Ձեր վստահելի աղբյուրը

Ռուսաստանի փոխվարչապետ Արկադի Դվորկովիչը հայտարարել է, որ Ռուսաստանը և Չինաստանը նպատակ ունեն Վլադիմիր Պուտինի՝ մայիսին Չինաստան կայանալիք այցին ընդառաջ արագացնեն էներգետիկ ոլորտում պայմանագրերի ստորագրման գործընթացը:

Դվորկովիչը երկօրյա աշխատանքային այցով գտնվում է Պեկինում և հանդիպումներ է ունեցել Չինաստանի փոխվարչապետ Չժան Գաոլիի հետ: ՌԴ-ի փոխվարչապետի հետ Չինաստան են ժամանել ռուսական ամենախոշոր ընկերությունների՝«Գազպրոմի», «Ռոսնեֆտի», «ՆՕՎԱՏԷԿ»-ի, «Ռուսալի» պատվիրակությունները:

Ա.Դվորկովիչը նշել է, որ չինական կողմի հետ քննարկվել է Ռուսաստանից արևելյան ուղղությամբ դեպի Չինաստան գազի առաքման հարցերը, իսկ «Ռոսնեֆտը» նպատակ ունի ավելացնել Չինաստան ծովային ճանապարհով առաքվող նավթի ծավալները մի քանի միլիոն տոննայով: 

Ռուսական պատվիրակության կազմում Չինաստան ժամանած «Գազպրոմ» ընկերության նախագահ Ալեքսեյ Միլերը հանդիպել է չինական CNPC ընկերության տնօրենների խորհրդի նախագահ Չժոու Ցզիպինի հետ և կողմերը առաջընթաց են գրանցել Չինաստան ռուսական գազի արտահանման բանակցություններում:

«Գազպրոմը» գազի առաքման հետ կապված բանակցություններ է վարում Չինաստանի հետ 10 տարի:Նախորդ տարի կողմերը պայմանավորվել են 30 տարվա պայմանագիր կնքել, որով ՌԴ-ի Բլագովեշենսկ քաղաքով դեպի Չինաստան տարեկան պետք է արտահանվի 38 մլրդ խմ գազ: Սակայն պայմանագիրը այդպես էլ չստորագրվեց՝գնի հետ կապված տարաձայնությունների պատճառով:

Կողմերը այժմ ցանկանում են արագացնել բանակցությունները և կոնկրետ պայմանագրեր կնքեն մինչև Պուտինի մայիսյան այցը Չինաստան: 

Պուտինը փետրվարին Սոչիում Չինաստանի առաջնորդ Սի Ձինպինի հետ կայացած հանդիպման ժամանակ գնահատելով ռուս-չինական արդի հարաբերությունները նշել էր, որ համատեղ նախագծերի կյանքի կոչման շնորհիվ երկկողմ ապրանքաշրջանառությունը կհասնի 100 միլիարդ դոլարի, իսկ միջնաժամկետ հեռանկարում՝150 միլիարդ դոլարի:

Իր հերթին, Չինաստանի առաջնորդը նշել էր, որ ռուս-չինական հարաբերությունները աշխարհում ամենակարևոր հարաբերություններից են և դրանք ոչ միայն համապատասխանում են իրենց շահերին, այլ նաև հանդիսանում են աշխարհում բալանսի երաշխավորը:

Ստորագրվել էին կարևոր փաստաթղթեր նավթագազային ոլորտում՝ ՌԴ-ից Չինաստան էներգակիրների արտահանման հետ կապված: ՌԴ-ը պարտավորվել էր ավելացնել Չինաստան առաքվող նավթի ծավալները, որոնք այս պահին հասնում են տարեկան 15 միլիոն տոննայի:

Բացի այդ, կողմերը համագործակցելու են նաև Տյանցինյան նավթավերամշակման և նավթաքիմիական գործարանի շինարարության և համատեղ շահագործման շուրջ:

«Ռոսնեվտ» ընկերության նախագահ Իգոր Սեչինը հայտարարել էր, որ ընկերությունը կավելացնի նավթի առաքումները Չինաստան՝ ներկա 15 միլիոն տոննայից մինչև տարեկան 50 միլիոն տոննայի:

Չինաստանի գլխավոր պետական մաքսային ծառայության տվյալներով, ՌԴ-Չինաստան ապրանքաշրջանառությունը 2013թ.-ին ավելացել է 1.1%-ով և հասել է 89.1 միլիարդ դոլարի:

Չինաստանի արտահանումը դեպի ՌԴ նախորդ տարի ավելացել է 12.6%-ով և հասել 49.59 միլիարդ դոլարի, ՌԴ-ից ներմուծումը նվազել է 10.3%-ով և հասել է 39.62 միլիարդ դոլարի:

Ռուսաստանը Չինաստան է արտահանում հիմնականում հումք՝ նավթը, նավթամթերքները և այլ հումքը կազմել է Չինաստան արտահանման 67.8%-ը, 7%-ը բաժին է ընկնում անտառափայտին:

Չինաստանը Ռուսաստան է արտահանում մեքենաներ և սարքավորումներ՝ 45%, կաշվից պատրատսված իրերի արտահանումը ավելացել է 66%-ով, տեսքտիլը՝ 58%-ով:

Այս տարվա հունվար ամսին երկկողմ ապրանքաշրջանառությունը հասել է 8.534.59 միլիոն դոլարի, ինչից ռուսական արտահանումը՝3. 642.45 միլիոն, իսկ ներկրումը՝892.14 միլիոն դոլար:
ՌԴ-ը Չինաստանի 20 առևտրային գործընկերների թվում զբաղեցրել է 9-րդ տեղը: 

Արտյոմ Բալասանով