Ձեր վստահելի աղբյուրը

Այս տարվա ընթացքում ազատազրկված անձանց համար կաևորագույն խնդիր է շարունակում մնալ պատժից վաղաժամկետ ազատման անհասանելիությունը, բուժսպասարկումն ու խցերի ծանրաբեռնվածությունը: Լրագրողների հետ հանդիպման ժամանակ ասաց Հասարակական դիտորդական խմբի նախագահ Ռուբեն Սարգսյանն` ամփոփելով խմբի այս տարվա գործունեությունը:

Նշենք, որ դիտորդական խումբը ստեղծվել է 2004 թվականին: Ցանկացած օր, ցանկացած ժամի խմբի անդամները կարող են այցելել ցանկացած ՔԿՀ, որևէ խոչընդոտ, ըստ խմբի անդամների, օրենսդրական տեսանկյունից չկա: Խումբն ունի 10 անդամ, որից 6-ը փորձագետ է, ՔԿՀ-ներ այցելելու մանդատ ունեն, իսկ 4-ը խորհրդատու են:

Ռուբեն Սարգսյանի խոսքով, եթե 2013 թվականին իրենց կողմից վեր հանված խնդիրները հիմնականում մնում էին թղթի վրա գրված, ապա արդարադատության նախարարությունում տեղի ունեցած փոփոխությամբ (նախարարի, աշխատակազմի որոշ անդամների, Քրեակատարողական վարչության) նաև գործելաոճն է փոխվել. «Երբ խնդիր ենք գտնում և վեր ենք հանում, հայնաբերում ենք, արագ արձագանք է ստանում: Լուծումներ որոնելիս խումբը մասնակից է դառնում»:

Ռ. Սարգսյանը նշեց, որ այժմ խումբը համագործակցում է արդարադատության նախարարության հետ օրենսդրական փոփոխությունների մասով:

Հասարակական դիտորդական խմբի դիտորդ Հասմիկ Հարությունյանն ասաց, որ Հայաստանում վատ է գործում պայմանական վաղաժամկետ ազատման և ծանր հիվանդությունների հետևանքով պատժից ազատելու ինստիտուտները: Ներկայացրած տվյալների համաձայն, «Աբովյան» ՔԿՀ-ից 1,5 տարվա ընթացքում ընդամենը երեք անձ է պատժից պայմանական վաղաժամկետ ազատվել, «Վարդաշեն» ՔԿՀ-ից այս տարվա մարտից մինչ օրս վաղաժամկետ ազատման որևէ դեպք չի արձանագրվել, թեև հիմնարկի վարչակազմը ներկայացրել է դիմումներ:

2013 թվականին 5468 դատապարտյալ դիմել է վաղաժամկետ ազատման համար, անկախ հանձնաժողով ներկայացվել է միայն 960 դիմում, հանձնաժողովը հավանության է արժանացրել 273-ը, դատարանը բավարարել է 261-ը: Հ. Հարությունյանն ասաց, որ 2011-ին, 2012-ին ներկայացված դիմումների քանակը 2013-ի, 2014-ի համեմատ ավելի քիչ է եղել, բայց վերջնական արդյունքում ավելի շատ է եղել վաղաժամկետ ազատվածների թիվը:

Հասարակական դիտորդական խմբի դիտորդ Նարե Մեսրոպյանն ասաց, որ քրեակատարողական հիմնարկները բժիշկներով համալրվելու խնդիր ունեն: Ըստ նրա, գրեթե բոլոր ՔԿՀ-ներն ունեն բժիշկների պակաս:

Հասարակական դիտորդական խմբի դիտորդ Սերգեյ Գաբրիելյանն էլ նշեց, որ գրեթե բոլոր ՔԿՀ-ներում խտրական վերաբերմունք է դրսևորվում նույնասեռականների, այսպես կոչված «թռածների» նկատմամբ: Բացի «Կոշ» ՔԿՀ-ից, նույնասեռականների խցերն առանձնացված են, որոնք անբարենպաստ վիճակում են գտնվում, կեղտոտ են, չեն ջեռուցվում:

«Նրանց վերաբերվում են անմարդկային ձևով: Նրանց հանձնարարում են կատարել ամենանվաստացուցիչ աշխատանքները՝ մաքրել զուգարանրը, հատակը, կոշիկները»,- ասաց Ս. Գաբրիելյանը: