Ձեր վստահելի աղբյուրը

Վենետիկի հանձնաժողովի կարծիքներն ու առաջարկությունները պարտադիր չեն և խորհրդատվական բնույթ են կրում: Այդ մասին այսօր լրագրողների հետ ճեպազրույցում հայտարարեց Վենետիկի հանձնաժողովի նախագահ Ջիանի Բուքիքիոն: 

«Վենետիկի հանձնաժողովին Հայաստանից խնդրել էին գնահատական ներկայացնել գործընթացին, Սահմանադրության փոփոխությունների նախագծին, և մենք դա կատարեցինք: Այժմ, կարելի է ասել, խոսքը պատկանում է հայ հասարակությանը», -հայտարարեց Հանձնաժողովի նախագահը, որն այս օրերին գտնվում է Երևանում և մասնակցում է Սահմանադրական դատարանների գործունեության մասին միջազգային խորհրդաժողովին:

Փորձագետի խոսքով, իր ղեկավարած հանձնաժողովի համար ի վերջո կարևոր է, որ սահմանադրական բարեփոխումների գործընթացը համահունչ լինի եվրոպական ստանդարտներին:

Դիտարկմանը, թե Հայաստանում արմատական ընդդիմությունը, որոշ իրավապաշտպաններ, ինչպես նաև Հայաստանի նախկին երկու նախագահները դեմ են Սահմանադրության փոփոխությունների նախագծին, Ջիանի Բուքիքիոն ի պատասխան հիշեց Լևոն Տեր-Պետրոսյանին ու Ռոբերտ Քոչարյանին, ասաց, որ նրանց հետ հանդիպել է նախկինում ու ավելացրեց.

«Հայաստանի Սահմանադրական զարգացումներին ես հետևել եմ շատ հին ժամանակներից, բայց ավելի հստակ 2001 թվականից: Հանդիպել եմ, թե Լևոն Տեր-Պետրոսյանի հետ, թե Ռոբերտ Քոչարյանի հետ` 2003-ին, երբ նախաձեռնվել էին Սահմանադրական բարեփոխումներ: Այն ժամանակ Ռոբերտ Քոչարյանը ցանկանում էր կառավարման համակարգի մոդել ընտրել կիսանախագահականը, մինչդեռ ընդդիմության ներկայացուցիչները ընդդիմանում էին և ցանկանում էին, որ Հայաստանում խորհրդարանական համակարգ ներդրվի: Այն ժամանակ տեղի ունեցավ հանրաքվե, բայց բարեփոխումներ տեղի չունեցան, չստացվեց: Հետագայում մեզ հետ համագործակցություն տեղի ունեցավ էլ ավելի արդյունավետ մակարդակի վրա և փոփոխություններ տեղի ունեցան, որը բավականին լավ քայլ էր դեպի ժողովրդավարություն: 2013-ին ևս եղավ բարեփոխումների նոր նախաձեռնություն: Միշտ երկրներում, այդ թվում Հայաստանում, լինելու են կողմ և դեմ կարծիքներ: Մեզ համար կարևոր է, որ գործընթացը լինի միջազգային ստանդարտներին համահունչ, և ես հույս ունեմ, որ Հայաստանում ժողովրդավարությունը շատ ավելի լավ կլինի մոտ ժամանակներս»:

Պատասխանելով իշխանության գերկենտրոնացվածության ու խորհրդարանում կայուն մեծամասնության մասին հարցին, Բուքիքիոն ասաց, որ պետք չէ կենտրոնանալ իշխանությունների գերկենտրոնացման վրա, այլ «պետք է կենտրոնանալ իշխանությունների անկախության վրա և յուրաքանչյուրի գործառույթների կատարման վրա»:

Ինչ վերաբերում է «կայուն մեծամասնություն» եզրույթին, ապա ՎՀ նախագահը նկատեց, որ կիսանախագահական կառավարման համակարգից խորհրդարանական համակարգին անցումն ի վերջո որոշակի գործընթացներ ենթադրում է:

«Խորհրդարանում մեծամասնությունը և համամասնական ընտրակարգով ընտրությունների անցկացումը հենց երաշխիք է, որ կիսանախագահականից խորհրդարանական համակարգին անցումը անվտանգ ապահովվի», -հավելեց ՎՀ նախագահը:

Անդրադառնալով խորհրդարանական ընտրությունները 2-րդ փուլով անցկացնելու գաղափարին, Բուքիքիոն հիշեցրեց, որ Վենետիկի հանձնաժողովն իր տված եզրակացության մեջ նշել էր, որ 2-րդ փուլ անցկացնելու գաղափարը Սահմանադրության մեջ ամրագրելը «նախընտրելի մոտեցում չէ», այլ պետք է կարգավորվի Ընտրական օրենսգրքի շրջանակներում:

«Մեր այդ առաջարկությունը Սահմանադրական բարփոխումների մասնագիտական հանձնաժողովն ընդունեց: Մենք ճիշտ է, Նախագծի վերջնական տարբերակը չունենք, բայց 2-րդ փուլի վերաբերյալ կատարված փոփոխությունը մեզ արդեն փոխանցվել է: Վենետիկի հանձնաժողովը գոհ է այն առումով, որ այդ հարցում ճկունության տեղ թողնվեց, և հարցը կկարգավորվի Ընտրական օրենսգրքի շրջանակներում», -հավելեց Բուքիքիոն: