Ձեր վստահելի աղբյուրը

ԱԺ հերթական քառօրյայի նիստն այսօր մեկնարկեց վերակառուցված դահլիճում: Պատգամվորները հենց սկզբից պարզեցին, որ իրենց առջև դրված նոր խոսափողները չեն աշխատում: Ստիպված էին դահլիճ բերել հին բարձրախոսները, որոնց մոտենալու համար խորհրդարանականները պետք է նեղություն քաշեն շարքից դուրս գան, ու իրենց կարծիքն էլ հոտնկայս հայտնեն:
Երբ եկավ գրանցվելու պահը, պատգամավորները պարզեցին, որ նոր սենսորային համակարգչից չեն կարողանում օգտվել: ԱԺ նախագահ Հովիկ Աբրահամյանը շտապեց հանգստացնել գործընկերներին: «Առաջին օրն է, պետք է սովորենք»,-ասաց նա, ապա հորդորեց կրկին գրանցում անցկացնել:

ՀՀԿ-ական Համլետ Հարությունյանի համար նոր տեխնիկան անսովոր էր ու անհարմար: Դրա մասին նա բարձրաձայն դժգոհեց: ԱԺ նախագահն էլ ի պատասխան նկատեց, թե նա կարող էր կես ժամ շուտ գալ ու տեխնիկային ծանոթանալ:

Քվեարկությունն էլի հարթ չընթացավ: ԱԺ խոսնակը ստիպված էր ներկայացնել քվեարկության կարգը` նախ պետք է սեղմել «կողմ»-ին, ապա` «հաստատել» վանդակին: ԱԺ փոխնախագահ Սամվել Նիկոյանն էլ ավելացրեց, եթե գրվում է` «Շնորհակալություն քվեարկության համար», նշանակում է, արդեն կատարել եք քվեարկություն:

Այսօր դժգոհ են նաև ԱԺ նիստը լուսաբանող լրագրողները, որոնք պատգամավորների օրինաստեղծ աշխատանքին հետևում են ապակեպատ օթյակից: Նստած ոչինչ չեն տեսնում, անվտանգության աշխատակիցներն էլ ոտքի կանգնել չեն թողնում: Ձայնագրման համար պայմաններ ստեղծված չեն: Մի դինամիկ է` վերևում ամրացված, որից որակյալ ձայնագրելու համար հեռուստատընկերությունների ու ռադիոընկերությունների լրագրողները ստիպված են ոտքի վրա կանգնած բարձր պահել միկրոֆոները:
Ինչպես հաղորդում է Panorama.am-ի լրագրողը ԱԺ-ից, այս պահին լրագրողների դժգոհությունն ու բարկությունն այնքան մեծ է, որ նրանք ցանկանում են բոյկոտել ու չլուսաբանել ԱԺ աշխատանքը: