դրական ծիլեր, զարգացումներ ենք տեսնում, ուրախանում ենք։ Սա դրա դրսևորումներից է»,-վերդիկտի հրապարակումից հետո լրագրողների հետ զրույցում ասաց փաստաբան Ռուբեն Մելիքյանը։

Հիշեցնենք, որ մեղադրական եզրակացության համառոտ եզրակացության համաձայն, Նարեկ Սամսոնյանին մեղադրանք է առաջադրվել այն բանի համար, որ նա տեղեկատվական տեխնոլոգիաների օգտագործմամբ, քաղաքական հայացքներով պայմանավորված հանդես է եկել բռնություն գործադրելու հրապարակային կոչով, հրապարակայնորեն արդարացրել է բռնությունը.

«01.04.2023թ. «AntFake.am» կայքում հրապարակվել է ««զարկեց ճակտին, փռեց գետնին», ում պռոեկտն է էդգար Ղազարյանը. «իմնեմնիմի» փոդքասթ #05»», վերտառությամբ տեսագրությունը, որում առկա են բռնության կոչ ու բռնության արդարացում, որով Նարեկ Սամսոնյանը պատգամավորներին հորդորում է հետևել պատգամավոր Մհեր Սահակյանի օրինակին, մասնավորապես նշելով, որ «Կատաղած շանը կանխելու համար կան ոչ ֆիզիկապես սպանելու օրինակներ»: Մասնավորապես, հաղորդման ընթացքում Նարեկ Սամսոնյանի կողմից հնչեցվել են հետևյալ արտահայտությունները' «Ես ուզում եմ ասել, որ ես աջակցում եմ Մհերին, Մհերի արածը ողջունում եմ, բավականին բարձր եմ գնահատում Մհերի արածը, որովհետև Մհերը արել է մի բան, ինչը վաղուց պետք էր անել և ինչը ընդհանրապես պետքա հաճախ անել» և «ես շուտափույտ ազատություն եմ մաղթում Մհերին, ողջունում եմ նրան, տոկունություն եմ մաղթում և հորդորում եմ մնացած պատգամավորներին, ևս հետևել Մհեր Սահակյանի օրինակին: Թույլ մի տվեք շները Ձեր վրա հարձակվեն և կծեն: Կատաղած շանը նախականխելու համար կան բազմաթիվ ոչ, հա՞, ֆիզիկապես սպանելու օրինակներ, մեկը Մհերը Ձեզ բոլորիդ ցույց է տվել»: