Ձեր վստահելի աղբյուրը

Չինաստանի առաջնորդ Սի Ձինպինը հուլիսի 15-23-ը պետական այցեր է կատարելու Բրազիլիա, Արգենտինա, Վենեսուելա և Կուբա: Չինաստանի նախագահի այցը Լատինական Ամերիկա նոր էջ է բացելու լատինաամերիկյան երկրների և Պեկինի միջև փոխհարաբերություններում:

Նախատեսվում է, որ Չինաստանի ղեկավարի այցի ընթացքում Պեկինի և վերոնշյալ երկրների միջև ստեղծվելու է Չինաստանի և լատինաամերիկյան ու կարիբյան երկրների միավորումը: Այս տարի Պեկինում տեղի կունենա նոր կազմակերպության նախարարական առաջին ժողովը:

Չինաստանը և Լատինական Ամերիկան վերջին տասնամյակի ընթացքում ակտիվացրել են երկկողմ տնտեսական կապերը: Եթե 2000թ.-ին Չինաստանի և լատինաամերիկյան երկրների միջև ապրանքաշրջանառությունը կազմում էր 12.6 միլիարդ դոլար, ապա 2013թ.-ին այդ ցուցանիշը հասավ 261.5 միլիարդ դոլարի:

Չինաստանի ղեկավարությունը հույս ունի մինչև 2017թ.-ը ապրանքաշրջանառության մակարդակը հասցնել 400 միլիարդ դոլարի: Պեկինը լատինաամերիկյան երկրներում կառուցում է քաղաքներ, ավտոճանապարհներ և երկաթուղիներ, ինչպես նաև ներդրումներ է կատարում Լատինական Ամերիկայի բնական ռեսուրսներով հարուստ երկրներում:

Լատինական Ամերիկայի երկրները Չինաստանին ապահովում են գյուղատնտեսական ապրանքներով: 

Չինաստանը մրցակցելով ԱՄՆ-ի հետ Լատինական Ամերիկայի ռեսուրսներին տիրելու և իր աշխարհաքաղաքական ազդեցությունը մեծացնելու համար, սկսել է շեշտը դնել տնտեսական համագործակցության ակտիվացման վրա: 2009թ.-ին Չինաստանը դարձել է Բրազիլիայի և Չիլիի գլխավոր արտահանման շուկան:

Այս պահի դրությամբ Չինաստանը հանդիսանում է Բրազիլիայի, Չիլիի և Պերուի առաջին տնտեսական գործընկերը, իսկ Արգենտինայի համար՝ երկրորդը: Լատինական Ամերիկայի երկրների դեպի Չինաստան արտահանման 60%-ը կազմում է հումքը, իսկ ներկրումը՝ պատրաստի արտադրատեսակները:

Վերջին տարիների ընթացքում Չինաստանը ավելացրել է իր ներդրումները Լատինական Ամերիկայի երկրներում: Պեկինը հիմնական ներդրումները ուղղում է դեպի այդ երկրների նավթագազային ոլորտ:

Նավթագազային ոլորտում Պեկինը համաձայնագրեր է ստորագրել Բրազիլիայի և Վենեսուելայի հետ: Բացի այդ, 2007թ.-ին չինական «Chery» ավտոարտադրող ընկերությունը իր առաջին գործարանը բացեց Ուրուգվայում, իսկ 2010թ.-ին նույնատիպ գործարանի կառուցման համաձայնագիր է ստորագրվել Բրազիլիայի հետ:

Տնտեսությանը զուգահեռ ակտիվ են քաղաքական հարաբերությունները: Դեռևս 2001թ.-ին Չինաստանի այն ժամանակվա նախագահ Ցզյան Ցզեմինը պատմական շրջագայություն կատարեց Չիլի, Արգենտինա, Ուրուգվայ, Բրազիլիա, Վենեսուելա և Կուբա: 2004թ.-ին Լատինական Ամերիկայում էր արդեն Հու Ձինթաոն:

Լատինական 5 երկրների՝ Բրազիլիայի, Վենեսուելայի, Մեքսիկայի, Արգենտինայի և Պերուի հետ Չինաստանը հաստատել է ռազմավարական հարաբերություններ: 

Լատինական Ամերիկայի ինստիտուտի Իբերիական հետազոտությունների կենտրոնի ղեկավար Պյոտր Յակովլևի կարծիքով, վերջին 10-12 տարվա ընթացքում Չինաստանը դարձել է Լատինական Ամերիկայի երկրների տնտեսական աճի շարժիչ ուժը: Նրա խոսքով, Չինաստանը հանդիսանում է լատինաամերիկյան նավթի, պողպատի և այլ հումքի խոշորագույն գնորդը:

Պ.Յակովլևը նշել է, որ Չինաստանի և ԱՄՆ-ի շահերը բախվում են Լատինական Ամերիկայում, սակայն ԱՄՆ-ը զգուշանում է Չինաստանից ավելի շատ, քան թե Լատինական Ամերիկան է զգուշանում ԱՄՆ-ից:

Յակովլևի կարծիքով, առանց Չինաստանի կողմից լատինաամերիկյան հումքի գնման և մեծ ֆինանսական ներդրումների՝ Լատինական Ամերիկայի երկրների տնտեսությունները մեծ դժվարությունների հետ կբախվեն:

Արտյոմ Բալասանով