Ձեր վստահելի աղբյուրը

Սահմանադրական բարեփոխումների մասնագիտական հանձնաժողովի քիչ առաջ հրապարակած Սահմանադրության նախնական տարբերակում 6-րդ գլուխը վերաբերում է ՀՀ կառավարությանը, որը սահմանվում է որպես գործադիր իշխանության բարձրագույն մարմին:

Կառավարությունը կազմված է վարչապետից, փոխվարչապետներից և նախարարներից: Նախարարությունների թիվը չի կարող գերազանցել 18-ը:

148-րդ հոդվածը սահմանում է վարչապետի ընտրությունը և նշանակում. Ըստ այդմ, Հանրապետության նախագահը նորընտիր Ազգային ժողովի լիազորությունների ժամկետն սկսվելուց հետո՝ եռօրյա ժամկետում վարչապետ է նշանակում ԱԺ ընտրություններում հաղթած կուսակցության կամ կուսակցությունների դաշինքի ներկայացրած վարչապետի թեկնածուին:

Վարչապետի կողմից հրաժարական ներկայացվելու կամ վարչապետի պաշտոնը թափուր մնալու դեպքում կառավարության հրաժարականն ընդունվելուց հետո7-օրյա ժամկետում ԱԺ նախագահը պատգամավորական տեղերի բաշխման և պատգամավորական խմբակցությունների հետ խորհրդակցությունների հիման վրա առաջարկում է պատգամավորների մեծամասնության վստահությունը վայելող վարչապետի թեկնածուին: ԱԺ-ն վարչապետին ընտրում է պատգամավորների ընդհանուր թվի ձայների մեծամասնությամբ:
Վարչապետ չընտրվելու դեպքում քվեարկությունից յոթ օր հետո անցկացվում է քվեարկության 2-րդ փուլ, որին մասնակցելու իրավունք ունեն խմբակցությունների կողմից առաջարկված վարչապետի թեկնածուները: Եթե պատգամավորների ընդհանուր թվի ձայների մեծամասնությամբ վարչապետ չի ընտրվում, ապա Ազգային ժողովն արձակվում է իրավունքի ուժով:

Վարչապետի քվեարկությունն անցկացվում է անվանական քվեարկությամբ: ՀՀ նախագահն ԱԺ-ի կողմից ընտրված թեկնածուին նշանակում է վարչապետ:

Վարչապետը և կառավարության անդամները ԱԺ նիստում, ՍԴ նոր տարբերակով, երդվելու են Ազգային ժողովի նիստում:

Սահմանադրության նախնական տարբերակը կդրվի հանրային քննարկման: Քննարկման դրվելիք փաստաթուղթը դարձյալ կարող է փոփոխության ենթարկվել, եթե ընդունելի առաջարկներ ներկայացվեն: Քննարկումների փուլը կավարտվի մինչև հուլիսի վերջ, կներկայացվի հանրապետության նախագահին և եթե նախագահը հաստատեց, օգոստոսին միայն կներկայացվի Ազգային ժողով:

Նախորդող նորություններ`
Նոր Սահմանադրությունն առաջարկում է ՀՀ նախագահին ընտրել 7 տարի ժամկետով
Հրապարակվել է Սահմանադրության 1-7 գլուխների նախագծի նախնական տարբերակը