Ձեր վստահելի աղբյուրը

Գիտեք` «Անվտանգ քաղաք» ծրագրի շրջանակներում մայրաքաղաքում տեղադրված տեսախցիկների միջոցով կհսկվի նաև չսահմանված վայրերում աղբ թափելը: Panorama.am-ի հետ զրուցում Քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը նշեց, թե` վերահսկումը կատարվելու է նաև վարչական շրջանների աշխատակիցների և «բոլոր սրտացավ քաղաքացիների» միջոցով:

«Ամբողջը նկարահանվելու է և այդ նկարները բնականաբար ներկայացվելու է հանրությանը: Դրանց հիման վրա էլ կազմվելու են համապատասխան վարչական ակտեր: Սա իսկապես կտա իր արդյունքը»,-ասաց Ա. Գևորգյանը:

Panorama.am-ի այն հարցին, թե արդյո՞ք օրենքի շրջանակներում է, մարդկանց նկարահանելը և լուսանկարները հրապարակելը, քաղաքապետարանի տեղեկատվության և հասարակայնության հետ կապերի վարչության պետը պատասխանեց. «Ինքս իրավաբան չեմ և չեմ փորձի իրավական դաշտ մտնել: Բայց եթե իրավական առումով այդ ամենը հրապարակելու խնդիր ունենանք և եթե իրավաբաններն ասեն, որ հրապարակելու խնդիր կա, ապա մենք ուղղակի կկազմենք ակտերը, իսկ լուսանկարները կլինեն լրացուցիչ հիմք, եթե տվյալ քաղաքացին կամ իրավաբանական անձը փորձի ներկայացնել, որ իրեն անտեղի են տուգանել: Այդ ժամանակ ելնելով մեր շահերից՝ կհրապարակենք դրանք: Կհարպարակվի, որպեսզի ցույց տանք՝ օդից որևէ մեկին չենք տուգանում»:

Փաստորեն` իրավական կողմը ճիշտ է, թե չէ` քաղաքապետարանը կճշտի ոչ թե նախօրոք, այլ` անելուց հետո:

Նշենք, որ Վարչական իրավախախտումների մասին ՀՀ օրենսգրքով սահմանված է. չսահմանված կամ չնախատեսված տեղերում, վայրերում՝ աղբամուղերից, աղբահավաք խցերից, աղբարկղերից, աղբամաններից, աղբահավաք մեքենաներից, ինչպես նաև սահմանված կարգով կազմակերպված կամ նախատեսված աղբավայրերից դուրս աղբ թափելը առաջացնում է տուգանքի նշանակում ինչպես ֆիզիկական, այնպես էլ իրավաբանական անձանց նկատմամբ։

Օրենսդրորեն քաղաքապետին վերապահված այս լիազորությունը, Երևանի ավագանու համաձայնությամբ, պատվիրակված է վարչական շրջանների ղեկավարներին։

Այս օրենքում ոչինչ չկա նշված մարդկաց նկարահանելու և նկարաները հրապարակելու հետ կապված:

Այսօր Էրեբունի Վարչական Շրջանը իր ֆեյսբուքայն էջում հրապարակել է կնոջ լուսանկար և գրառում կատարել, թե կինը չսահմանված և չնախատեսված վայրում աղբ է թափել: Մեր բոլոր հարցադրումներին, թե ո՞ր օրենքով է այդ լուսանկարը հրապարակվել և արդյո՞ք օրենքի խախտում չկա այստեղ, նրանք մեջբերեցին «Տեղեկատվության ազատության մասին» ՀՀ օրենքը, ինչին ի պատասխան գրեցինք` «Դուք մարդու նկարը հրապարակում եք որպես օրինախախտի` առանց դատարանի որոշման, հետևաբար վազանցում եք օրենքը: Դուք լիազորված եք ընդամենը տուգանելու: Տեղեկատվության մասին օրենքը իզուր եք այստեղ ցիտում, այն բոլորովին այլ բանի մասին է: Դուք հիմա ոչ անվտանգություն կանխեցիք, ոչ հանրային առողջության խնդիր լուծեցիք: Լրիվ այլ մասշտաբների մասին է և այն ձեր համար է, ոչ թե քաղաքացիների»:

«Տեղեկատվության ազատության մասին ՀՀ օրենքն ընդհանրապես սրա հետ կապ չունի»,-Panorama.am-ի հետ զույցում հաստատեց Ինֆորմացիայի ազատության կենտրոնի նախագահ Շուշան Դոյդոյանը:

«Զարմանում եմ, այստեղ ոչ մի կապ չկա օրենքի հետ: Օրենքը վերաբերում է նրան, երբ որ մարդիկ դիմում են և տեղեկություն են ստանում»,-նշեց Շ. Դոյդոյանը:

Panorama.am-ը զրուցեց նաև Ինֆորմացիայի ազատության կենտրոնի իրավաբան Գևորգ Հայրապետյանի հետ, որ նշված օրենքին հղում անելը ֆանտաստիկա համարեց:

« Տեղեկատվության ազատության մասին ՀՀ օրենքի 7-րդ հոդվածի 2-րդ մասը վերաբերում է տեղեկություն տնօրինողի տնօրինության տակ գտնվող այն տեղեկությանը, որի հրապարակումը կարող է կանխել պետական և հասարակական անվտանգությունը, հասարակական կարգին, հանրության առողջությանն ու բարքերին, այլոց իրավունքներին և ազատություններին, շրջակա միջավայրին, անձանց սեփականությանն սպառնացող վտանգը»,-նշեց իրավաբանը և շեշտեց, որ այստեղ շրջակա միջավայրին սպառնացող վտանգ չկա:
Նրա խոսքերով՝ հղումը նշված օրենքին խնդրահարույց է և չունի հիմնավորումներ:

Իրավաբանն ավելացրեց, որ լուսանկարը կարող էր հրապարակվել միայն դատարանի որոշումից հետո: Այստեղ նաև մեկ այլ հարց է ծագում, որ օրենքով են քաղաքացիները տեսանկարահանվում:

«Մարդկանց առանց զգուշացնելու տեսալուսանկարելը խախտում է նրանց ազատ տեղաշարժվելու իրավունքը».-նշեց իրավաբանը:

Ա. Գևորգյանն պարզաբանեց՝ տուգանքները վերաբերվում են ոչ միայն քաղաքացիական անձանց, այլ նաև իրավաբանական անձանց՝ խանութներին, ձեռնարկություններին, այդ թվում նաև սանմաքրման ձեռնարկություններին, որոնք սահմանված ժամերին չեն կատարում աղբահանում: