Ձեր վստահելի աղբյուրը

Գյումրիում սպանված Ավետիսյանների ընտանիքի հարազատները  փաստաբանների նոր խումբ են ուզում: Այս մասին նրանք հայտարարեցին Շիրակի դատախազությունում:

Հիշեցնենք, որ նրանք այսօր գնացել էին Շիրակի մարզի դատախազություն` դատախազ Րաֆֆի Ասլանյանից պահանջելով, որ կազմակերպի հանդիպում կամ հեռախոսազրույց գլխավոր դատախազ Գևորգ Կոստանյանի հետ: Ավետիսյանների հարազատները ցանկանում են ստանալ իրենց հարցերի պատասխանները կապված գործի քննության, ընթացքի հետ: Նրանք մինչև ուրբաթ ժամանակ տվեցին գլխավոր դատախազին, որպեսզի ներկայանա և իրենց ներկայացնի տեղեկատվություն, հակառակ դեպքում նրանք դուրս կգան փողոց: 

«Եթե նորմալ փաստաբան լիներ, նա այսօր մեր կողքին կլիներ: Նա պարտավոր էր լինել: Դիմում ենք աշխարհի, Հայաստանի փաստաբաններին, թող կապնվեն մեզ հետ: Մեզ նոր, ավելի գործուն փաստաբաններ են պետք»,- ասացին Ավետիսյանների հարազատները:
Նրանց խոսքով, ուզում են լուրջ փաստաբաններ, ովքեր քննության ընթացքի վերաբերյալ իրենց տեղեկատվություն կհաղորդեն:

Գյումրեցի ակտիվիստ Կարեն Պետրոսյանն էլ ասաց, որ Ավետիսյանների հարազատներից ոմանք գոհ չեն փաստաբանի գործողություններից: «Այս գործում լավ փաստաբանություն է պետք, անհրաժեշտ է հստակ հասկանալ, թե ինչ է կատարվում այս գործի շրջանակներում:  Լավ առիթ է, որպեսզի մեր փաստաբաններ րոպե առաջ ցանկություն հայտնեն ընդգրկվել այս գործում, նպաստել գործի քննությունը: Գործը շատ մեծ է, անհասկանալի բաներ կան»,- ասաց նա:

Հիշեցնենք, որ տուժողների մերձավոր ազգականներից 5 անձ ճանաչվել է տուժողի իրավահաջորդ: Փաստաբան Երեմ Սարգսյանը քրեական գործով ներկայացնում է տուժողի իրավահաջորդներ Լուսինե Ավետիսյանի և Եգոր Ադամյանի շահերը: Տուժողների շահերը պաշտպանում է նաև հանրային պաշտպան Թամարա Բաղդասարյանը:

Գյումրի քաղաքում հունվարի 12-ին Ավետիսյանների ընտանիքի յոթ անդամների սպանության առթիվ հարուցված քրեական գործով ՀՀ քննչական կոմիտեի քննիչները Գյումրիում տեղակայված ռուսական 102-րդ ռազմաբազայի ժամկետային զինծառայող Վալերի Պերմյակովին մեղադրանք են առաջադրել ՀՀ քրեական օրենսգրքի 104-րդ հոդվածի 2-րդ մասի 1-ին կետով՝ երկու և ավելի անձանց դիտավորյալ սպանության համար: Վալերի Պերմյակովն ընդունել է առաջադրված մեղադրանքը: Նրան մեղադրանք է առաջադրված նաև ՌԴ Քրեական օրենսգրքի երկու հոդվածով՝ սպանություն և դասալքություն:

Դեպքից հետո Գյումրիում տեղի ունեցան բողոքի ակցիաներ, պահանջը մեկն էր՝ Պերմյկովին հանձնել հայ իրավապահներին, նրա դատավարությունն ընթանա Հայաստանում՝ հայաստանյան օրենքներին համապատասխան:
Փետրվարի 3-ին ՀՀ գլխավոր դատախազ Գ. Կոստանյանը Գյումրի քաղաքում ՀՀ յոթ քաղաքացիների սպանության դեպքի առթիվ հարուցված քրեական գործի վարույթը ՀՀ իրավապահ մարմիններին փոխանցելու վերաբերյալ միջնորդությամբ դիմել է ՌԴ գլխավոր դատախազ Յու. Չայկային: Պատասխան դեռևս չկա:

Նախորդող հրապարակումներ`

Ավետիսյանների հարազատները պատասխան չստանալու դեպքում ուրբաթ օրը ցույց կանեն
Գյումրիի ողբերգությունից 40 օր անց. «Ռուսական կողմը պատրաստ չէ հանձնել Պերմյակովին»
Երեմ Սարգսյանը կծանոթանա դաժան սպանության վայրին, կտեսնի դեպի ռուսական զորամաս երթուղին
Բոլոր հարցերին չեմ պատասխանել, քանի որ գոյություն ունի նախաքննության գաղտնիություն». Գևորգ Կոստանյան
«Իրավունք ունե՞ն ռուսական ռազմաբազայի զինծառայողները զինված օպերատիվ գործողություններ իրականացնել ՀՀ տարածքում». Նիկոլ Փաշինյան
«Արտաքին գործերի նախարարը չկա, ԱԱԾ-ն չի արձագանքում». Ալեքսանդր Արզումանյան
«Սահմանը հատելու մասով քրեական գործ չի հարուցվել». Զարուհի Փոստանջյան
«Նիստ անում եք՝ ասելու համար, որ նիստ եք անում». Նաիրա Զոհրաբյան
Որևէ սահմանախախտ նախևառաջ պետք է ՀՀ Ազգային անվտանգության ծառայությանը հանձնվեր. Խոսրով Հարությունյան
«Տղամարդավարի ասում եմ՝ դիմելու եմ ՌԴ գլխավոր դատախազին». Գևորգ Կոստանյան
 «Ես էլ երեխեք ունեմ, հասկանում եմ դա ինչ է նշանում». Գլխավոր դատախազը՝ գյումրեցիներին
Գևորգ Կոստանյանը՝ գյումրեցիներին. Հանգիստ եղեք, համբերեք
Գյումրեցիները պահանջում են՝ «դուրս արի»
Գյումրեցիներ կրկին հավաքվել են. ՀՀ Գլխավոր դատախազը զրուցեց նրանց հետ