Ձեր վստահելի աղբյուրը

Մարդու իրավունքների պաշտպանի գրասենյակի ներկայացուցիչները հանդիպել են ազատամարտիկ Սմբատ Հակոբյանի հետ՝ փորձելով ճշտել, թե արդյոք տուժողը դժգոհություն ունի իրավապահ մարմիններից, թե ոչ: Այս մասին այսօր ՀՀ կառավարության նիստից հետո լրագրողների հետ զրույցում ասաց Մարդու իրավունքների պաշտպան Կարեն Անդրեասյանը:

Հիշեցնենք, որ սեպտեմբերի 21-ին Սմբատ Հակոբյանից ստացվել է հաղորդում առ այն, որ նույն օրը Աբովյան փողոցում անհայտ անձինք անհիմն վիճաբանել են իր հետ, որի ընթացքում ձեռքերով, ոտքերով, ձեռքի տակ ընկած առարկաներով հարվածել մարմնի տարբեր մասերին` պատճառելով մարմնական վնասվածքներ:

Կ. Անդրեասյանի խոսքերով, ազատամարտիկին առաջարկել են՝ իրավապահներից դժգոհություն ունենալու դեպքում դիմել Մարդու իրավունքների պաշտպանի գրասենյակ:

«Այդ դեպքում մենք վարույթ կհարուցենք և համապատասխան քայլեր կձեռնարկենք: Այժմ հետևում են զարգացումներին և ևս մեկ անգամ դատապարտում ենք ցանկացած բռնություն, հատկապես, եթե դա քաղաքական խոսքի կամ քաղաքական գործընթացների ամսնակցության հետ է առնչվում»,- ասաց Կարեն Անդրեասյանը:

Նրա խոսքերով՝ ցանկացած ժամի, ցանկացած տեղ, կարող է ծեծ լինել, այլ հարց է, թե դա ինչպես է բացահայտվում:

«Մենք սպասում ենք իսկական մեղավորներին բացահայտելուն, որպեսզի տուժողը բավարարված լինի իրավական գործընթացներից»,- նշեց նա՝ հավելելով, որ վերջին շրջանում բռնությունը՝ դա լինի պարտքի պահանջի վերադարձ, թե իրար հետ ինչ-որ քաղաքական հարցեր ճշտելու ճանապարհ, դարձել է հարաբերությունների կարգավորման ձև:

«Ցավը նաև նրանում է, որ ամեն անգամ, երբ լինում է ծեծ, մենք լսում ենք ինչ-որ հայտնի մարդու անուն և դրա հետ կապված կամ շահարկում, կամ ճշմարտացի մեղադրանք, բայց այդ անունների ֆոնի վրա կարող եմ ասել նաև, որ նորաոճ է դառնում՝ որևէ մեկի հետ ունեցած բախումից անմիջապես հետո սկսում են հերոսանալ և ճիշտ կլինի տալ ինչ-որ հայտնի մարդու անուն»,- ասաց Կ.Անդրեասյանը:

Դիտարկմանը՝ սա այդ դեպքն է, նա պատասխանեց, որ սա այդ դեպքն է, թե ոչ, դա կպարզի նախաքննությունը. «Կարծում եմ՝ շահարկումները, որոնք անընդհատ տեղի են ունենում քաղաքական ֆոնի վրա, ի վերջո կդադարեն: Արդյունքում՝ կամ կպատժվեն քաղաքական ուժերը, կամ քաղաքական գործիչները, որոնք կազմակերպում են նման ծեծերը, եթե դա այդպես է, կամ կդադարենք ամեն մի զոհի հետ կապված սարքել մեծ քաղաքական սկանդալ և գործընթացները կլինեն զուտ մարդկային դաշտում»:

Նա միաշամանակ նշեց, որ հասարակությանը պարբերաբար «ցնցման» մեջ պահելը ամեն մի անհատական դեպքով վտանգավոր է, քանի որ եթե իսկապես լինի քաղաքական ծեծ, ապա հնարավոր է, որ այդ դեպքում շատերը սկսկեն դրան չհավատալ:

«Դրա համար առաջարկում եմ շահարկումներից զերծ մնալ՝ հասկանալու, թե որքանով է քաղաքական այս դեպքը: Եթե քաղաքական է, ապա և մենք, և մնացած բոլոր կառույցները խիստ դատապարտող հայտարարություններով հանդես կգան»,- ասաց Կարեն Անդրեասյանը:

Թեմային առնչվող հրապարակումներ՝
Ազատամարտիկին ծեծելու քաղաքական պատվեր չկա և չի եղել. Շարմազանով
Հայտնի է ազատամարտիկին ծեծելու կասկածանքով ձերբակալվածների ինքնությունը
Հարուցվել է քրգործ և Սմբատ Հակոբյան ճանաչվել է տուժող
Հիվանդանոց տեղափոխված ազատամարտիկի վիճակը կայուն է