Ադրբեջանը պատմության մեջ կմտնի որպես բռնաճնշումների աննախադեպ արշավ իրականացրած երկիր. ԵԽ հանձնակատար
«Որպես մարդու իրավունքների գծով եվրակոմիսար երկուսուկես տարվա աշխատանքի ընթացքում իմ ամենաբարդ առաքելությունը դարձավ 2014-ի հոկտեմբերին Ադրբեջան այցելությունը: Հոկտեմբերի վերջին ես Ադրբեջանում էի, երբ այն դեռ նոր էր ավարտել ԵԽ Նախարարների կոմիտեում իր նախագահությունը: Ադրբեջանը պատմության մեջ կմտնի որպես մի երկիր, որը բռնաճնշումների աննախադեպ արշավ է կազմակերպել իրավապաշտպանների դեմ իր նախագահության ժամանակահատվածում»,- այս մասին իր ֆեյսբուքյան էջում գրել է Եվրոպայի խորհրդի Մարդու իրավունքների հարցերով հանձնակատար Նիլս Մույժնիեկսը:
«Ինձ ծանոթ իրավապաշտպաններից շատերն Ադրբեջանի բանտերում են: Ծանր էր Լեյլա Յունուսին այցելելը քննչական մեկուսախցում դատավարությանը նախորդող ժամանակավոր ազատազրկման ընթացքում: Նա լալիս էր մեր ողջ մեկուկեսժամյա հանդիպմանը»,-գրում է նա:
Մույժնիեկսը նաև նշում է, որ Լեյլա Յունուսը` Խաղաղության ու ժողովրդավարության ինստիտուտի տնօրենը, հայտնի իրավապաշտպան է, Եվրախորհրդարանի` Սախարովի անվան հեղինակավոր մրցանակի թեկնածուներից մեկն այս տարի:
Նա գրել է, որ Յունուսը տառապում է շաքարախտով ու հեպատիտով, հնարավորություն չունի տեսնվել ամուսնու` Արիֆ Յունուսի հետ, որը ևս ժամանակավոր կալանքի տակ է` չնայած որ ձերբակալությունից առաջ ուղեղի կաթված է տարել: Նրանց երկուսին էլ պետական դավաճանության համար մեղադրանք է ներկայացվել: Մույժնիեկսը նշում է, որ Լեյլա Յունուսը կազմել է երկրում քաղբանտարկյալների ցուցակ: Նրա խոսքերով` Ադրբեջանից իր մեկնելու օրը Յունուսի ձերբակալությունը երկարաձգել են ևս 4 ամսով:
«Ծանր հանդիպումներից էր նաև իրավաբան, «Իրավական լուսավորման ընկերության» ղեկավար Ինթիգամ Ալիևի հետ տեսակցությունը, որը ևս նախնական կալանքի տակ է: Նրա ձերբակալության ժամկետն էլ են երկարաձգել 3 ամսով իմ մեկնելու օրը: Դատավճռի հայտարարման ժամանակ Ինթիգամը կորցրել է գիտակցությունը»,- գրում է հանձնակատարը:
Նիլս Մույժնիեկսը նաև հիշատակել է, որ հանդիպել է Ընտրությունների մշտադիտարկման ու ժողովրդավարության ուսուցման կենտրոնի ղեկավար Անար Մամեդլիին, որը 2014-ին դարձել է Վացլավ Գավելի անվան` իրավապաշտաններին տրվող մրցանակի դափնեկիր: Մամեդլին դատապարտվել է 5,5 տարի ազատազրկման:
Մույժնիեկսը հանդիպում է ունեցել նաև Ռասուլ Ջաֆարովի հետ, որը գլխավորում էր «Մարդու իրավունքների ակումբ» ՀԿ-ն: Նա նշել է, որ Ջաֆարովի նախնական կալանքի ժամկետը երկարաձգել են 3 ամսով:
«Այն ժամանակ, երբ իմ գործընկերների մեծ մասը բանտերում է, մյուսները հարկադրված են եղել կասեցնել իրավապաշտպանի իրենց գործունեությունը, լքել երկիրը կամ թաքնվել»,- գրում է Մույժնիեկսը:
Նա նաև նկատել է, որ հանդիպել է Լրագրողների ազատության ու անվտանգության կենտրոնի տնօրեն Էմին Հուսեյնովի հետ:
«Ես այցելել եմ նրան: Չնայած իր երիտասարդ տարիքին` նա բարձր ճնշում ունի և ողնաշարի` վաղուց ստացած վնասվածք: Դա ցույցերի ընթացքում ոստիկանների կողմից ծեծի ենթարկվելու հետևանք է»,- գրում է հանձնակատարը:
Նրա խոսքերով` նմանատիպ գործողությունները խոչընդոտում են Եվրոպայի խորհրդի համագործակցությանն Ադրբեջանի հետ: Նա շեշտել է, որ այդ բռնաճնշումները պետք է անհապաղ դադարեցվեն:
Նյութեր թեմայի շուրջ`
ԵԽ նախարարների կոմիտեում նախագահելիս Ադրբեջանի իշխանությունը միայն հարված է հասցրել երկրի հեղինակությանը. «Ազադլիգ»
Միջազգային իրավապաշտպան կազմակերպությունները քննադատում են ԵԽ գլխավոր քարտուղարին՝ Ադրբեջանի վրա չազդելու համար
Ադրբեջանցի ակտիվիստները ԵԽԽՎ-ից պահանջում են պատժամիջոցներ կիրառել Ադրբեջանի նկատմամբ
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
