ՀԱԿ-ը, այնուամենայնիվ, մասնակցում է Սահմանադրության փոփոխությունների բովանդակային քննարկումներին
Այսօր Ազգային ժողովում սահմանադրական փոփոխությունների վերաբերյալ խորհրդարանական լսումների ժամանակ Հայ Ազգային կոնգրես խմբակցության ղեկավար Լևոն Զուրաբյանը հայտարարեց, որ ՀԱԿ-ը մերժել է Սերժ Սարգսյանի հանդիպելու առաջարկը, ինչպես նաև Սահմանադրական բարեփոխումների մասնագիտական հանձնաժողովի անդամների հետ Նախագիծը քննարկելու առաջարկը:
«Մենք շատ լավ հասկանում ենք, թե ինչ հանցավոր գործընթաց եք անում ու ինչ նպատակով: Բայց առեղծվածային հարցի մասին կուզենայի բացատրություն տայիք: Հասկանում եմ, որ Հայաստանը ուզում եք տանել խորհրդարանական համակարգ, որտեղ նախագահը արարողակարգային ֆիգուր է:Բայց ես երեկ մի քսան երկրի սահմանադրություն կարդացել եմ ու որևէ Սահմանադրության մեջ չկա այնպիսի բան, որ նախագահը չունենա լիազորություն առաջադրել վարչապետին: Մինչդեռ ձեր ներկայացրած նախագծում նախագահը չունի նման լիազորություն և այդ հնարավորությունը տրված է ԱԺ նախագահին: Հետաքրքիր է, թե ինչու Վենետիկի հանձնաժողովը չի անդրադարձել այս հարցին: Կամ դուք խաբեբա եք և ներկայացրել եք Հանձնաժողովին նախագծի կեղծ թարգմանություն, կամ Վենետիկում փաստաթուղթը կարդալ չգիտեն: Պարզաբանեք այս այռեղծվածը», -դիմելով լսումների ժամանակ նախագիծը ներկայացնող սահմանադրագետ Վարդան Պողոսյանին ու Հրայր Թովմասյանին, հայտարարեց Լևոն Զուրաբյանը:
Լսումների կազմակերպիչ և վարող ԱԺ պետական-իրավական հանձնաժողովի նախագահ Հովհաննես Սահկայանը շնորհակալություն հայտնեց ՀԱԿ խմբակցության ղեկավարին, այնուամենայնիվ սահմանադրական բարեփոխումների վերաբերյալ բովանդակային քննարկման մեջ մտնելու համար:
«Շնորհակալ ենք, որ փոփոխություն եք մտցրել ձեր վարքագծում և մասնակցում եք քննարկումներին», -նկատեց Սահակյանը:
Սահմանադրագետ Վարդան Պողոսյանն ի պատասխան Զուրաբյանի, նախ հորդորեց թողնել վիրավորելը և վիրավորական արտահայտությունները «պահեք ձեզ», այնուհետև նկատեց, որ Զուրաբյանը լավ չի հետևել Վենետիկի Հանձնաժողովի պաշտոնական կայքին, հակառակ դեպքում կարող էր տեսնել այն, ինչ կա ներկայիս Նախագծի տեքստում ու նման հարց պատգամավորի մոտ չէր առաջանա:
Ինչ վերաբերում է բուն հարցին, թե ինչու է վարչապետի թեկնածության առաջադրումը վերապահված է ոչ թե ՀՀ նախագահին, այլ ԱԺ նախագահին, ապա Պողոսյանը նկատեց. «Մենք պառլամենտական որևէ երկրի տրամաբանությունից չենք շեղվել: Ինչու է առաջադրում ԱԺ նախագահը: Մենք նախատեսել ենք, որ ԱԺ նախագահը խորհրդակցությունններ է սկսում պառլամենտական ուժերի հետ և թեկնածություններ է խնդրում առաջադրել»:
Նախորդիվ`
Սահմանադրության նախագծով փոքրամասնության ձայնը լսելի է դառնալու. Սահմանադրագետ
Պողոսյանը` «կայուն մեծամասնության» և 2-րդ փուլով ընտրություններ անցկացնելու մասին